Свет
Жените ќе бидат мнозинство во новата холандска влада
Кога Мариел Пол ќе положи заклетва како министер за основно и средно образование, холандската влада првпат ќе има повеќе жени од мажи. Ова ќе ја смести Холандија во мала група земји, каде што жените сочинуваат поголем дел од владата, пишува „НЛ тајмс“.
„Секогаш постои ризик ваквата речиси еднаква распределба меѓу мажите и жените да не потрае. Но, тоа сега не се случува“, вели Девика Партиман од организацијата „Гласајте за жена“.
Од групата Women INC велат дека одлуката да има повеќе женски членови во владата ќе има два ефекта.
„Пред сѐ, тие се пример за другите. Девојките и младите жени би можеле да мислат дека и тие би можеле да се занимаваат со тоа. Второ, жените како членови на владата почесто носат одлуки што промовираат родова еднаквост“, објави оваа група.
И покрај достигнувањата на ниво на централна влада, жените сѐ уште се недоволно застапени на другите нивоа на холандската политика.
Околу 35 отсто од членовите на градскиот совет се жени, а по изборите за Покраинскиот совет, тоа тело сега има најмал број женски заменици во последните 12 години. Покраинските влади во Зеланд и Флеволанд се составени исклучиво од мажи.
Според податоците на Обединетите нации, во просек помалку од една четвртина од владините министри во светот се жени.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Досега 360.000 Палестинци побегнале од Рафах, објави Агенцијата на Обединетите нации
Околу 360.000 жители на Појасот Газа го напуштија градот Рафах во јужниот дел на палестинската енклава откако Израел нареди евакуација на дел од градот минатата недела, објави Агенцијата на Обединетите нации за помош и работа за Палестинците во Газа (UNRWA).
Во исто време, Министерството за здравство во Газа, кое го води Хамас, изјави дека здравствениот систем е во опасност од колапс „во рок од неколку часа“, откако борбите ја блокираа испораката на гориво преку клучните премини, пишува „Тајмс оф Израел“.
„Ние сме на само неколку часа од колапсот на здравствениот систем во Појасот Газа поради недостигот на потребното гориво за работа со генератори во болниците, амбулантите и за транспорт на персоналот“, се вели во соопштението на Министерството.
Израелските одбранбени сили (ИДФ) минатиот понеделник започнаа со евакуација на Палестинците од источната периферија на Рафах, пред израелските сили да влезат во областа.
Агенцијата на Обединетите нации за помош и работа за Палестинците во Газа (UNRWA) соопшти дека околу 300.000 луѓе биле погодени од наредбите за евакуација во Рафах и Џабалија, но дека бројките веројатно би можеле да бидат поголеми бидејќи станува збор за густо населени области. Околу милион Палестинци, кои избегаа од конфликтот во другите делови на енклавата, најдоа засолниште во Рафах.
Регион
Вулин: Голема Албанија може да ја спречат само Србите и српскиот свет, но и Грците
Вицепремиерот на Република Србија, Александар Вулин, реагира на собирот на албанската имиграција одржан во Атина, на која говореше албанскиот премиер Еди Рама и покрај противењето на грчките власти, пренесуваат српските медиуми.
„Следниот пат кога владата на Грција ќе размислува за признавање на таканареченото Косово, нека се сетат како изгледа пречекот на Еди Рама среде Атина“, напиша Вулин.
Според него, она што Рама не можеше да го доживее во Тирана – го доживеа во Атина.
„Признавањето на таканареченото Косово од грчките власти, а исто така и приемот на Приштина во Советот на Европа, би бил немерлив придонес на владата на Грција и Дора Бакојани за создавање голема Албанија. Само Србите и српскиот свет може да ја запрат голема Албанија, но и Грците, драги наши Грци, мислете на тоа“, рече Вулин.
Свет
„Ројтерс“: Украински дрон предизвика пожари на руската енергетска инфраструктура
Украински дрон предизвика пожари во магацини за нафта и далноводи во регионите Белгород и Липецк во Русија.
Во нападот е оштетена рафинеријата „Осколнефтстаб“ во близина на градот Стари Оскол во Белгородската област, како и далноводот „Лелецкаја“ во областа Липецк, објави „Ројтерс“ повикувајќи се на неименуван извор од украинската безбедност.
„Индустријата што ѝ служи на Русија да води војна против Украина останува наша легитимна цел. Мерките за поткопување на воениот потенцијал на непријателот ќе продолжат“, рече изворот.