Во полицијата е пријавен напад врз 12-годишно дете што се случил на 11 ноември, околу 15:50 часот, во скопската општина Центар.

Според пријавата поднесена од Г.М. (39) од Скопје, неговиот син бил физички нападнат од лицето Б.Љ., кое по нападот со остар предмет му нанело расекотина и му го оштетило велосипедот.

Детето било веднаш пренесено во Комплексот клиники „Мајка Тереза“, каде што му била укажана лекарска помош.

Полицијата презема мерки за целосно расчистување на случајот и утврдување на мотивите за нападот.

Во текот на 11 ноември, полициски службеници од СВР Тетово, во соработка со Центарот за социјални работи, спровеле акција за сузбивање на питачењето на подрачјето на градот.

Акцијата се одвивала од 11 до 16 часот, а при контролите биле затекнати две жени кои питачеле на јавни места.

Околу 12:20 часот, на кружниот тек кај улиците „Маршал Тито“ и „Илинденска“ била затекната Н.Ф. (42) од Тетово, додека нешто подоцна, околу 12:50 часот, на улицата „Илинденска“ полицијата ја затекнала М.Д. (19) од Кочани, која питачела заедно со своите две малолетни деца, на возраст од четири и една година.

Жените и децата биле преземени од Центарот за социјални работи Тетово за понатамошна постапка, а против нив ќе бидат поднесени соодветни пријави.

Попладнето на 11 ноември во Битола се случила сообраќајна несреќа кај спојот на улиците „4 Ноември“, „Влатко Миленковски“ и „Димитар Илиевски–Мурато“.

Во несреќата учествувале товарно возило „Фолксваген“ со битолски таблички, управувано од 20-годишен возач од Битола, и електричен тротинет „Шаоми“, со кој управувала дваесетгодишна девојка од Прилеп.

Од ударот, младата возачка на тротинетот се здобила со тешки телесни повреди и веднаш била пренесена во Клиничката болница во Битола, каде што ѝ е укажана лекарска помош.

Екипа на СВР Битола извршила увид на местото на несреќата и се работи на утврдување на причините поради кои дошло до судирот.