Македонија
Здруженија од ексју-републиките заедно ќе ги задржуваат медицинските сестри дома: Ние не сме помошници на докторите, треба да нè почитуваат
Здруженија на медицински сестри и акушерки од неколку поранешни југословенски републики денес се собраа во Скопје на конференција на тема „Градење капацитети на силен глас на медицински сестри и акушерки, грижа за работната сила“. Целта на конференцијата е заеднички да најдат начин да ги задржат медицинските сестри и акушерки во матичните земји по поразителните податоци за нивно масовно заменување во други држави.
Тања Трајковска од Националното здружение на медицинските сестри, техничарите и акушерите кај нас вели дека сестрите и акушерките си заминуваат од Клиниката за гинекологија, каде што таа работи, и одат на полесни работни места за подобри плати.
„Сè помалку и помалку нè има на работните места, старее работната сила. Ако кажам дека јас сум од помладите, а сум веќе 50 години, 32 години на Гинекологија, тогаш може да замислите со каква бројка се соочуваме“, рече Трајковска.
Таа смета дека основа на сè е образованието, а нашата држава треба, конечно, да одлучи на кое ниво сака да има образовани медицински сестри и акушерки и да ги препознае.
„Државата треба да го смени ставот затоа што ние не сме помошници на докторите, ние сме професионалци, кои имаат свое поле на дејствување. Тоа е негата и никако не навлегуваме во ингеренциите на докторите, а не би требало и тие да навлегуваат во нашите. Треба да сме партнери, тимски да работиме, но треба да нè препознаат и да нè почитуваат на работните места“, вели Трајковска.
На конференцијата учествуваат здруженија на медицински сестри и акушерки од Македонија, Словенија, Хрватска, Србија, Република Српска и одЦрна Гора. Сите се согласни дека недостигот на медицински сестри и акушерки е голем проблем во регионот, но и во светот.
Во светот недостигаат 30 милиони сестри, а во Европа речиси 4 милиони. Претставничката на Националното здружение од Србија рече дека, за жал, земјите што не се во ЕУ-зоната се „воз за извоз“. Таа на конференцијата престави ранг-листа со причини поради кои си заминуваат медицинските сестри кај нив, која покажува дека на прво место е уважувањето на професијата, а дури на петто е платата, иако се верува дека повисоките плати се главниот мотив за иселувањата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Делови од Аеродром, Карпош и Ѓорче Петров утре без струја
Без електрична енергија утре ќе останат делови од општините Аеродром, Карпош и Ѓорче Петров.
Како што соопшти РЦУК – Скопје, без струја во периодот од 09:00 до 15:00 часот ќе останат корисниците на дел од село Долно Лисиче, реонот околу чаталот, ул.10 во општина Аеродром, од 10:30 до 14:30 часот дел од улица 16, на патот кон Визбеговово општина Карпош, а од 13:00 до 14:30 часот објектите на градинката Росица, на ул.„Мечкин Камен“, бр.45А. во општина Ѓорче Петров.
Македонија
Скопските и тетовските пожарникари гасеа три огнови на отворено, соопшти ЦУК
Во изминатото деноноќие Центарот за управување со кризи информира дека биле евидентирани три пожари на отворено.
Регионалниот ЦУК Скопје соопштил дека БППЗ на Град Скопје во изминатото деноноќие имала две помали интервенции поради запалено ѓубре и тоа на ул. „Ферид Заири“ во Општина Чаир и кај Езерото Треска во Општина Сарај.
Регионалниот ЦУК Тетово известил дека ТППЕ Тетово имала една помала интервенција поради запалена ниска вегетација кај село Чифлик во Општина Желино.
Центарот за управување со кризи соопшти дека изминатите 24 часа имало вкупно 1.491 повици на Единствениот повикувачки број за итни случаи 112. Од нив „реални“ повици биле 62,84 отсто, а 37,16 отсто биле за други потреби на граѓаните што не биле итни.
Кон полиција биле упатени 63,18 отсто, кон итната медицинска помош 29,09 проценти, кон пожарникарите 2,73 отсто, a кон АМСМ 1,36 отсто од повиците кон бројот 112.
Македонија
Силните дождови поплавија подруми и гаражи во Охрид
Локални дождови вчера и во текот на ноќта имаше на повеќе места во државата. Регионалниот Центар за управување со кризи (ЦУК) Охрид, известува дека се добиени пријави на граѓани за поплавување на подруми и гаража на две куќи на ул. „Стив Наумов“, во Охрид. Од страна на Општина Охрид е контактирано со ЈП „Нискоградба“ и ЈП „Колекторски систем“ дека колекторскиот систем не можел да ја прими во целост количината на вода која поради обилните врнежи од дожд, бидејќи во тој период на пороен дожд количината вода била голема. За кратко време состојбата е санирана.
Од ЦУК потсетуваат за голема внимателност при појава на локалните нагли метео промени и особена внимателност при грмежите и молњите, односно при силните електрични празнења. Препораките се да не се престојува на отворен простор и под осамени дрвја.
Потсетување има и за внимателно возење, особено на патиштата низ котлините, речните долини и клисурите, каде што има можност од појава на помали одрони при вакви променливи метео услови. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Сите итни случаи се пријавуваат на Единствениот повикувачки број за итни случаи 112 во ЦУК, особено кога граѓаните имаат животозагрозувачки ситуации. Истовремено, ЦУК информира дека е потребно и е корисно да се следат препораките и информациите од медиумите за превенција, а и за реагирање при итни случаи.