Црна хроника
Скопјанец крадел од шипки и армстура до алати и апарати – обвинител бара притвор за да не избега

Дваесет и тригодишен скопјанец крадел по објекти градежни машини и алати, па ги препродавал.
Основното јавно обвинителство Скопје поведе постапка против 23-годишен скопјанец за кого постои основано сомнение дека сторил две кривични дела – Тешка кражба од член 236 став 1 точка 1 од Кривичниот законик.
Осомничениот, на приватен плац во населбата Радишани, насилно со обивање влегол во заклучен објект заграден со мрежа и одзел мешалка за бетон, приколки, градежни колички, алати, апарати и други предмети, стекнувајќи се со противправна имотна корист од околу 60.000 денари и предизвикувајќи дополнителна штета на имотот од околу 5.000 денари. Одземените предмети на 20 март ги продал на фирма за откуп на отпад.
На 9 април осомничениот извршил уште една тешка кражба токму во отпадот во кој ги продал одземените предмети. Влегол преку заштитната ограда и од кругот на отпадот одзел околу 200 килограми арматура во шипки со различна должина и други предмети, со што се стекнал со противправна имотна корист од околу 40.000 денари. Потоа веднаш го напуштил местото, но кражбата била регистрирана од безбедносните камери поставени на објектот.
Со оглед на тоа што се работи за лице кое и претходно неколку пати е осудувано за кражби и тешки кражби, надлежниот јавен обвинител оцени дека постои опасност од бегство и дека има потреба да се обезбеди неговото присуство во текот на постапката, па до Основниот кривичен суд Скопје достави предлог за определување мерка притвор за осомничениот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Црна хроника
Предизвикал пожар: уапсен охриѓанец

Вчера во 15:00 часот, полициски службеници од СВР Охрид го лишиле од слобода З.Н.(41) од Охрид, кој се сомничи дека во атар на селото Горно Лакочереј, охридско, предизвикал пожар на поле со нискостеблеста вегетација и ожнеана нива.
При преземени мерки и извршен преглед, полициските службеници кај него, пронашле запалка која била одземена за натамошна постапка.
По целосно документирање на настанот, против него ќе биде поднесена соодветна пријава, соопшти полицијата.
Црна хроника
Тројца насилници со боксови нападнале полицајци во Скопје

Тројца насилници со боксови нападнале полицајци во Скопје кои извршувале службени работи по дојава дека има вооружени лица со автоматски пушки.
Според информациите од Обвинителството, тројцата напаѓачи, заедно со уште едно дете против кое ќе се води соодветна постапка согласно Законот за правда за децата, на 5 август во вечерните часови, на улицата “Босна и Херцеговина” нападнале тројца полициски службеници.
Полицајците постапувале по дојава дека на наведената локација има вооружени лица со автоматски пушки. Се обиделе да ги легитимираат осомничените, но тие одбиле и физички ги нападнале полицајците, удирајќи ги со боксови. Полициските службеници успеале да ги совладаат и ги привеле.
Јавниот обвинител, ценејќи ги сите околности, предложи на осомничените да им бидат определени мерки на претпазливост – забрана за напуштање на живеалиштето, односно престојувалиштето, обврска да се јавуваат повремено на определено службено лице или кај надлежен државен орган и привремено одземање на патна или друга исправа за преминување на државната граница, односно забрана за нејзино издавање.
Црна хроника
Тешко повреден велосипедист во Струшко

Вчера во 10:40 часот, на регионалниот пат Р2243 во селото Биџево, струшко, се случила сообраќајна несреќа помеѓу мотоцикл „јамаха“ со германски национални ознаки, управуван од И.М.(38) од с.Мислодежда, струшко и велосипед управуван од Р.Т.(79) од с.Биџево, струшко.
Во несреќата со тешки телесни повреди се здобил велосипедистот, констатирани во Специјалната болница „Св.Еразмо“ Охрид.
Извршен бил увид од увидна екипа на ОВР Струга.