Македонија
Османи брутално искрен за пасошите: Место да даваме лажна надеж дека ќе го смениме договорот од Преспа, да го забрзаме издавањето до 12 февруари

Давање лажна надеж на граѓаните и некоректно кон нив би било сега да им се испрати порака да бидат без грижа доколку имаат пасоши со старото име на државата и да чекаат да се направат измени во меѓународниот договор, смета министерот за надворешни работи, Бујар Османи. Тој денес ги повика институциите да се организираат и до 12 февруари да се издадат колку што може повеќе пасоши, а решение за оние што ќе останат со несменети пасоши ќе се бара на 13 февруари.
„Договорот од Преспа е меѓународен договор. Јас мислам дека наместо да се концентрираме на давање лажна надеж на граѓаните дека ќе ги смениме одредбите од преспанскиот договор, дека ќе го смениме законот за спроведување на уставните амандмани, е да работиме граѓаните да немаат пречки по 13 февруари. Да се забрза издавањето пасоши, да почне налепниците да се лепат на регистарските таблички. Дајте да се организираме до 12 февруари да завршиме колку можеме повеќе. После на 13 ќе мислиме што останало како проблем и како тоа да го регулираме со грчката страна. Сметам дека некоректно е сега да им испратиме порака на граѓаните ‘седете вие без грижа затоа што ние ќе средиме и на крајот да им кажеме – не, не успеавме’. Се обидувам да бидам брутално искрен, меѓутоа покоректно е да сум сега отколку после тоа граѓаните да останат на граничните премини и на некој начин ние да сме причина за тоа“, рече министерот Османи.
Грчката страна, според министерот, има целосно разбирање за техничките аспекти од процесот. Разговарале за сите детали, вклучително и за тоа колку часови луѓето чекаат и зошто е тоа така. Осмеани вели дека и покрај разбирањето од грчката страна, очигледна е обврската од меѓународниот договор и таа останува.
„Ние се договоривме МНР, прво, да ги координира институциите и да биде во секојдневна комуникација со грчката страна, мојата порака е дајте до 12 да смениме колку што можеме повеќе пасоши“, рече министерот Османи и повика наместо иницијативи за одлагање, да имаме иницијативи за промена на документите.
Министерот извести дека имал средба со грчката амбасадорка, но имал и меѓуинституционална координација во МНР со претставници од МВР и од Министерството за транспорт за да ги разгледаат сите предизвици што може да се јават по 12 февруари.
„Мислам дека ова е поздраво да им се каже на граѓаните, ова е обврска што се провлекува пет години и да се обидеме до 13 февруари максимално да им ги средиме документите на граѓаните. Државата треба да ги направи тие напори, па ако треба и да ги компензира граѓаните што во овој период треба да ги сменат личните документи“, вели министерот Османи.
На можноста за еден ден да се смени договорот до Грција и да се пролонгира рокот за новите пасоши до септември укажа претседателот Стево Пендаровски минатата недела. Премиерот Димитар Ковачевски преку медиумите му порача тој да се слушне со претседателката на Грција оти и на тоа ниво може да се реши проблемот, но ниту претседателот ниту премиерот не стапи во контакт со грчката страна, туку оставија обврската да ја заврши Министерството за надворешни работи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Петрушевски: Струјата со СДС се зголеми затоа што фирми блиски до Заев и Филипче препродавале јаглен на ЕСМ за три пати поскапо од набавното

Венко Филипче трет ден молчи за испумпувањето на десетици милиони евра од ЕСМ од страна на Вице Заев и фирми кои водат и лично до него. Истражувањето на истражувачките новинари, кои го објавија овој скандал всушност покажува зошто ЕСМ е доведена во состојба на милионски долгови, изјави Бране Петрушевски, пратеник на ВМРО-ДПМНЕ.
„Вице Заев, Зоран Заев и Венко Филипче се директно виновни што струјата во нивно време се покачи за над 50%. Заев и Филипче се директно виновни што немало инвестиции во енергетиката, а немало за да има повеќе пари за во нивните џебови. За да може да профитираат Зоран Заев, Вице Заев и Венко Филипче, биле направени мрежа на фирми и посредници за ископ, транспорт и продажба на јаглен од Грција на ЕСМ. Јагленот кој од Грција се продавал кон мрежата на фирми за 30 евра бил препродаван во Македонија на ЕСМ по цена и до 82.5 евра“, рече тој.
Петрушевски обвини дека Заеви продавале скап јаглен на ЕСМ, а Филипче уживал во придобивките на милионските бизниси низ разни луксузи кои што му ги приуштувале.
„Овој скандал и афера од размери од неколку стотици милиони евра мора да има разрешница и одговорност. Очекуваме ЈО да отвори истрага, а Венко Филипче да излезе и да каже со кое лице излегува повторно во политиката и бара гласови од народот кој тој и Заев го краделе со стотици милиони евра“, рече Петрушевски.
Македонија
(Видео) Илиевски: Дали Мицкоски го штити изворот на пиротехниката што го предизвика пожарот во Кочани?

