Скопје
Герасимовски: Најсовремената градинка „Пролет“ го доби финалниот изглед

Градинката „Пролет“ го доби финалниот изглед. Денеска, градоначалникот на општина Центар, Горан Герасимовски, направи увид го градежните работи на градинката, која треба да згрижи нови 150 дечиња од населбите Пролет и Маџир Маало.
„Градежните зафати во градинката ‘Пролет’ течат одлично. Фасадата, која е енергетски ефикасна, е веќе завршена и периодов се работи на внатрешноста. Преградните ѕидови се исто така речиси завршени и набргу ќе почне да се работи на подовите. При крај е и изведувањето на електричната и водоводната инсталација. Иако Општина Центар нема листи на чекање за упис на дечиња во градинките, изградбата на оваа градинката ќе го намали притисокот во околните градинки, но и ќе им го реши проблемот на многу родители од овој реон од Пролет и од Маџир Маало, кои своите деца сега ги носат во градинките во другите населби. Исто така, значајно е што градинката ќе располага со најсовремени безбедносни системи за противпожарна заштита“, изјави Герасимовски.
Градинката „Пролет“ е прва што се гради во општина Центар по цели 50 години и е целосно финансирана од општинскиот буџет. Новата градинка се простира на површина од 3.276 квадратни метри и ќе биде најголема детска градинка во државата со надворешно игралиште, до кое ќе може да пристапат и деца со попреченост во движењето.
Градинката ќе може да згрижи 150 дечиња на две нивоа и ќе има лифт за лица со инвалидитет и попреченост во движењето, просторија за лекар и изолација за дете, сопствена кујна наменета само за потребите на децата, посебен лифт за достава на храна по хасап-системот, сплинкери за противпожарна заштита со водна завеса во неколку простории и противпожарни врати во занималните и посебните делови на објектот. Градинката поседува и подземен паркинг за вработените и родителите на децата.
Општина Центар работи на инклузивноста во образованието и на најсовремени и квалитетни услови за престој на децата и идните генерации.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Ѓорѓиевски на одбележувањето на Светскиот ден на животната средина: „Заедно создаваме одржлива иднина“

Градоначалникот на oпштина Кисела Вода и претседател на ЗЕЛС, Орце Ѓорѓиевски, на покана на првиот вицепремиер Изет Меџити, денес присуствуваше на настан по повод Светскиот ден на животната средина. Настанот се одржа под мотото „Заедно создаваме одржлива иднина“ и опфати низа активности насочени кон унапредување на одржливите политики и практики во заштитата на животната средина.
„Денес, на покана на првиот вицепремиер Изет Меџити, присуствував на настанот на одбележувањето на Светскиот ден на животната средина, под наслов ‘Заедно создаваме одржлива иднина’. Програмата вклучуваше конференција со две панел-дискусии кои беа фокусирани на одржливото управување со заштитени подрачја, одржливото управување со отпадот и примената на современите зелени технологии.
Имавме чест да видиме и неколку презентации од учениците од Скопје и Македонија, кои се дел на ГЛОБЕ програмата со мрежата за искуствено учење, со акцент на значењето на искуственото еколошко образование во оформување на свесни и одговорни генерации поддржано од УНИЦЕФ и Министерството за животна средина и просторно планирање.
Нека заштитата и унапредувањето на животната средина и понатаму останат да бидат врвен приоритет, кој ќе резултира со нови парковски површини на места каде што постојат депонии, со акции за чистење и за пошумување, со едукација за правилна селекција и одложување на отпадот и бројни иницијативи за подигнување на еколошката свест кај граѓаните. Заедно можеме“, истакна претседателот на ЗЕЛС и градоначалник на Општина Кисела Вода, Орце Ѓорѓиевски.
Македонија
(Фото) ЈКП „Гази Баба“ доби нова механизација

Денес, градоначалникот на општина Гази Баба Бобан Стефковски заедно со директорот на ЈКП Гази Баба Игор Атанасовски направија промоција на новата механизација за ЈКП Гази Баба, извести Општината.
Механизацијата се состои од две возила и тоа: специјализирано возило за метење и миење на јавните површини и теренско товарно возило.
Специјализираното возило ќе даде значителен придонес кон зголемувањето на чистотата на јавните површини, преку редовно метење на улиците во урбаните средини, додека товарното возило ќе биде ставено во функција на интервенции на терен во руралниот дел на општината каде што ЈКП Гази Баба има надлежност за оддржување на водоводните и канализационите системи, се додава во соопштението.
„Среќен сум што од денес во функција на ЈКП Гази Баба, а преку тоа во директна служба на граѓаните ставаме две нови возила. Ова не е прва инвестиција во ЈКП Гази Баба во изминатите четири години, ЈКП Гази Баба доби значајни инвестиции во механизација и опрема, кои не само што го подобрија квалитетот на услугите, туку и го трансформираа претпријатието во модерна и ефикасна институција – вистински сервис на граѓаните“, изјави градоначалникот Стефковски.
Директорот на ЈКП Гази Баба Игор Атанасовски, упати благодарност до градоначалникот Стефковски за поддршката и инвестициите кои се реализираа во изминатиот период.
Македонија
Арсовска: Наредбите за девалвации и напади од штабот на ВМРО се спроведуваат

Наредбите за девалвации и напади од штабот на ВМРО се спроведуваат, објави на социјалните мрежи градоначалничката на Скопје, Данела Арсовска.
„Звонко Тасевски со одлука на Собранието на ВМРО и ‘Влен’ е избран за член на Републичкиот совет за безбедност на 12.11.2024 година. Звонко обучува полицајци од МВР, каде што треба да пријавам закани. Звонко напаѓа, навредува и девалвира жени по нарачка. Не биди Звонко“.
Со докази за криминал, како што пишува Арсовска, ги бараат сите можни изговори за да не влезат во општина пред таму да ги уништат сите документи.
„Сите незаконски обиди за легализирање дивоградби им се фатени, нотирани и институционално се известувани 3 години, а фалсификатот со докази што ги имаме го прават на 20.3.2025 година.
Затоа што никој од вработените во Град Скопје нема да дозволи некој да се богати со овој фалсификат, јас сум должна да ги заштитам и да не дозволам да се случува баш ова што се случува.
За заканите од криминалот на Ганиу, Меџити и Адеми зборувам јавно, а премиерот вели дека му е жал и да пријавам во МВР, но не сум била добра жена“.
Во исто време, како што додава во напишаното, биле издавани наредби во штабот да ја напаѓаат, девалвираат и навредуваат по сите основи како човек и жена.
„Но изгледа не им е јасно дека нема да се повлечам. А вие срам имате ли?
U.S. Embassy North Macedonia, Delegation of the European Union to North Macedonia, British Embassy Skopje, German Embassy Skopje, Јавно обвинителство на Република Македонија“, напиша Арсовска.