Основното јавно обвинителство Скопје донесе наредба за спроведување истражна постапка против 23-годишна жена со престојувалиште во ‘Ржаничино, која е осомничена за запуштање и малтретирање дете од член 201 став 1 од Кривичниот законик.

На 9 ноември во вечерните часови таа грубо ја запоставила својата мајчинска должност за грижа и воспитување, го запуштила и малтретирала својот 6-месечен син. Изнервирана затоа што бебето плачело, почнала да го удира со рацете и со тупаници по устата и носот нанесувајќи му повреди со крвавење.

Повредите кај детето ги забележал сопственикот на домот во кој престојувала осомничената и уште една пријателка, кои го однеле детето на лекарски преглед.

На Клиничкиот центар на детето му биле констатирани повеќе нови повреди – контузии и хематоми, но и постари подливи од претходни повреди. Во исто време констатирано е дека осомничената од раѓањето не го однела детето ниту на лекарски преглед ниту на вакцинација, меѓу другото, со цел да прикрие дека физички го удира бебето.

Јавниот обвинител до судијата на претходна постапка од Основниот кривичен суд Скопје достави предлог за определување мерка притвор за осомничената, пред сè, поради опасноста од бегство. Детето жртва за кое не е познат другиот родител е згрижено преку Центарот за социјални работи.

Премиерот Христијан Мицкоски, кој денеска беше во посета на фабриката „Костал“ во Охрид, негираше дека средствата од ИПАРД се блокирани по апсењата за корупција во Агенцијата за поддршка на земјоделството и руралниот развој.

На прашањето дали се блокирани средствата од ИПАРД, Мицкоски одговори дека тоа не е точно, туку напротив дека е поздравена позитивната акција од страна на луѓето од Европската комисија.

Тој додаде дека побарал да се стопираат исплатите на парите од ИПАРД за да се види до каде одат злоупотребите.

„Мораме да видиме до каде одат злоупотребите. Првичните информации говорат дека тоа не е од сега туку години наназад тоа е правено, така што се ќе истражиме и секој кој што мисли дека така ќе помине се лаже. Има да одговараат сите од прв до последен. Кој сака нека биде“, одговори Мицкоски на новинарското прашање.

Поранешната градоначалничка на град Скопје, Данела Арсовска, побара од новиот градоначалник Орце Ѓорѓиевски да ги објави сите фирми со долг, како и имињата и презимињата на сите 500 вработени што биле отпуштени од работа. Таа го повика Ѓорѓиевски на дебата.

„Кога се лаже, се држат рачињата во формација извежбана од медот. Ајде градоначалнику да ги објавиш сите фирми со долг по институција, со фактури и датуми од кога им се должи, за да знае народот дека лажеш. Исто и со име и презиме да ги објавиш сите 500 вработени и кој од кога не одел на работа, и таму да се види дека лажеш. 3 години за корка леб сите што одеа на работа ти ги избрка да направиш место за своите партиски војници. Нека не ти пишува Луке соопштенија за да се пресметуваш, ниту твоите полусветови ботовски да ме навредуваат, бидејќи знае народот дека лажеш. Ако сакаш како МАЖ да соочиш аргументи, ајде на дебата на ваш медиум по избор, па ќе си раскажеш таму и за долг и за вработени во Скопје и во Кисела Вода, каде што има кој да ти врати со факти наспроти твоето лажење“, објави Арсовска.

На фејсбук-статусот на Арсовска реагираа од ВМРО-ДПМНЕ.

„Колку поблиску до правдата, толку повеќе Данела Арсовска ќе е бучна и нервозна. Ѝ посакуваме да се надмине себеси и да ги победи своите стравови и болки. Борбата со таквите демони не е лесна и ѝ посакуваме среќа. Исто како и со соочувањето со правдата за хаосот што го остави зад себе, кој е неодминлив процес. Видовме дека подобро и поинакво Скопје може да функционира. Сите надлежни институции мора да се посветат на цунамито што го остави Данела Арсовска“, велат од ВМРО-ДПМНЕ.

Ѓорѓиевски вчера објави дека се отпуштени 500 вработени од претпријатијата на Скопје затоа што се месеци, дури и години, не оделе на работа.

„500 лица до денес се отстранети од работа од претпријатијата во градот Скопје. Тоа се лица што се платени од парите на скопјани, но не оделе на работа со месеци, дури и години“, објави Ѓорѓиевски.

Тој најави дека секој што чесно си ја работи работата, ќе биде награден, а оној што не работи, ќе биде казнет.

„Тука нема да има толеранција, а ќе има и одговорност! Секој оној што чесно си ја работи својата работа, ќе биде награден, а оној што не работи – ќе биде санкциониран. Ред во Скопје мора да има! Она што е платено со парите на граѓаните јас мора да го заштитам“, напиша Ѓорѓиевски на „Фејсбук“.