Црна хроника
Амбасадата на Србија го потврди идентитетот на загинатиот во охридската тепачка
Станува збор за 34-годишниот Дејан Новаковиќ од Белград, кој загина по тепачката што се случи рано изутринава околу три часот во центарот на Охрид
Инцидентот почнал во ноќниот клуб „Хавана“, во центарот на градот, по банална расправија и вербална пресметка за девојка, по што дошло до турканица и тепачка пред локалот. Потоа следувала брканица низ центарот на Охрид, од пред влезот во локалот, пред седиштето на манифестацијата Охридско лето низ чаршијата до пред влезот во централната пошта во Охрид.Очевидци на настанот рекле дека група од десетина луѓе крвнички тепале едно лице пред влезот во Охридската пошта, по што отишле во непознат правец, оставајќи го претепниот на тротоарот. Набрзо на лице место пристигнала полиција и возило на итната медицинска помош.Од Амбасадата на Република Србија во Македонија го потврди идентитетот на жртвата. Официјална реакција најавија откако ќе ги добијат резултатите од обдукцијата и од полициската истрага. МВР ги потврди информациите за инцидентот, но не соопштени детали за учесниците во тепачката. Информации за текот на инцидентот би можеле да се добијат и од снимките на видео-камерите поставени на сите околни објекти каде се случил инцидентот.Во охридската полицијата утрово на информативен разговор биле повикани триесетина лица, дел учесници во тепачката, а дел очевидци. Се преземаат мерки за расветлување на трагичниот инцидент.Порталот Ohridnews пренесува сведоштво на очевидец на трагедијата. „Момче од чаршијата трчаше во правец кон поштата и викаше хистерично: Полиција! Полиција! – Се бркааа и забележав дека еден беше паднат кај поштата и другите луѓе што беа позади него почнаа да го клоцаат. Паднатиот бранејќи се со рацете на главата им викаше: „ Добро људи шта сам вам урадио!“ (Добро луѓе што ви направив!, на што тепачите му возвратија: „Видечеш ти шта си урадио!“ (Ќе видиш што направи!) и продолжија силно да го удираат со нозе по главата и телото, по што се оддалечија од местото, раскажува Горан Димитриески, чувар на тезгите во непосредна близина на охридската пошта. Тој прв му пристапил на момчето да му помогне, а по неколку минути пристигнала полицијата и возило на брзата помош.„Лекарката кажа дека пулсот на момчето е многу слаб по што го ставија во возилото на брзата помош. Подоцна ми кажаа дека тоа починало, вознемирено кажува очевидецот, кој вели дека не го познавал момчето, а не ги знае ниту тие што го тепале.МВР ги потврди информациите за инцидентот, но не соопшти детали за инволвираните во тепачката. Неофицијално се дознава дека меѓу тепаните гости од Србија има и блиски роднини на лица со висок чин во српската војска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Црна хроника
Скопјанец измамен во менувачница од двајца странски државјани
Скопјанец пријавил дека во менувачница во Старата скопска чаршија бил измамен од страна на двајца странски државјани за сума од 25.000 евра, информираат попладнево од Министерството за внатрешни работи.
Синоќа во 19.15 часот во СВР – Скопје, Х.М., на возраст од 34 години од главниот град на државава, пријавил дека околу 15 часот во менувачница во Старата скопска чаршија бил измамен од двајца странски државјани.
Според пријавеното, откако се договориле во менувачницата да сменат пари за 25.000 евра, лицата дошле со чанта со договорената сума на пари во денари, при што еден од нив ја заменил чантата со денари со друга иста чанта, која во долниот дел била полна со хартиени ливчиња.
Како што пријавил Х.М., тој им ги дал еврата без да ја провери чантата, а откако заминале, сфатил дека е измамен, појаснуваат од МВР.
Се преземаат мерки за расчистување на случајот.
Црна хроника
Пожар во Дом за стари лица во струмичко Банско, нема повредени
Пожар синоќа избил во Дом за стари лица во село Банско, Струмичко. Нема повредени лица, предизвикана е само материјална штета, соопшти Центарот за управување со кризи (ЦУК).
Според Регионалниот центар за управување со кризи – Струмица, пожарот бил пријавен околу 23.30 часот. Во гаснењето на пожарот интервенирале седум пожарникари со две противпожарни возила. Пожарот целосно е изгаснат во 50 минути по полноќ.
– Прво биле евакуирани лица од катот каде што бил пожарот, потоа од долните катови. По целосното гаснење на пожарот, евакуираните лица полека се вратени на местата, собите од каде што биле евакуирани. Причината за пожарот и материјалната штета дополнително ќе бидат утврдени, појаснуваат од ЦУК.
Во денешното соопштение се наведува и дека изминатото деноноќие имало вкупно 1.759 повици на единствениот повикувачки број за итни случаи – 112 во ЦУК.
Црна хроника
Притвор за осомничен за спречување на полициски службеници да фатат побегнат затвореник
Основното јавно обвинителство Кавадарци поведе постапка против 18-годишник за кого постои основано сомнение дека сторил кривично дело – Спречување службено лице во вршење службено дејствие од член 382 став 3 во врска со став 2 и став 1 од Кривичниот законик.
На 2 мај, во куќа на улицата “Димката А. Габерот” во Кавадарци, двајца инспектори од МВР преземале службено дејствие – фаќање побегнат затвореник од КПУ Гевгелија, кој бил роднина на сега осомничениот.
Затвореникот давал отпор при обидот да биде лишен од слобода за доизвршување на затворската казна, во што сега осомничениот го поддржал, се нафрлил врз еден од полициските службеници, го влечел и го гребел, нанесувајќи му телесни повреди.
Затвореникот успеал да се ослободи и да побегне, но подоцна бил фатен и вратен во затворот. Осомничениот исто така избегал во прв момент, но бил лишен од слобода, а по предлог на јавниот обвинител, Основниот суд во Кавадарци му определи притвор во траење од осум дена.