Македонија
(Видео) Ковачевски по лидерската: ВМРО-ДПМНЕ не е против уставните измени, тоа е клучната порака од средбата
Премиерот Димитар Ковачевски, по лидерската средба со претседателот на ВМРО-ДПМНЕ, Христијан Мицкоски, укажа дека опозициската партија не е против уставните промени. Ковачевски тврди дека тоа е пораката од средбата со Мицкоски. Зборуваше за уставните измени за кои рече дека не се однесуваат на идентитетски прашања, туку на заштита на идентитетите на другите народи.
„Ставот на потпретседателот на ВМРО-ДПМНЕ пред нивното партиско седиште е променет и се разликува од тоа што јас го слушнав на средбата и од она што вие го слушнавте на прес-конференцијата, а тоа е дека ВМРО-ДПМНЕ не е против уставните измени во државата. Тоа е заеднички заклучок и клучна порака од средбата што ја имавме денеска. Ваквите одлуки се на сите политички партии, целото општество, а ова не е процес на еден човек, една партија, една влада“, рече Ковачевски.
Зборуваше и за придобивките од уставните измени, како и пораките од меѓународниот фактор.
„На состанокот се направи јасна дистинкција – дали ќе ја интегрираме државата во ЕУ или ќе ја оставиме изолирана. Сметам дека е добро дијалогот што се води да продолжи, а да изградиме став дека за државата е најважно да ја интегрираме државата во ЕУ. Моја лична цел и заложба е овој процес на евроинтеграции да биде успешен. Ги имаме предвид стратешките цели на државата. Ова е стратешка цел на нашите земји партнери, како во ЕУ и НАТО така и на нашиот најголем стратешки партнер – САД. Уставните измени, вклучување други делови од народи во преамбулата, се чекор напред на овој европски пат. На таков начин, со таков глас, станавме и земја членка на НАТО. Сите се гордееме и ги чувствуваме бенефитите“, додаде тој.
Зборуваше дека идентитетот на Македонија е заштитен и дека со уставните измени не е доведен во прашање.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Промена на времето: УХМР за утре најавува дожд, силен ветер и драстичен пад на температурите
Управата за хидрометеоролошки работи најавува значителна промена на времето утре – дожд, засилен ветер и пад на температурата.
Утре под влијание на влажна и постудена воздушна маса од север ќе настапи позначителна промена на времето. Од утринските часови најпрвин во северните делови, ќе има повремени врнежи од дожд и локална појава на грмежи. Ќе дува силен ветер (наместа над 70км/ч.) кој ќе продолжи и во понеделник.
ИЗВОР: УХМР
Дневната температура значително ќе се намали (утре за 6 до 8, а во понеделник уште за дополнителни 4 до 6 степени). Потоа во следните два дена времето ќе биде сончево со ниски утрински температури, а дневните ќе бидат во пораст.
Во Скопје, утре ќе има повремени врнежи од дожд, локално со појава на ретки грмежи и силен ветер.
Од четврток се очекуваат нови врнежи од дожд.
Македонија
Претседателката Сиљановска Давкова се сретна со генералниот секретар на Советот на Европа, Алан Берсе
Претседателката Гордана Сиљановска Давкова во рамки учеството на 79. Генерално Собрание на Обединетите Нации во Њујорк, оствари средба со генералниот секретар на Советот на Европа, Алан Берсе.
На средбата беа разменети мислења за целите и приоритетите насочени кон демократизацијата на македонското општество, човековите права и владеењето на правото. Реафирмирајќи ја посветеноста за натамошна конструктивна соработка со Советот на Европа, претседателката Сиљановска Давкова изрази задоволство од континураната поддршка за нашето целосно усогласување со европските стандарди и вредности.
Претседателката Сиљановска Давкова ја нагласи важноста од кредибилно постапување на Европската Унија во однос на интеграцијата на земјите од Западен Балкан кога напредокот на поединечните кандидати е евидентно заслужен. Таа се осврна и на неопходното обезбедување усогласеност со обврските што земјите-членки ги презеле, вклучително и правилното спроведување на пресудите на Судот во Стразбур.
Соговорниците разговараа и за актуелните безбедносни состојби во Европа, со акцент на војната во Украина, како и за потребата од посветеност и заеднички пристап кон сегашните и идните предизвици какви што се влијанието на новите технологии и климатските промени врз човечките ресурси.
На средбата претседателката Сиљановска Давкова упати честитки до новоизбраниот генерален секретар на Советот на Европа, Алан Берсе, изразувајќи искрени желби за успешно исполнување на важната мисија и продолжување на плодната соработка со македонските институции.
Македонија
(Видео) Битиќи: Над 75% од граѓаните се за членство во ЕУ, власта да каже која е алтернативата
Во сите анкети над 75% од граѓаните велат дека се за членство во ЕУ. Политичарите имаат обврска да носат одлуки, за да одговорат на нивното очекување. Владата треба да каже кој е нивниот план. Очигледно гледаме сценарио во кое за жал продолжува стариот манипулативен приод на оваа гарнитура, да изманипулираме што можеме за избори а после кога ќе ја добиеме власта ништо од тоа не важи, рече пратеникот на СДСМ, Фатмир Битиќи во одговор на новинарско прашање.
На власта беше да ги подобри условите како што ветуваше, додаде тој.
-И сегашната партија ВМРО-ДПМНЕ нема добиено повеќе од 25% од вкупниот број граѓани на изборите Легитимитетот на изборите не мора да значи дека се носат добри одлуки. Но и да прифатиме дека е тоа така, нивно беше да ги сменат условите. Да го сменат и Францускиот предлог, да ја сменат и преговарачката рамка, и да го вратат името. Очигледно гледаме сценарио во кое за жал продолжува стариот манипулативен приод на оваа гарнитура, да изманипулираме што можеме за избори а после кога ќе ја добиеме власта ништо од тоа не важи, додаде Битиќи.
Која е алтернативата? Власта треба да каже како понатаму после одвојувањето на европскиот пат, рече Битиќи.
-Наредната недела изминуваат 100-те дена и убаво на следните пратенички прашања Владата да дојде со план каде ќе се движи Македонија во наредните години, кога е очигледно одвојувањето на европскиот пат од другите земји.