Украинскиот претседател Володимир Зеленски изјави дека не гледа индикации дека Русија е подготвена за трилатерален самит меѓу него, американскиот претседател Доналд Трамп и неговиот руски колега Владимир Путин.

„Во оваа фаза, нема индикации од Русија дека трилатералниот самит ќе се одржи“, рече тој за време на кратката заедничка прес-конференција со претседателката на Европската комисија Урсула фон дер Лајен.

Претседателката на Европската комисија изјави дека се надева на трилатерален самит „што е можно поскоро“.

Преговарачка позиција на Украина

Украинскиот претседател изјави дека сегашните фронтовски линии во војната на неговата земја против Русија треба да бидат основа за мировни преговори.

„Ни требаат вистински преговори, што значи дека можеме да започнеме таму каде што е сега линијата на фронтот“, рече Зеленски, додавајќи дека европските лидери го поддржуваат тоа.

Зеленски го повтори својот став дека е потребно да се воспостави примирје за потоа да се преговара за конечен договор.

Дипломатска офанзива со европските сојузници

„Важно е Вашингтон да биде со нас“, рече украинскиот лидер. На разговорите со Трамп во понеделник, тој ќе биде придружуван од неколку европски сојузници.

Украинскиот претседател отпатува во Брисел за да учествува на видеоконференција на „коалицијата на добронамерните“, која ги собира поддржувачите на Киев, вклучувајќи го францускиот претседател Емануел Макрон, британскиот премиер Кир Стармер и германскиот канцелар Фридрих Мерц. Потоа тој ќе отпатува за Вашингтон заедно со европските лидери за да се сретне со Доналд Трамп во Белата куќа.

„Не знам точно за што разговарале Путин и претседателот Трамп“ за време на нивниот самит во Алјаска, рече Зеленски. „И би сакал претседателот Трамп да сподели многу детали со мене и со европските лидери“, додава тој.

Безбедносни гаранции и руски барања

Она што „претседателот Трамп ни го кажа за безбедносните гаранции за мене е многу поважно од мислите на Путин. Бидејќи Путин нема да ни даде никакви безбедносни гаранции“.

Украинскиот лидер, исто така, рече дека Путин, има „многу барања“ за прекин на конфликтот во Украина, но дека „не ги знае сите“.

„Ако навистина има толку многу колку што слушнавме, тогаш ќе биде потребно време да се разгледаат сите“, рече тој.

Зборувајќи заедно со Володимир Зеленски, шефот на Европската комисија го поздрави предлогот на американскиот претседател Доналд Трамп да ѝ се понудат на Украина безбедносни гаранции слични на оние на НАТО.

Скопското Обвинителство донесе наредба за спроведување истражна постапка против 28-годишна жена осомничена за обид за убиство. Пред два дена, во домот на улицата Борис Бојаџиски во скопската населба Ѓорче Петров, таа се обидела да ја убие бабата на својот сопруг со која живееле во семејна заедница.

Додека бабата, родена 1938 година, одмарала во една од собите, осомничената ја заклучила вратата, седнала врз неа и со перница врз главата се обидела да ја задуши. Таа исто така ја удирала со тупаници по главата.

Според информациите од Обвинителството, престанала кога мислела дека ја убила и за тоа му кажала на сопругот. Тој веднаш повикал полиција.

Бабата била пренесена во болница, каде и биле констатирани нагмечување на главата и вилицата, како и хематоми.

До судот доставен е предлог за определување мерка притвор.

Русија би се откажала од помали делови од Украина, а Киев би препуштил поголеми делови од истокот на земјата  – тоа е рамката на мировниот предлог за кој на самитот на Алјаска разговарале рускиот претседател Владимир Путин и американскиот претседател Доналд Трамп, тврдат извори на Ројтерс запознаени со размислувањата на Москва.

Овој опис на средбата се појави еден ден откако Путин и Трамп се сретнаа во воена база на Алјаска, што беше прва средба на американски претседател и шефот на Кремљ од почетокот на војната во Украина.

Зеленски оди во Вашингтон

Украинскиот претседател Володимир Зеленски утре патува во Вашингтон за да разговара со Трамп за можно завршување на војната.

Трамп изјави дека на самитот не е постигнат прекинот на огнот на кој се надеваше, но во интервју за „Фокс њуз“ рече дека со Путин разговарале за пренос на територии и безбедносни гаранции за Украина, и дека „во голема мера се согласиле“.

„Мислам дека сме многу блиску до договор,“ рече Трамп, додавајќи: „Украина мора да се согласи. Можеби ќе каже ‘не’.“

Според два извора, понудата на Путин засега се темели на разговори меѓу европски, американски и украински лидери, но не е јасно дали станува збор за почетна позиција или за практично финална понуда. Трамп во саботата за својот разговор го информирал Зеленски и европските лидери.

Украинска територија за мир

Путинската визија за договор исклучува прекин на огнот пред постигнување севкупен договор, што е спротивно на барањето на Киев.

Според руската понуда, Украина целосно би се повлекла од Доњецк и Луганск, а за возврат Русија би се согласила да ги замрзне фронтовските линии во јужните региони Херсон и Запорожје, тврдат извори.

Киев претходно ја отфрли секоја идеја за повлекување од Доњецк, каде украинските сили се добро утврдени и каде градот служи како клучна одбранбена бариера.

Русија би вратила делови од Харков и Суми

Изворите тврдат дека Москва била подготвена да врати релативно мали делови територии што ги држи во северниот Суми и североисточниот Харков – вкупно околу 440 квадратни километри. За споредба, Украина контролира околу 6.600 квадратни километри од Донбас, кој ги опфаќа Доњецк и Луганск и кој Русија го смета за своја територија.

Путин би барал и барем формално признавање на руската власт врз Крим, кој го анектираше во 2014 година. Не е јасно дали тоа признавање би требало да дојде само од САД или и од сите западни земји и Украина.

Санкции, НАТО и безбедносни гаранции

Москва очекува укинување на барем дел од санкциите. Изворите не можеа да потврдат дали тоа се однесува на американските или европските мерки.

Путин би го блокирал влезот на Украина во НАТО, но бил отворен за идеја за безбедносни гаранции. Трамп во саботата на европските лидери им спомнал можност за „член 5 надвор од НАТО“ – некаква гаранција по моделот на правилото на НАТО дека напад врз една членка е напад врз сите.

Влезот во НАТО е стратешка цел на Украина, запишана и во уставот на земјата.

Јазик и Руската православна црква

Според изворите, Русија би барала и официјален статус на рускиот јазик во делови или во цела Украина, како и право Руската православна црква слободно да делува.

Украинската служба за безбедност ја обвини црквата поврзана со Москва дека помага на руската агресија преку ширење пропаганда и криење шпиони, што црквата го негира тврдејќи дека ги прекинала врските со Москва. Украина донесе закон за забрана на верски организации поврзани со Русија, но тој сè уште не стапил на сила.