Премиерот Христијан Мицкоски изјави дека минатата година биле издадени смо 12 лиценци за кабареа, а може а се заклучи колку многу клубови работат во државата. Како што рече, сите кои се без лиценци ќе бидаат затворени и ниту еден клуб нема да работи нелегално.

„Состојбата е шокантана.Дојдовме до заклучок дека во 2024 година се издадени вкупно 12 лиценци за кабареа, а сега можете да претпоставите колку клубови работат низ државата, а само 12 поседуват лиценци и тоа од тие не знаеме кои се се уште валидни бидејќи на некои претпоставувам рокот им е изминат, затоа што тие се со важност од една година, така што не очекува многу работа. Очигледно е дека некој не си ја вршел работата и сега се обидува под наводно некаква политизација да ја сокрие криминалната работа која што ја правел изминативе години додека раководел со тaа институција. Нема да има милост, од која сака нека е етничка припадност или политичка партија, ако треба за уши ќе ги влечеме од дома“, рече Мицкоски, додвајќи дека ова е масовно убиство што некој го дозволил за пари и криминал.

За клубот „Пулс“ каде што се случи пожарот, Мицкоски рече дека низ годините речиси цело време работел без лиценца, а извадил само во 2021 и 2023 година.

За кочанскиот градоначалник кој поднесе оставка, Мицкоски тврди дека тој немал никаква одговорност, но постапил правилно со оставката. Мицкоски рече дека како што Владата досега успеала да се избори со уличната мафија, мафијата со казината, мазутот, така и ќе ја порази административната мафија.

Тој им се заблагодари на соседите и земјите кои хоспитализираа пациенти, како и на домашните здравствени работници за пожртвуваноста. Ги повика и сите кои биле во или околу објектот да побараат медицинска помош, бидејќи може да има ефекти по неколку дена, па состојбата треба да се следи. Се прават надчовечки работи за сите пациенти да бидат стабилни, рече Мицкоски.

Во пожарот во клубот „Пулс“ во Кочани, животот го загубија 59 лица, а 162 се повредени. Досега се уапсени 11 лица. Претходно денес беше објавено дека починал и возачот на брзата помош од Кочани кој ги превезувал повредените. По трагедијата и трауматичниот работен ден, дошол дома и заспал, и повеќе не се разбудил, објавија повеќе медиуми.

Некои од лекарите специјалисти за лекување изгореници, кои најавија дека ќе дојдат за да помогнат во лекувањето на повредените од пожарот во Кочани, се веќе во земјава. Министерот за здравство Арбен Таравари денес извести дека повредените кои беа сместени во болниците во Кочани и во Штип се донесени во Скопје. Од вкупно 135 повредени во пожарот, 51 пациент се на лекување во странство, а останатите 84 се сместени во скопските болници, односно во Клиничкиот центар „Мајка Тереза“ има 49 пациенти, во Клиничката болница „Св. Наум Охридски“ има 17 пациенти и во Градската општа болница се сместени 18 повредени.

„Веќе се стигнати доктори од повеќе држави, од Чешка, од Израел треба да стигнат, од Белград се стигнати. Околу 15 колеги веќе се во Македонија. Ќе ги распределиме по клиниките каде што има најмногу потреба за да работат со нашите колеги и да го споделат искуството“, рече денес министерот Таравари.

Директорот на Фондот за здравствено осигурување, Сашо Клековски, рече дека се работи за лекари со големо искуство во лекување изгореници.

„Докторите од Белград, Прага и Израел се воени доктори со искуство во изгореници. Кај нас и кога се случувало да имаме изгореници тоа е еден или два тешки случаи на две години, не станува збор за хируршкиот или интензивниот дел кој го владееме добро туку сепак станува збор за настани што не се со таква инциденца во Македонија за да го имаме акумулирано потребното искуство“, рече директорот Клековски.

Министерот Таравари и директорот Клековски утрово апелираа на лекар да се јават дури и оние кои се чувствуваат добро, а вечерата биле во дискотеката во Кочани кога изби пожарот за да се провери дали имаат внатрешни оштетувања на дишните органи.

Катастрофалната трагедија во Кочани, во која загинаа голем број наши сограѓани, покрена многу прашања за безбедноста, контролата и функционирањето на институциите, особено за оние кои согласно закон знаеле и биле должни да знаат што се случува, велат од ДУИ.

„Кочани е општина со 31.602 жители, 12 илјади домаќинства и само 2 места кои работат дејност ноќен клуб односно кабаре. Во ова населено место сограѓаните меѓусебно се познаваат, но и многу добро локалното население ги познава приликите во самата општина.

Градоначалникот Љупчо Папазов кој 3 години ја владее со општина Кочани знаел и бил должен да знае дека фирмата ММММ Кафе Дооел Кочани нема лиценца и не исполнува услови да ја врши таа дејност во неговото населено место.

На објектот каде се вршела дејност во март 2024 година Министерството за економија не дозволила да се издаде лиценца.

