Владимир Путин се плаши да користи нуклеарно оружје затоа што го сака својот живот и ги контролира животите на другите, изјави украинскиот претседател, Володимир Зеленски.

Рускиот претседател на 25 септември изјави дека ја менува руската нуклеарна доктрина и може да ги прошири околностите под кои може да се користи такво разорно оружје.

Но, Зеленски рече дека не мисли оти Путин ќе ризикува да користи нуклеарно оружје.

„Никој не знае што навистина има во главата на Путин. Тој може да користи нуклеарно оружје за да нападне која било земја во секое време. Или не.Не сум сигурен дека ќе го стори тоа. Споделувам со вас што мислам, но јас не сум Путин. Не можам да знам точно. Тој го сака својот живот и својот начин на живот и управување со животите на другите“, рече Зеленски.

Во саботата, рускиот министер за надворешни работи Сергеј Лавров му порача на Вашингтон да ја подготви Европа за самоубиствен потфат поради бесмисленоста и опасноста од самата идеја за борба до победа со нуклеарна сила како Русија.

Иран нема да распореди борци во Либан и Газа за да се соочи со својот заколнат непријател Израел, соопшти денеска иранското Министерство за надворешни работи, додека Израел продолжува со нападите врз групите поддржани од Техеран во регионот.

„Владите на Либан и Палестина имаат доволно капацитет и сила да се соочат со агресијата на ционистичкиот режим и нема потреба од распоредување помошни или доброволни ирански сили“, рече портпаролот на министерството Насер Канани на неделната прес-конференција.

Во последниве денови, Израел изврши неколку напади против групите поддржани од Иран, вклучително и моќниот Хезболах во Либан и јеменските Хути.

Лидерот на Хезболах Хасан Насрала беше убиен во петокот во израелски напад врз јужните предградија на Бејрут, упориште на шиитското движење вооружено и финансирано од Исламската Република Иран.

„Не сме добиле никакви барања и знаеме дека не им е потребна помош од нашите сили“, рече Канани во понеделникот.

Во нападот извршен во петокот врз лидерот на Хезболах во неговото упориште во јужните предградија на Бејрут, беше убиен и бригадниот генерал Абас Нилфорушан, заменик за операции на шефот на Револуционерната гарда, идеолошката армија на Исламската Република.

„Узурпаторскиот ционистички режим нема да остане неказнет за злосторствата што ги направи против иранскиот народ, против силите на отпорот, иранските граѓани и војници“, рече Канани.

Иранскиот претседател Масуд Пезешкијан денеска ја посети канцеларијата на Хезболах во Техеран за да му оддаде почит таму на Хасан Насрала, се вели во соопштението објавено на веб-страницата на владата.

Врховниот лидер на Исламската Република, Али Хамнеи, рече дека загубата на Насрала нема да биде залудна, а првиот потпретседател, Мохамад Реза Ареф, предупреди дека тоа ќе резултира со уништување на Израел.

Кремљ го осуди убиството на лидерот на Хезболах, Саид Хасан Насрала, во израелски воздушен напад минатата недела, оценувајќи дека постои исклучително висок ризик од поширок конфликт на Блискиот Исток.

„Руската страна ги осудува таквите акции, веруваме дека тие доведоа до значително дестабилизација на ситуацијата во регионот“, изјави за новинарите портпаролот на Кремљ, Дмитриј Песков.

„Главната работа е што ваквото неселективно бомбардирање на станбени згради во Либан доведува до голем број човечки жртви, што неизбежно ќе доведе до хуманитарна катастрофа како онаа на која сме сведоци во Газа“, додаде тој и ја изрази најдлабоката загриженост на Москва.

Рускиот премиер, Михаил Мишустин, и иранскиот претседател, Масуд Пезешкијан, ќе се сретнат во недела во Техеран, соопшти вчера Кремљ, а пренесе агенцијата „Франс прес“. Иран е најголемиот сојузник и поддржувач на Хезболах.

Силните напади на Израел врз позициите на таа милитантна група ја зголемија меѓународната загриженост за ризикот од поширока ескалација на Блискиот Исток, во која би бил вклучен и Техеран.

Рускиот министер за надворешни работи, Сергеј Лавров, го прогласи убиството на Насрала за политичко убиство за време на викендот, а неговото министерство го повика Израел веднаш да ги запре нападите во Либан.