Зошто во ниту еден момент ниту обвинителот Коцевски, ниту министерот за внатрешни Тошковски, ниту премиерот Мицкоски не се осудија да го коментираат потеклото на пиротехниката која го предизвика пожарот во дискотеката Пулс кој зема 62 млади животи, а повредени беа 200 млади луѓе, праша Методија Илиевски, потпретседателот на СДСМ.
„Зошто истрагата досега не доведе до сознание кој ја внел пиротехниката во клубот? Зошто МВР на Тошковски досега не испита кој нелегално во Македонија шверцува пиротехнички средства и како пиротехнички средства завршиле во дискотеката Пулс кобната вечер? Дали доколку се дознае потеклото на пиротехниката истрагата ќе дојде до најблискиот периметар на луѓе околу премиерот? СДСМ прашува дали постои пријава во обвинителството дека потеклото на пиротехниката во дискотеката Пулс е од фирма блиска на најтесното опкружување на Мицкоски?“, праша тој.
Според Илиевски, сопственик и одговорно лиценца на фирмата е лице од блиското опкружување на Мицкоски од Струмица.
„Дали оваа компанија била задолжена за организација на партиските митинзи на ВМРО-ДПМНЕ? Дали ова е причината поради која Христијан Мицкоски ја попречува истрагата на обвинителството и не дозволува истата да го има правилниот тек?“, праша Илиевски.
Тој рече дека СДСМ нема да дозволи одговорните за пожарот во Пулс во кој животот го загубија 62 млади лица, а 200 беа повредени да останат неказнети.
Македонија
Огромен објект никнува во Охридската чаршија, секој прави што сака, алармира Охрид СОС

Чаршијата во Охрид го губи својот лик. Иако е дел од Старото градско јадро, за кое важи посебен закон, односно Закон за прогласување на Старото градско јадро на Охрид за културно наследство од особено значење, чаршијата е препуштена на стихијата и тука секој прави она што сака, без никаква регулатива, алармираат од Граѓанската иницијатива Охрид СОС.
„Ако некогаш важеше за специфичен дел на градот, исполнет со занаетчиски дуќани и стари градби, денеска оваа улица скоро сосема го изгубила својот лик и значење. Иако е дел од Старото градско јадро, за кое важи посебен закон, односно Закон за прогласување на Старото градско јадро на Охрид за културно наследство од особено значење, чаршијата е препуштена на стихијата и тука секој прави она што сака, без никаква регулатива. На прстите од една рака се бројат старите градби кои му одолеваат на времето. Денеска тука доминираат ресторани и угостителски објекти кои ја окупирале улицата и за минувачите и велосипедистите оставиле само еден тесен премин. И наместо институциите да диктираат што и како може да се гради, сведоци сме изминативе децении дека тука веќе почнаа да се градат високи објекти со нетипичен стил. Не се применува нити онаа омилена за Завод за заштита на спомениците на културата и Музеј-Охрид факсимилна реконструкција“, велат од таму.
Додека „стручната фела“ замижува и се прави наудрена, велат од Охрид СОС, деновиве кон крајот на чаршијата се подигнува еден огромен објект, кој според обемот и големината отскокнува од околните објекти.
„Минатата година, за да започнат градежни работи на овој дел, службите на Општина Охрид исекоа неколку децениски стебла, а од механизацијата е оштетено и партерното уредување. Но ништо од тоа не е важно, ако се знае дека институциите на прво место го ставаат интересот на поединците, наместо јавниот интерес. Објектот е видлив и од страната на паркингот. Додека се предлага градот да формира стручно тело кое ќе комуницира со УНЕСКО, „еден Борд кој ќе го сочинуваат архитекти и други професионалци“ неповратно го губиме културното наследство и специфичните градски четврти“, алармираат од Охрид СОС.