Очекувам убави денови и тоа е нашата порака дека ќе градиме онаму каде што овие пред нас оставија неуспешни проекти и паметници на едно лошо корумпирано време, порача премиерот Христијан Мицкоски на првиот работен ден.

Одговорајќи на новинарски прашања по посетата на Штип, Мицкоски денеска информира дека првата владина седница ќе се одржи кон крајот на неделата. Донесени ќе бидат, како што рече, неколку одлуки, од кои повеќето формални. Тој најави и дека ќе се почне со работа на новото законско решение за линеарно зголемување на пензиите.

Како што истакна, очекува во првата година линеарно зголемување на пензиите за секој пензионер од 5.000 денари.

„Нема да ни се случува голобради момчиња да купуваат трговски центри во главниот град, нема да ни се случуваат ‘ролс ројс’ и ‘мајбах’ возила, нема да има фудбалчиња во кабинети, нема да имаме неуспшени проекти во делот на производството на марихуаната, туку ќе го работиме она што го дадовме како збор пред нашите граѓани“, порача Мицкоски.

Истакна дека нема да има дуализми, ниту функционери што ќе живеат од парите на граѓаните.

„Че има намалување на институциите, ќе бидеме тоа што го ветивме. Тоа што граѓаните го направија е доволно, сега татковината треба да направи за нив. „Граѓаните, пред сѐ“, ќе бидете мотото на нашата Влада, порача Мицкоски.

Соопшти и дека утре или задутре ќе има состанок со министерот за социјална политика, демографија и млади, Фатмир Лимани, и со министерката за финансии, Гордана Димитриевска-Кочовска, во врска со законот за покачувањето на пензиите.

Собранието, во соработка со УНХЦР, го одбележа Светскиот ден на бегалците – 20 Јуни, со пригоден настан што го отвори претседателот на Собранието на Република Северна Македонија, Африм Гаши.

Во своето воведно обраќање Гаши истакна дека оваа година се одбележуваат 30 години од ратификацијата на Конвенцијата за статусот на бегалците на Обединетите нации, но и цели три децении од формирањето на Канцеларијата на високиот комесар за правата на бегалците во нашата држава.

Во таа насока Гаши истакна дека законодавниот дом секогаш ќе биде отворен и ќе има позитивен пристап за сите иницијативи што значат унапредување на човековите права и подобрување на условите за живеење, но и на можностите за развој на сите оние што поради одредени причини се нашле во таква незавидна ситуација, да бидат луѓе без дом, без огниште, далеку од сопствената татковина.

„Особено се гордеам што државата покажува голема емпатија“, рече тој.

Според Гаши, демократскиот свет има обврска да не дозволи бегалците, бегајќи од суровоста на војната, суровоста на конфликтите, на меѓуетничката, верска или каква било друга форма на нетрпеливост, да го изгубат достоинството, да ги изгубат основните човекови права, како што се образованието, здравствената заштита, социјалната сигурност.

Претседателот на Собранието нагласи дека во изминатиот период, благодарение на интензивната соработка на Собранието со УНХЦР, преку измените на Законот за матичната евиденција и Законот за странците и нивна практична имплементација, се реши ситуацијата со лицата без државјанство, со што се надмина проблемот за над 700 граѓани.

Претставникот на УНХЦР во Република Северна Македонија, Габриел Гуалано де Годој, ја пофали работата на Собранието, но и на државните институции во целина за надминување на проблемот за лиицата без државјанство, но упати и посебна благодарност за пристапот на земјата кон бегалците од Украина. Потоа следуваше дискусија на тема „Навигација низ законодавните предизвици и перспективи: Улогата на парламентот во градењето стратегии за ефикасни системи за азил и засилена поддршка барателите на азил и бегалците“, на која учествуваа пратеници од Собранието на Република Северна Македонија.

Досегашната министерка Каја Шукова му ја предаде должноста на новименуваниот министер за животна средина и просторно планирање, Изет Меџити.

Шукова го информира Меџити за тековните процеси и актуелните предизвици во животнтата средина и му посака успех во извршувањето на функцијата.

Министерот Меџити најави дека во иднина Министерството за животна средина и просторно планирање ќе предлага и спроведува политики за подобрување на животната средина, како и квалитетот на животот на граѓаните, како апсолутен приоритет и дека во овој предизвик Владата ќе биде заедно со граѓаните и граѓанскиот сектор за секоја иницијатива што како цел го има општото добро.