Македонија
Мицкоски: ВМРО-ДПМНЕ ја води раководството, лажната пропаганда на СДСМ се распрсна како меур од сапуница
![](https://makfax.com.mk/wp-content/uploads/2023/08/mickoski3-31082023.jpg)
ВМРО-ДПМНЕ ја води раководството на партијата заедно со структурите во партијата, членовите и активистите. ВМРО-ДПМНЕ е партија од народот, својот легитимитет го црпи од народот, а не коленичејќи на црвени дебели персиски ќилими низ светот, туку заедно со народот како што беше и денеска и ВМРО-ДПМНЕ врз основа на тој легитимитет за неколку месеци од денеска ќе ја формира новата влада, вака претседателот на ВМРО-ДПМНЕ, Христијан Мицкоски за време на денешната посета на Општина Новаци, одговори на новинарско прашање околу пропагандата која ја води СДСМ дека друг ја води ВМРО-ДПМНЕ.
Тој исто така истакна дека тоа беше лажна кампања на СДСМ скоро половина деценија, но се распрсна како меур од сапуница.
„Тоа беше лажна кампања скоро половина деценија на оние кои се мајстори за лажни вести, а тоа е СДСМ, која што се распрсна како меур од сапуница и нивната петарда сега пукна во нивната рака и сега се немоќни како да се справат со тоа. Претпоставувам ќе измислат нешто, но она кое што можам да им го посакам е да извлечат поука од овие нивни погрешни политики изминатава повеќе од пола деценија, во опозиција да се реструктурираат, вистинските патриоти во СДСМ да дојдат на вистинските места и повторно да се борат за Македонија, бидејќи сепак СДСМ е политичка партија која што е стожерна партија, барем во деведесеттите години, иако во последните години го изгуби тој епитет. Ценам дека ова за нив ќе биде едно добро и непроценливо искуство коешто ќе можат долги години во опозиција да го користат за да се реструктурираат за да еден ден можеби бидат посериозен кандидат за да бидат коалиционен партнер во некоја идна влада“, потенцираше Мицкоски.
За тоа дали измените на КЗ може да бидат карта за уставните измени, Мицкоски истакна дека ниту имал, ниту ќе има тајни средби на кои би се договарало нешто коешто може да биде на штета на Македонија, како што тоа го правел некој во минатото.
„Слушнавте од Али Ахмети кој е тој кој што имал тајни средби и кои се тие кои што имале тајни средби. Слушате од меѓународни медиуми, кредибилни извори, кои се тие што ја делеле и парчеле Македонија, но истовремено ја уривале правдата и чувството за правдина на Македонија. Додека јас сум претседател на ВМРО-ДПМНЕ, никогаш немам намера зад завесата да договарам и да преговарам ништо што ќе може да биде штета на македонскиот идентитет, на македонските граѓани и на Македонија како држава. Сè што бараме како политичка партија го кажувам јасно и гласно и го кажувам јавно“, истакна Мицкоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Македонија
Љутков од Велес: Фолклорот нè идентификува и нè поврзува со светот
![](https://makfax.com.mk/wp-content/uploads/2024/07/ИФФ-Велес-2024-2.jpg)
Во Младинскиот парк во Велес, вчеравечер свечено беше отворено 19. издание на Интернационалниот фолклорен фестивал „Велес 2024“.
Во присуство на многубројни гости, Фестивалот за отворен го прогласи министерот Зоран Љутков, кој изрази задоволство што низ годините овој фестивал прерасна во вистински репрезент на фолклорната традиција на народите од повеќе држави во светот, потенцирајќи дека Министерството за култура и туризам останува отворено за поддршка на сите проекти што ја афирмираат културната традиција и посебноста на сите чинители.
– Нема ништо поубаво од тоа од генерација на генерација да се пренесува сето она културно наследство што нè идентификува, што нè прави посебни и препознатливи во европскиот, но и во светскиот културен мозаик. Секоја држава, секоја култура е посебна токму поради шаренилото на културните вредности што имаме обврска да ги чуваме, да ги негуваме и да ги пренесеме на идните генерации – рече Љутков.
Преку настапите на младите уметници, како што рече министерот за култура и туризам, ќе се запознаеме со убавината на фолклорната традиција, музиката, песната и сето она што е обележје на земјите од кои доаѓаат, збогатувајќи го на тој начин културното живеење во Велес.
