Разновидна брендирана облека од марките „Бриони“, „Хуго Бос“, „Армани“, „Д и Г“, „Кавали“, „Дизел“, „Риплеј“, „Келвин Клаин“ и други познати светски брендови се пронајдени при претрес на куќата во скопската населба Бутел, соопштуваат од Царинската управа

Двајца скопјани продавале криумчарена стока од познати светски брендови. Царинските власти вчера го откриле нелегалниот „бутик“.При претресот биле запленети 308 парчиња на луксузна облека, машки костуми, машки кошули, фармерки, пантолони, фустани, кожни јакни, капути, мантили, женски комплети и блузи, кои биле закачени на закачалки и изложени на рафтови. Освен тоа била пронајдена и облечена кукла за во излог, празни закачалки, хартиени ќеси за пакување на купена облека, испечатени визит карти со име и телефонски број, тефтер во кој биле забележани имињата на купувачите кои должеле пари за скапата стока и остварена заработка, како и повеќе куфери кои користеле за пренесување на брендирана облека. Стоката што ја продавале најчесто ја носеле од Србија, ја пренесувале со сопствено возило, избегнувајќи ги царинските давачки, а за стоката не поседувале никакви документи. По Мадам Пепи ова е втор случај на откриена нелегална продажба на брендирана стока.