Економија
Стечај за „Еуроникел“ вo петок, во „Фалкондо“ истиот инвеститор ги отпушта работниците – умираат фабриките на ГСОЛ
Првото рочиште за новиот стечај на кавадаречки „Еуроникел“ е закажано за в петок, втори февруари. Освен компанија доверител од Прилеп, која поднела барање за стечај за долг од 10.000 евра, минатата недела барање поднесе и Синдикатот на „Еуроникел индустри“ за долг од 3 неисплатени плати на варботените. Иницијативата од Синдикатот доаѓа откако сопственикот на фабриката, швајцарскиот фонд ГСОЛ (GSOL) ги остави без плата три месеци, а ниту ги прогласи технолошки вишок за да добијат отпремнини, ниту, пак, ги одјави од Заводот за вработување за да можат како невработени да добијат здравствено осигурување. Претседателот на Синдикатот на „Еуроникел“ Миле Ѓорѓиев минатата недела рече дека се лекуваат со ракија оти здравствено осигурување немаат од почетокот на месецов
„Макфакс“ минатата недела побара објаснување за состојбата од швајцарски ГСОЛ, од Комерцијална банка, која го презема имотот на фабриката и од претседателот на Синдикатот. ГСОЛ до денес не одговори на нашите прашања, како и претседателот Ѓорѓиев, а Комерцијална банка, место одговори на конкретните прашањата од „Макфакс“ испрати соопштение до сите медиуми во кое го повтори она што веќе два месеци го кажува – дека се во тек преговори со моќни странски и домашни компании, без да кажат кои се тие, иако јавноста веќе подолго време шпекулира со нивните имиња, дека стечајот не ја загрозува продажбата на имотот, дека работници секако ќе бидат потребни, но никој не кажува ни кој, ни кога повторно ќе ја стартува фабриката и кога повторно вработените ќе се вратат на работните места, ако воопшто се вратат.
Слични се ставовите и на вработените кои коментираат по социјалните мрежи и велат дека со месеци се пласираат исти приказни, а всушност секој си го гледа само својот интерес и никому не му е гајле за вработените што останаа и без плата и без работа.
На сличен пат се и вработените во фабриката „Фалкондо“ во Доминиканската Република, сопственост на истите газди. Таму, откако под притисок на власта на вработените кои седат дома им се исплати 13 плата и дел од јануарската плата, сега ГСОЛ најавува раскинување на договорите на сите вработени. За фабриката во Кавадарци, банката бара нов инвеститор, а пак за фабриката во Доминикана, газдите најавуваат дека се бара нов партнер, но медиумите објавуваат дека компанијата има и судска забрана од Англискиот суд откако било објавено дека се бара партнер за купување на финалниот производ и обезбедување на финансирање.
Информациите во тамошните медиуми се дека фабриката е презадолжена и дека долговите кон доверителите изнесуваат над 100 милиони долари, а минатата недела беше објавено дека една од банките доверители (Лафисе банка) запленила резервоари за гас кои биле под залог за наплата на долг, а без низ фабриката не може да работи.
Синдикалните преставници во „Фалкондо“ предупредуваат дека заради ваквата ситуација, протести се сé поизвесни и дека фактот што досега се уште нема немили сцени е благодарение на синдикалните лидери кои се обидуваат да поддржат мирно решение.
И медиумите во Доминиканската Република информираат за состојбите во кавадаречката фабрика која припаѓа на истите газди, прават споредба и заклучуваат дека сличноста во состојбите во двете фабрики е очигледна.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
БРАКО ќе промовира ново електрично возило на саем во Минхен
БРАКО ќе претстави ново електрично возило од својот бренд Грин Машинс на светскиот саем IFAT, кој следната недела ќе се одржи во Минхен.
Возилото беше развивано две години од страна на инженерскиот тим за развој на БРАКО/Грин Машинс и е сосема ново техничко и функционално решение во програмата за производство на возила за одржување урбана хигиена.
Моделот 720 ZE работи на електричен погон и e со технологија од последната генерација, со вградени мотори во задните тркала и управување на сите четири тркала, поголем контејнерски простор, широка кабина за две лица, 360⁰ камера и оптимизиран начин на чистење.
Се очекува новиот модел да отвори уште повеќе пазари во светот, каде се бараат возила за одржување хигиена од овој габарит и перформанси.
Моделот 720 ZE беше најавен како концепт на саемот IFAT во 2022 гoдина и тимот за развој планираше да го развие во следните две години, во што и успеа и создаде возило кое е целосно замислено, проектирано и произведено во погоните на БРАКО.
Возилото во завршна фаза беше претставено пред гостите на прославата на 20-годишнината на Феро Инвест и БРАКО пред шест месеци, а сега во Германија ќе ја доживее својата светска промоција.