За прашањата дали во 2012 година биле направени сите потребни проверки и дали било утврдено дека просторот ги исполнува стандардите за противпожарна заштита, безбедносни излези и капацитет за евакуација, одговорот е едноставен. Во 2012 година односно пред 13 години објектот и да ги исполнувал минимално техничките услови да врши некаква дејност, тој во 2024 година не ги исполнувал условите да врши дејност кабаре односно ноќен клуб!

Затоа клучно е кои институции, кои функционери и со чија одлука е дозволено во 2024 и 2025 година без лиценца дека смее да обавува дејност ноќен клуб односно кабаре и овој објект да функционира“.

Сметаат дека на јавноста и е јасно кој апсолутно владее во изминатата година во Македонија, во чие време се случи оваа трагедоја, кој дозволил да се случи и чија е одговорноста за случувањето на оваа трагедија.

„Согласно Правилникот за исполнување на минимално – техничките услови, правното лице Пријавата за исполнување на минимално-техничките услови за вршење на трговија и започнување со работа на продажен или друг деловен објект ја доставува до надлежниот орган на општината Кочани кој е надлежен и должен да врши контрола.

Пријава за исполнување на минимално-техничките услови правното лице ја доставува и до Државниот пазарен инспекторат во Кочани, кој е надлежен и должен да врши контрола.

Согласно правилникот за исолнување на минимално техничките услови за вршење на угостителска дејност во член 9 е утврдено дека објектите е неопходно да ги исполнуваат условите односно со барањето за донесување решение за издавање лиценца за кабаре да достават решение од Централен регистар, уплатен надоместок до општината Кочани, пријавата за исполнување на минимално-техничките услови за вршење на дејсност доставена до ДПИ и до општината Кочани, како и согласност од МВР дека се исполнети условите за заштита на јавниот ред и мир и безбедност во сообраќајот.

Министерството за економија, токму поради фактот дека не биле исполнети условите за издавање лиценца и не била доставена потребната документација не издал лиценца.
Тврдењата дека од министерството за економија некој издал лажна лиценца се целосна конструкција, ако некој поточно државниот секретар земал пари да издаде лиценца, истата ќе ја издал и ќе била евидентирана во Министерството, но и во регистарот на лиценци кој постојано месечно се апдејтира со најнови податоци, а таква лиценца не е евидентирана бидејќи не е издадена.

Ако некој фалсификувал документ надвор од институцијата, одговорноста е на поединецот или групата кои го сториле истото.

Во обид да ги спасат своите кадри од одговорност која мора да ја има, а првенствено Градначалникот на општина Кочани и надлежните во Министерството за внатрешни работи Кочани, кои секојдневно биле во објектот каде се случи трагичниот настан, Владата на ВМРО ДПМНЕ со конструкции се обидува гневот да го насочи кон барање одговорност каде што ја нема!

Вистината за одговорноста е следна
1. Несреќата се случи во време кога на власт е ВМРО ДПМНЕ со целосна контрола над сите институции и во централна и во локална односно општинска власт во Кочани, има Градоначалник на Кочани од редовите на ВМРО и началник на МВР Кочани на предлог на Градоначалникот
2. Министерството за Економија во 2024 година токму опради неисполнување на услови ниту дал одобрение, ниту административните служби во Министерството за економија издале лиценца за ова кабаре односно ноќен клуб за работа. Овој факт се обидува некој да го дефокусира со наводен фалсификат кој не се знае дали постои, кој го направил, а можно е да е креиран токму за цел да се избегне одговорност за оние кои се власт 3 години, а дозволиле цела година без лиценца илјадници настани да се одвиваат во објектот каде се случи кобниот настан.
3. ВМРО ДПМНЕ не се на власт 1 месец туку се на власт скоро 1 година. Во таа година целосно го реформираа Министерството за економија и го трансформираа во Министерство за економија и труд. Во тоа време морале да водат сметка за што се случува со објектите и да контролираат преку своите институции дека таму нема услови и токму затоа нема лиценца издадено.
4. Градоначалникот на Кочани Папазов не само што била должен да знае туку и бил должен да врши секојдневно контрола над рабоењето на објектите под своја надлежност. Во Кочани како општина со 31.602 жители, и само 2 места кои работат дејност ноќен клуб односно кабаре, Папазов и надлежните од општината знаеле и биле должни да знаат дека фирмата ММММ Кафе Дооел Кочани нема лиценца и не исполнува услови.

Ова е трагедија од невидени размери, каде животот го загубија голем број млади луѓе. Одговорност мора да има, а во случајов ноторен факт е дека во март 2024 година Министерот за економија Крешник Бектеши не дозволил да се издаде лиценца за тој објект, бидејки објектот не исполнувал услови, лиценца нема во регистарот на Министерството ниту администрацијата изготвила таква лиценца во 2024 година, а зошто објектот до март 2025 година работел без лиценца одговорот треба да се побара на местото каде мора да се бара и добие одговорност за оваа трагедија“.

Најавуваат дека во текот на следните денови ќе излезат со целосна документација и докази за тоа кој, како и на кој начин дозволил да се случи оваа грозоморна трагедија и ќе поднесат пријава до Јавното обвинителство за покренување постапка за кривична одговорност за надлежните лица и институции, бидејќи одговорност како што велат, мора да има и оваа трагедија не смее да се дозволи да се повтори никогаш повеќе.