Свет
Над 60 ученици хоспитализирани поради бонбони од канабис
Повеќе од 60 ученици од основни училишта се хоспитализирани во Јамајка по јадење бонбони со канабис, соопштија локалните власти.
Министерката за образование и млади на Јамајка, Фајвал Вилијамс, изјави за Си-ен-ен, повикувајќи се на информации добиени од лекарите, дека ниту едно од 60-ината хоспитализирани деца на возраст од 7 до 12 години не е во критична состојба.
По јадењето бонбони со канабис, децата почнале да повраќаат и да халуцинираат, објави Вилијамс на платформата „Икс“ („Твитер“).
„Повеќе од 60 основци мораа да бидат хоспитализирани. Едно момче рече дека јадело само една бонбона, толку е силен производот. Родители, внимавајте!“, напиша Вилијамс.
Таа објави фотографија од бонбоните завиткани во пакување во боја на виножито.
Во пакувањето е наведено дека производот содржи делта-8 тетрахидроканабинол, познат како делта-8 ТХЦ, психоактивна супстанција, која се наоѓа во растението канабис сатива, чии видови, според веб-страницата на Американската агенција за храна и лекови (ФДА), се марихуана и коноп.
Според Американската агенција, има психоактивни и опојни ефекти.
Министерката објави и фотографија од пакувањето на бонбоните, на кое се гледа владиното предупредување на задната страна: „Да се чува подалеку од дофат на деца“ и дека не е наменета за употреба од лица помлади од 21 година.
Во Јамајка, од 2015 година, употребата на канабис е декриминализирана за лица постари од 18 години доколку поседуваат 56 грама или помалку и тоа се третира како полесен прекршок.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Зеленски се обрати до нацијата: Се браниме кај Харков, во Доњецк е исклучително тешко
Украинските сили продолжуваат со одбранбените операции околу северните погранични населби во регионот Харков, изјави украинскиот претседател, Володимир Зеленски во вечерното обраќање до нацијата.
„Нашите сили извршуваат контранапади и ја штитат украинската територија веќе втор ден“, рече Зеленски.
Украинската војска претходно соопшти дека руските сили се задржани во пограничните села во „сивата зона“, додека Русија објави дека зазела пет локални населби.
Ситуацијата, рече Зеленски, е особено напната во регионот на Доњецк, поточно во правец на Покровское, кај селата Семенивка и Нетаилова.
Зеленски додаде дека попречувањето на руските офанзивни акции сега е задача број еден.
Свет
Макрон: Се надевам дека Французите нема да мора да се борат во Украина
Францускиот претседател Емануел Макрон уште еднаш не ја исклучи можноста за интервенција на француската армија во Украина, но истовремено изрази надеж дека неговата земја нема да мора да војува и да испраќа свои војници во војна.
Како што пренесува „Украинска правда“, Емануел Макрон рече дека во одреден момент Европејците треба да бидат подготвени да ја спречат Русија да напредува понатаму во Украина, но тој најискрено се надева дека нема да мора да се борат.
„Ако сакаме мир, мораме да го заштитиме. Затоа треба да се вооружиме и затоа треба да бидеме средство за одвраќање и убедување. Ако одите предалеку и ги загрозувате нашите интереси и нашата безбедност, тогаш јас не исклучувам интервенци во конфликтот“, рече Макрон.
Тој нагласи дека украинскиот суверенитет и територијалниот интегритет се под закана, но истовремено владеењето на правото и општите правила се под закана.
„И ако оставиме сè како што е во Украина, тогаш ќе победи правото на посилниот. И не можеме да бидеме сигурни бидејќи тоа се случува на 1.500 километри. Значи, во Украина нашата иднина и нашата безбедност се во прашање“, заклучи францускиот претседател.
Свет
Големи пропалестински протести во Малме пред евровизиското финале, се бара исклучување на Израел од натпреварот
Денеска во центарот на Малме, Шведска се одржува масовен пропалестински протест поради учеството на Израел на овогодинешното натпреварување.
Голем број луѓе почнаа да се собираат на главниот плоштад во Малме од 16 часот.
Протестот почна на главниот плоштад во Малме, а насобраните од ова место се упатија кон арената Малме, каде што се одржува Евровизија.
Во четвртокот, кога претставничката на Израел настапи во втората полуфинална вечер, на улиците на Малме протестираа повеќе од 30.000 луѓе, според проценките на шведската полиција.
Барањата се исти – бојкот на Евровизија и исклучување на Израел од натпреварувањето.