Честитајќи им на организаторите за посветеноста во реализацијата на Фестивалот, Љутков им посака убав престој во Македонија и во Велес на учесниците, а на посетителите незаборавни мигови со музиката и ората од земјите учеснички.
Љутков изрази уверување дека Меѓународниот фолклорен фестивал „Велес 2024“ и во иднина ќе биде настан на радост и среќа каде што ќе се создаваат спомени кои ќе останат траен запис во историјата на манифестацијата.
Македонија
Средба на претседателот Гаши со посебниот советник за Западен Балкан: Влезот на Западен Балкан во ЕУ треба да се случи што поскоро
![](https://makfax.com.mk/wp-content/uploads/2024/07/gashi-frangesh1.jpg)
Претседателот на Собранието, Африм Гаши, оствари средба со посебниот советник за Западен Балкан, Анжеј Франгеш.
Гаши изрази благодарност за заложбите на Словенија да назначи специјален претставник за Западен Балкан, со што ја потврдува својата посветеност на европската перспектива на земјите од Регионот, вклучително и нашата земја.
Словенија е искрена, пријателска земја, силен поддржувач на евроинтеграциите. Особено се ценат нејзините заложби за одржување на прашањето за проширувањето високо на агендата на Европската Унија.
Влезот на Западен Балкан во ЕУ треба да се случи што поскоро, затоа што и Балканците се Европејци и тоа е во корист не само на овие земји, туку и на самата Унија.
Во таа насока, прашањето за уставните измени како пречка за влез во големото европско семејство треба да се реши што поскоро, а реформскиот процес да продолжи. Помошта и поддршката од посебниот советник Франгеш е добредојдена како одличен познавач на Регионот.
Франгеш на претседателот Гаши му посака успешна работа во новиот мандат, истакнувајќи дека парламентарната демократија е многу важна.
Соговорниците оставија отворена врата за соработка, со почести средби и поактивна улога во наредниот период.
Македонија
Левица: Државата нема средства за младите што ја претставуваат Македонија на меѓународни научни олимпијади
![](https://makfax.com.mk/wp-content/uploads/2024/07/FB_IMG_1720076660923.jpg)
Години наназад, вклучително и оваа, средношколците кои се дел од тимовите што ја претставуваат Македонија на научни олимпијади ширум светот каде што го веат македонското знаме и од каде што донесуваат бројни признанија и медали, мака мачат да најдат средства за воопшто да стигнат на тие натпревари, велат од Левица.
„Наместо последните седмици пред натпреварувањата да ги вложат за што подобро да се подготват, тие се принудени да одат од една до друга врата, барајќи некој да им излезе во пресрет за да можат да ја претстават Македонија. Новата министерка за образование, Весна Јаневска, смета дека има недостаток во Законот за средно образование во смисла што во него не е предвидено доделување на финансиска поддршка од страна на МОН за ученици и нивни ментори за учество на меѓународни научни олимпијади, туку само доделување на стипендии доколку е освоено едно од првите три места, па најавува решението за овој проблем да се бара во корекции на Законот за средно образование во таа насока. Во меѓувреме, државата годишно ја напуштаат по 2500 високообразувани млади луѓе откако успеале да поминат низ образовниот систем во државата како по минско поле! Деценски проблем е што државата нема никаква стратегија за континуирана поддршка на талентираните ученици, уште помалку да го усмери нивниот професионален развој и да ги задржи како кадри“, додаваат од Левица.
Според Левица, проблемот е системски, длабок и од суштинско значење за иднината на државата и луѓето што живеат овде.
„Ако состојбите денес се лоши, тогаш кој ќе ги промени на подобро утре? Нашата иднина си заминува преку границите со застрашувачка брзина, а државата ниту понуди, ниту, пак, сега нуди план за надминување на таквата алармантна состојба. Проблемот бара длабоки решенија, а не површни шминкања на одделни закони! Левица ја повикува новатата министерка Јаневска да собере сила и храброст за да почне работите да ги решава од корен и систематски! Во овој момент не е потребно козметички да се надополнуваат празнините што го проголтуваат еден од најважните сектори во државата, туку напротив, потребни се итни и радикални промени во образованието“, завршуваат од Левица.