(ПР)
Економија
Почна пријавувањето за директни плаќања по програмата за финансиска поддршка во земјоделството за 2024 година
Министерството за земјоделство, шумарство и водостопанство заедно со Агенцијата за финансиска поддршка во земјоделството и руралниот развој ги информира земјоделските стопанства, дека во период од 10 мај до 1 јули ќе можат да поднесат барања по Програмата за финансиска поддршка во земјоделството за 2024 година.
Во наведениот период земјоделските стопанства можат да поднесуваат барања за: растително производство по обработлива земјоделска површина со поледелски и градинарски култури, за одржување на постоечки површини со овошни и лозови насади како и површина за производство на сертифициран семенски и саден материјал, сточарско производство за обележани грла говеда, овци и кози, за маторици, презимени пчелни семејства како и за заклани говеда во кланица, како и за органско земјоделско производство.
Земјоделските стопанства своите барања ги поднесуваат во електронскиот систем на АФПЗРР, а доколку имаат потреба од помош или поддршка можат да се обратат во подрачните единици на МЗШВ.
Аплицирањето е преку линкот www.ipardpa.gov.mk – Директни плаќања е-субвенции. Со отварање на овој линк, во полето „Известувања/упатства“ достапни се деталните упатства за поднесување на барањето, Листата на потребни документи како и Програмата и Уредбата за директни плаќања во кои детално се претставени условите и висината на финансиската поддршка.
Економија
Ангеловска-Бежоска на форумот на Виенската иницијатива: Капитализираноста на македонскиот банкарски систем порасна двојно повеќе од ЦЈИЕ
Гувернерката Ангеловска-Бежоска, како претставничка на шесте централни банки од Западен Балкан во Одборот на „Виенската иницијатива“, учествуваше на Годишниот форум на панел-дискусијата посветена на банкарските системи во Централна и Југоисточна Европа (ЦЈИЕ), којшто оваа година се одржа во Вилнус, Литванија.
И покрај шоковите од невидени размери, банкарските системи во регионот, вклучително и македонскиот, покажаа високо ниво на отпорност. Македонскиот банкарски систем не само што ја задржа стабилноста, туку и уште повеќе ја зголеми. „Резултатите од овие напори се видливи. Капитализираноста на нашиот банкарски систем во споредба со претпандемичниот период е зголемена за близу 2 п.п., што е двојно повеќе од порастот во регионот на ЦЈИЕ и во моментов е највисока во изминатите 17 години, а квалитетот на капиталот е на историски високо ниво. Овие трендови во голема мера ги одразуваат зајакнувањето на регулативната рамка, на супервизијата и макропрудентните мерки преземени од страна на Народната банка“, посочи Ангеловска-Бежоска.
Притоа, особено е важно што и во овие кризни години имаше солидна кредитна поддршка за граѓаните и компаниите (просечен кредитен раст од околу 7%). Во услови на циклус на монетарно затегнување, каматните стапки на кредитирање пораснаа, но растот беше помал од растот на каматните стапки во ЕУ. Со тоа домашните каматни стапки на кредитите значително се приближија до каматните стапки во ЕУ и разликата меѓу нив е историски најниска. Во овој момент, просечната каматна стапка изнесува 5,5%, односно е двојно пониска во споредба со периодот пред Големата финансиска криза, кога изнесуваше околу 11%, во просек.
Гувернерката се осврна и на финансиската писменост и заштитата на корисниците на финансиските услуги, коишто се значајни за носење соодветни финансиски одлуки, но и за зголемување на конкурентските притисоци и за понуда на поконкурентни финансиски услови. „Финансиската писменост, едукацијата и заштитата на потрошувачите, коишто се стратешки приоритети на Народната банка, се важни за клиентите за да можат подобро да ги разберат и правилно да ги споредат понудите меѓу различните банки. Неодамна формиравме посебна организациска единица за финансиската писменост и заштитата на потрошувачите. Под водство на Народната банка, беше усвоена и првата национална Стратегија за финансиска инклузија и писменост, додека регулативната рамка беше зајакната минатата година, вклучително и преку усвојување на Насоките за банките и штедилниците за добри практики за заштита на потрошувачите, фер и транспарентни односи, врз основа на јасни и лесно разбирливи информации за производите и услугите што ги обезбедуваат. Беа преземени и мерки за зголемување на транспарентноста преку споредба на надоместоците за најрепрезентативните банкарски платежни услуги, коишто заедно со либерализацијата на пазарот на платежни услуги, ја поттикнуваат конкуренцијата во системот“, истакна Ангеловска-Бежоска.
„Виенската иницијатива“ е платформа којашто ги поврзува меѓународните финансиски институции, банкарските регулатори и претставниците на банкарските групи од Европа, присутни во регионот на ЦИЈЕ и секоја година, од 2009 година до денес, организира собири во областа на финансиите на кои сите засегнати чинители зборуваат за идните насоки во политиките поврзани со банкарскиот сектор и за поопшти макроекономски прашања.