Актуелниот потпретседател на Беса и внук на Али Ахмети, Фатмир Лимани, отфрла секаква поврзаност со лицето Бекир Лимани, чие пак име деновиве во јавноста е познато по запаленото возило и врската со Артан Груби од ДУИ. Лимани за „Макфакс“ вели дека неговиот покоен татко се викал Бекир Лимани, а сега има и внук под тоа име и презиме, но лицето за кое се зборува во јавноста е сосема друго и тој е од Скопје.

Според потпретседателот на Беса, тоа лице е тесно поврзано со ДУИ и како што вели и Груби, и од неговата партија намерно се обидуваат целиот имот да го препишат на трети лица.

„Се замозапалуваат за да станат достапни за јавноста бидејќи им се потрошиле лагите и немаат со што да излезат во јавноста. Коридорот 8, остана само на 3 и 5Д. Зелената агенда остана само во нивните зелени умови. Премиер Албанец само на хатртија и само на сон. Сега им останало да си ги самозапалат нивните канцеларии (Канцеларијата на огранокот во Кичево); Запалување на архивата во Пошта ( на времето на Рафиз Алити за да му се изгуби трагата на криминалот); Запалување на архивата во кумановскиот суд ( поради губење на траги); Запалување на „ауди“ поради губење на траги и привлекување на внимание“, вели Фатмир Лимани за „Макфакс“.

И сето ова, како што појаснува, бидејќи и Груби и Ахмети и ДУИ, ја губат нивната атрактивност и сакаат да привлечат внимание по доминацијата на опозицијата и најавата за соединување на опозицискиот фронт.

„Самозапалениот Груби и ДУИ ќе се обидуваат да привлечат внимание и да се спасат од „подземните“ зделки каде што пуштиле раце и тоа со удели во лотаријата, казината…Ќе дојде ‘бел ден’ кога ќе ги платат солзите на мајките за нивните убиени синови во Скопје, Косово и Грција, ќе ги платат сите и Ахмети и Груби и се така по ред“, додава Лимани за „Макфакс“.

Потенцира уште еднаш дека неговиот внук Бекир Лимани не е истиот за кој се зборува во јавноста, и дека неговиот внук, како што вели, живее во Кичево.

„Ние не се занимаваме со палење на возила и слично. Ама ако им изгореле, душа и срце… нека му ја мислат. Тие треба да одговараат за криминал и затајување на данок. За истото дело ќе треба да се обратите во Обвинителство и тие да докажат како може „ауди“ за заменик премиер да се води на друго име“, дециден е Фатмир Лимани во разговорот за „Макфакс“.

Лимани и претходно јавно ги критикуваше членовите на ДУИ дека ја користат позицијата за големо богатење а набргу потоа во јавноста беше објавена веста дека е запален автомобил на Артан Груби додека од надлежните имаше информација дека сопственик на автомобилот е лице со иницијални Б. Л.

Во врска со овој случај во јавноста беше споменувана и фирмата „Еуро ком лајтинг“ чиј единствен сопственик бил Беким Лимани и дека запаленото возило е на оваа фирма.

Во петокот доцна вечерта беше запален автомобил пред зградата во која живее вицепремиерот Груби и тој на социјалните мрежи во саботата на сите соседи им се извини за непријатностите на кои биле изложени. Груби на социјалните мрежи напиша дека автомобилот не е негов туку на негов соссед и им се извини и на пријателот и на неговото семејство за направената штета со палењето на автомобилот.

Вицепремиерот за економски прашања Фатмир Битиќи пак денеска не сакаше да го коментира случајот. Рече дека надлежните го разгледуваат истиот.