Македонија
(Видео) Стоилковски: На Македонија не и треба уште една влада за криминал и без изборен легитимитет
Димитар Ковачевски денеска бесрамно ќе се обиде да претстави човек чиј што брат веројатно извршил крвна одмазда и е осомничен за убиство- за министер за правда! Замислете, Крешник Лога братот може да заврши во затвор за убиство, додека другиот Кренар Лога е министер за правда и ќе составува список за помилувања? Осомничен за убиство на Дилавер Бојку, познат на полицијата и на подземјето, заради крвна одмазда од претходни оружени можеби семејни средби! Ете Ковачевски денеска има прилика да застане во одбрана на егзекуција и крвна одмазда како правдољубие!, истакна портпаролот на ВМРО-ДПМНЕ, Наум Стоилковски.
Ковачевски, рече тој, денеска ќе мора да објасни и како во одбрана, заменик министер, поставува човек со иредентистички идеи, антидржавни идеи, којшто е повлечен од мисијата во НАТО, откако се појави фотографија од Брисел дека е во први редови на протест за создавање на ИЛИРИДА!
Според него, Ковачевски ќе мора да се потруди бидејќи Тирон Јајага во 2017 година го признава своето учество на протестите, своите убедувања, правдајќи се дека бил на протест за ИЛИРИДА, протест со територијални претензии кон Македонија, за поделба на државата, бил на протест со такви барања, ама вон работно време! А, работел како дипломат во македонската мисија во Брисел! И сега Ковачевски ќе го претставува за заменик за одбрана на членка на НАТО!
„Ковачевски денеска ќе мора да се потруди да го објасни решението за здравство – во услови кога луѓе умираат излажани за лекови, тој поставува целосен анонимус, конфликтна личност со сомнително образование! Потребно е само Ковачевски да ја приложи листата за присутност на работа за Фатмир Меџити – кога доаѓа кога заминува, дали воопшто седи на дежурства, за да сликата биде појасна за јавноста. Се работи за конфликтен лик којшто Таравари кога беше министер го сместува во ФЗОМ, а потоа тоне во заборав, до сега! Ковачевски поставува министер за здравство со единствена референца, кумашин и поттрчко на Таравари.
Ковачевски со сите сили ќе бара начин да ги сокрие тендерите од 4 милиони евра коишто семејството на Викторија Аврамовска-Мадиќ ги заработи од Град Скопје кога предложената за заменик министер беше секретар на Скопје? И како ќе прескокне дека за неа има поднесено кривична пријава до ОЈО? Како ќе ги прескокне и објасни прескапите пожарникарски скали од семејната фирма на Мадиќ?
Како Ковачевски ќе ја објасни Маја Манолева за заменичка за здравство која што на сила ДКСК мораше да ја натера да се откаже од приватната амбуланта додека била директор, па во врвот на Лекарската комора. Како ќе објасни дека не си препраќала пациенти за рехабилитација од јавниот завод во приватната установа за физикална медицина?“, праша Стоилковски.
Дали Ковачевски, додава тој, ќе ја претстави Каја Шукова од животна средина, како негова десна рака за издавање дозволи за фотоволтаици? „Дали е вистина дека Шукова определувала дали дозволата за бизнис со фотоволтаици ќе се добие брзо или ако не е во согласност со семејната, кумската фирма на Ковачевски, постојано нешто ќе фали во документацијата? Тоа ли е главната референца за Каја Шукова биде министер?
Што ќе каже Ковачевски за предложената заменичка во земјоделство Вјолца Бериша, која директно ги посочуваше СДС и ДУИ за смртта на пациентите во пожарот во модуларната болница? Дали ќе каже дека и ги простува прес конференциите со прстот посочен кон СДС, дали ќе ги нарече „лажна пропаганда“, или дека главната на унијата на партиските жени ја злоупотребила смртта на пациентите за политичко внимание? Или ќе ја посочи како лицемер?
