Македонија
Репортажа на АФП за Македонија: Масовно иселување на младите во потрага по подобар живот
Напуштените продавници и претежно празни улици даваат малку знаци на живот во Валандово во Северна Македонија, каде младите луѓе бегаат во голем број надевајќи се дека ќе најдат подобар живот во странство, вака ја започнува репортажата за нашата земја француската агенција АФП.
Во текстот се наведува дека како и поголемиот дел од овој осиромашен агол на југоисточна Европа, оваа мала балканска нација седи на демографска темпирана бомба поттикната од стареењето на населението, намалената стапка на наталитет и масовната миграција. Околу 600.000 македонски граѓани сега живеат во странство, покажуваат податоците на Светска банка и Владата. Слабиот економски раст и недостигот на инвестиции ја зафатија земјата, која сега е дом на само 1,8 милиони луѓе, во нејзините 30 години независност.
„ Ако имате нешто повеќе од 2,4 милиони граѓани, а повеќе од една четвртина си заминале, тогаш треба сериозно да се загрижите за тоа што се случува“, вели Апостол Симовски, директор на Заводот за статистика во државата.
АФП додава дека селата и малите градови како Валандово, нудат малку работни места, па ги турка амбициозните и способните да бараат работа на друго место.
„Духот на младите е систематски уништен. Ентузијазмот за борба и останување дома е изгубен“, изјави за АФП Перо Костадинов, новоизбраниот 33-годишен градоначалник.
Само во Валандово, речиси 90 отсто од приходите на луѓето се поврзани со земјоделството, се вели во текстот на француската агенција.
Добро познатата анегдота во оваа земја нуди остра слика за тоа каде се движи нејзината иднина, посочува авторот на текстот.
„ Подобро да робувам во странство“.
Од независноста и распадот на Југославија во 1991 година, многумина се надеваа дека интеграцијата во Европската унија ќе обезбеди спасувачки сплав и ветувања за посветла иднина.
Но, патот на Северна Македонија кон членството во ЕУ постојано беше блокиран, прво од Грција, а подоцна и од Бугарија, што доведе до нови сомнежи дека земјата некогаш ќе се приклучи и турка многумина да скокаат од бродот.
За оние кои остануваат, месечните плати во просек се 470 евра (530 долари).
Текстот завршува со констатацијата дека ваквата слика важи за целиот Балкан.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Апасиев: Левица ќе и поднесе кривична пријава на Цвета Ристовска
Партијата Левица соопшти дека ќе поднесе кривична пријава против Цвета Ристовска, член на Државната комисија за спречување на корупцијата, откако таа поднесе оставка од функцијата.
Лидерот на партијата, Димитар Апасиев, преку објава на социјалните мрежи наведе дека правниот тим на Левица подготвува пријава поради, како што тврди, лажирање податоци во анкетен лист со цел прикривање фирми поврзани со нејзини блиски.
Тој посочи дека, според нив, станува збор за кривично дело утврдено со Кривичниот законик и додаде дека доколку не биле објавени серија скандали, Ристовска сè уште ќе ја извршувала функцијата.
Апасиев истакна дека партијата ќе продолжи со откривање случаи на корупција и ги повика граѓаните кои располагаат со докази против функционери да ги достават до нив, ветувајќи дискреција и поведување правни постапки без оглед на политичката припадност на инволвираните.
Македонија
Ја давел и ја претепал бремената партнерка, се спасила откако го убедила да ја носи на лекар, па побегнала додека стоеле на семафор
Основното јавно обвинителство Скопје поведе постапка против 52-годишен маж осомничен за кривично дело Телесна повреда според член 130 став 2 во врска со став 1 од Кривичниот законик, по пријава за семејно насилство извршено врз неговата 32-годишна вонбрачна партнерка, која била во вториот месец од бременоста.
Според Обвинителството, насилството се случило во домот на улицата „Рајко Жинзифов“ во Скопје, каде по расправија осомничениот започнал физички да ја напаѓа жената, удирајќи ја со тупаници и шлаканици по главата и телото. На оштетената ѝ биле нанесени гребаници, отоци и хематоми.
Додека жртвата викала и барала помош со намера да ја слушнат соседите и да повикаат полиција, осомничениот, според наводите, станувал сè поагресивен и продолжувал да ја удира, а во еден момент ја притиснал со раце за врат со цел да ја замолчи.
За да се спаси и да излезе од домот, жената го убедила осомничениот да заминат на гинеколошки преглед и да направат ехо на бременоста. Додека се движеле со автомобил и возилото застанало на семафорите на булеварот „Св. Климент Охридски“, таа успеала да избега и да влезе во блиско кафуле, каде побарала помош. Со позајмен мобилен телефон веднаш ја известила полицијата.
Јавниот обвинител до судијата на претходна постапка доставил предлог за определување мерки на претпазливост, кои вклучуваат обврска осомничениот повремено да се јавува кај надлежен орган, привремено одземање на патна исправа, како и забрана за приближување и воспоставување контакт со оштетената.
Македонија
Филипче обвинува дека власта удрила и по средните винарии
Претседателот на СДСМ, Венко Филипче, во денешната изјава од Моклиште, Кавадраци, нагласи дека со новите критериуми за добивање субвенции владата директно ги оштетува средните винарии, а новите правила за субвенции одат во прилог на само неколку големи компании.
„Средните винарии имаат обврска да продадат, 30% од грозјето на најголемите една или две винарии, со цел да воопшто стигнат до субвенција. Сето ова оди во прилог на потребите на само една или две големи винарии. Лозарите, тие кои мака мачат на сонце на лозовите насади, малите винари, средните винари, сите се намерно оштетени, намалени им се парите или воопшто нема да можат да ги земат, што е една катастрофа за овој регион“, рече Филипче.
Тој додаде дека во новата Програма за субвенции во земјоделството и парите се скратени и условите за добивање субвенции се усложнети.
„Владата ја намалува и Програмата за субвенции во земјоделството во целост. Од 140 на 100 милиони евра. Значи за цела третина, помалку пари, кај сите сектори во земјоделството, сточарството, лозарството, поледелството, овоштарството и нема да имаат овие земјоделци доволно поддршка од државата како што тоа го имаше во времето на владата на СДСМ“, рече Филипче.
Во изјавата Филипче нагласи дека лозарите не можат да очекуваат позитивни вести кога станува збор за поддршката од државата.
„За жал, сметам дека лозарите оваа година немаат да има добри вести во однос на тоа што значи поддршка од страна на владата за развој на овој сектор. Овој сектор земјоделството во мало го означува пристапот на оваа власт генерално во државата. Кражба, пљачка и незаинтересираност за луѓето.Жалам, но оваа власт не се грижи за граѓаните, за државата“, рече Филипче.