Уште колку пари ќе треба да легнат на сметка на ДУИ од образование додека ученици немаат книги, свидетелства, документи, помагала, наставници се деградирани, испитите за директори поништени? Кое ќе му биде образложението на Ковачевски за предлогот Агим Нухиу да биде заменик министер за образование? Дали референца е успехот во правда или Јетон Шаќири не можел сам без заменик од ДУИ во ликот на Нухиу?“, дополнува портпаролот на ВМРО-ДПМНЕ.
Со кој образ, како што вели, сега Ковачевски ќе предлага а СДС ќе аплаудира за Азир Алиу за министер за администрација, кога истиот Алиу и неговото име го черечеа по медиуми како прв на листата на советници, како велеа прескапи советници на владата? Дали сега Ковачевски јавно ќе му се извини, дали ќе се извини на јавноста за јавните линчови со лаги за оцрнување на луѓе?
Стоилковски оценува дека Македонија нема да напредува ниту ќе се справи со тешката економска криза, ниту во Европска Унија се влегува со осомничени, со иредентисти, со кумашини, лукративни помошници во тендери. Ова, според него, не е листа на сојуз за Европа туку сојуз за порази и за грабеж на Македонија, исполнување на хирови и лични желби на сметка на народот и државата!
„На Македонија не и треба уште една влада без изборен легитимитет, туку брзи предвремени избори!“, нагласи Стоилковски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Орбан доаѓа во Охрид, в четврток и петок привремено ќе бидат затворени неколку улици
Со цел безбедно и непречено одвивање на предвидените активности, по повод претстојната посета на унгарскиот премиер Виктор Орбан и неговата делегација на Охрид, Секторот за внатрешни работи Охрид ги презема сите неопходни безбедносни мерки и активности.
Полициската станица за безбедност во патниот сообраќај ги известува сопствениците на патнички и други моторни возила дека е потребно да ги дислоцираат возилата од паркинг местата на булеварот „Туристичка“ и улиците „Коста Абраш“, „Цар Самоил“ и кеј „Македонија“. На 26 и 27.09.2024 година (четврток и петок), на улиците „Илинденска“ и „Коста Абраш“ ќе биде забрането запирање и паркирање на патнички и други моторни возила, а во тек на движење на возилата во состав на делегациите, привремено за сообраќај ќе биде затворен дел од магистралниот пат Кичево-Охрид, од аеродромот до клучката кај „Распаќе“, булеварите „Туристичка“ и „Македонски просветители“, улиците „Абас Емин“ и „Кирил и Методиј“ како и регионалниот пат Охрид-Св.Наум. На 27.09.2024 година, безбедносните мерки во сообраќајот ќе бидат преземани и на подрачјето на Пештани и Љубаништа, известува СВР Охрид.
Од СВР Охрид апелираат до граѓаните, да ги почитуваат насоките на полициските службеници кои, на овие сообраќајници, ќе вршат физичко регулирање на сообраќајот.
Македонија
Дурмиши-Бартон: Има цврста основа за зголемување на соработката помеѓу Северна Македонија и Обединетото Кралство
Министерот за економија и труд Бесар Дурмиши во рамки на Берлинскиот процес оствари средба со Крис Бартон, Комесар за трговија на Неговото Величество Кралот Чарлс Трети.
На средбата беше оценето дека одличните политички односи помеѓу Обединетото Кралство и Северна Македонија претставуваат цврста основа за понатамошно продлабочување на економската соработка помеѓу двете земји, како и за градење на нови деловни релации помеѓу бизнис заедниците помеѓу двете земји.
Дурмиши го информираше Комесарот Бартон за економските приоритети на Влада, притоа истакнувајќи дека истите може да бидат искористени за создавање на нови можности за понатамошно унапредување и развој на традиционално добрата економска соработка помеѓу двете земји.
Дурмиши на средбата потенцираше дека Обединетото Кралство е еден од нашите најзначајни трговски партнери и се наоѓа на 2-то место од земјите со кои Северна Македонија остварува најголем обем на трговска размена и која
бележи контунуиран раст.
„Радува податокот дека за 10 години вкупните странски инвестициите од Обединето Кралство во Република Северна Македонија изнесуваат износ од 508,8 милиони евра, што ја прави Обединето Кралство земја која е еден од најголемите инвеститори. За нас како министерство за економија и труд во чија надлежност се условите за работа на странските инвеститори од голема важност е да работиме на подобрување на деловната клима, се со цел да имаме повеќе инвестиции кои ќе значат поголема вработеност и поголем економски раст“ кажа Дурмиши.
Се заблагодари на поддршката која што континуирано ја добива Северна Македонија од владата на Обединтетото Кралство пред се преку поддршка во реформите и во развојниот процес на патот кон полноправно членство во ЕУ.
Македонија
Во недела во Парк – деветта традиционална манифестација за поддршка на лицата со Вилсонова болест
Под слоганот „Подај рака“, во недела (29.09.2024) на летната сцена „Лепеза“ во Градскиот парк во Скопје со почеток во 10.30 часот ќе се одржи деветтиот по ред хуманитарен хепенинг за поддршка на лицата заболени од ретката болест Вилсон, под слоганот „Подај рака“. Целта на настанот е подигнување на јавната свест за ретките болести вклучувајќи ја и Вилсон, и поддршка на заболените, но и нивните семејства во справувањето со предизвиците со кои се соочуваат. Организаторите на оваа манифестација Здружението на граѓани за поддршка на лица со ретка болест – Вилсон, веќе 9 години по ред на овој начин се трудат да едуцираат и информираат дека кога станува збор за оваа ретка болест, навременото откривање и редовната терапија се клучни.
Настанот, како и секоја година, ќе биде богат со веќе традиционалните трки: штафетна, детска трка, и трка за миленици, придружени со одлична музика и настап на домашни изведувачи, дружба и изненадувања за сите
учесници.
Од основањето на здружението Вилсон во 2015 година до денес, главен поддржувач на традиционалната штафетна трка, е општествено одговорната компанијата ОКТА. Од Здружението ја потенцираат важноста на оваа поддршка, велејќи дека „без неа, пациентите со Вилсон би останале невидливи за општеството“. Покрај редовната поддршка на активностите на ова здружение, ОКТА ги охрабрува и своите вработени да бидат дел од овој настан, и со тоа колективно да помогнат во подигнување на јавната свест за постоењето на оваа ретка болест.
Здружението Вилсон искажува огромна благодарност до сите учесници и донатори со чија помош низ годините успеа да спроведе едукативни активности кои допреа до повеќе од 100 медицински професионалци. Беше организирана првата регионална конференција за Вилсонова болест, наменета за пациенти и лекари од Македонија, Србија и Бугарија. Воспоставена е соработка со светски експерти за Вилсонова болест и со сите релевантни домашни институции. Подобрени се условите за дијагностика и следење на болеста, обезбедени се услови за неопходни лабораториски испитувања кои за жал сеуште не се достапни во државата.Обезбедена е директна и континуирана поддршка за семејствата кои се соочуваат со Вилсоновата болест.
Детални информации за настанот како и пријавувањето за оваа хуманитарна трка се достапни на следниот линк https://www.smartrace.club/
Болеста Вилсон предизвикува нарушување во метаболизмот што доведува до таложење на бакар во црниот дроб, мозокот и очите, процес кој се одвива постепено, со години, пред појавата на првите симптоми.
Натрупувањето на бакар во централниот нервен систем може да доведе до проблеми со говорот и голтањето, потешкотии во координацијата, тремор, неконтролирани движења, мускулна вкочанетост, промени во однесувањето. Сепак, Вилсоновата болест може успешно да се лекува. При навремено откривање на болеста и редовна (доживотна) терапија, пациентите со Вилсонова болест можат да имаат нормален живот, со минимални диететски рестрикци.
ПР