Македонија
Грковска за улогата на младите во зајакнувањето на демократската култура: Младоста има голема трансформативна моќ
Во организација на заменичката на претседателот на Владата на Република Северна Македонија задолжена за политики за добро владеење, Славица Грковска, денеска во Клубот на пратеници се одржа трибина на тема „Улогата на младите во зајакнувањето на демократската култура“, на која учествуваа претставници на партиски подмладоци и на младински граѓански организации, со цел да се придонесе во градењето култура на дијалог и демократска атмосфера во пресрет на изборите.
Истакнувајќи дека со самото прифаќање на поканата за учество на овој настан, младите покажуваат демократска зрелост, вицепремиерката Грковска во своето воведно обраќање истакна дека ваквите дискусии се клучни за да одиме напред како заедница, без оглед на прашањата околу кои не се согласуваме.
„Важно е сите да станеме посвесни дека младоста и енергијата што ја носите има голема трансформативна моќ, која треба да се насочи кон вградување на вистинските вредности во општеството. Денешниот настан не е натпревар за политички поени, туку е замислен како заеднички напор кој цели кон заеднички напредок“, изјави Грковска.
Присутните се согласија дека за клучните прашања во општеството треба да се гради широк консензус, вклучително и за имплементацијата на Законот за млади, и во таа насока го критикуваа отуството на претставници од дел од подмладоците на партиите во земјава на денешната трибина, но изразија надеж дека ова ќе ги инспирира и мотивира за да се приклучат на идни активности од заеднички интерес.
Дел од заклучоците на денешната трибина се:
„Потребно е да се зголеми младинското учество на сите нивоа. Младите да не се ограничуваат само на прашања поврзани со нивната возрасна група, туку во сите општествени процеси. Волонтерството да се поттикнува уште на почетокот на образовниот процес.
За целосно спроведување на Законот за млади, треба да се вклучат сите субјекти на централно и локално ниво. Потребно е да се реализира стратешката определба за посебно министерство за млади, со оглед на тоа што работата на Агенцијата за спорт и млади во најголем дел е посветена на спортот. Исто така, потребно е да се подобри учеството на партиите во Националниот младински совет, со оглед дека моментално само четири партии партиципираат во неговата работа.
Образованието е еден од клучните предизвици на нашето општество и потребен е консензус за концепциски промени и одржливи решенија со кои ќе се надминат проблемите и слабите резултати. Особено е важно да јакнат алатките за мониторинг, со кои се мери успешноста во спроведувањето на политиките.
Неопходно е во јавноста да се истакнуваат позитивни модели за идентификација и да се издвојуваат примери на дејствување со личен и професионален интегритет.
Младите треба да имаат корективна улога и да ја негуваат својата критичност, но и самокритичноста и индивидуалната одговорност.
Младите политичари и активисти треба да се спротивстават на длабоката поларизација во општеството и да негуваат поголема взаемна почит, пријателство и солидарност“.
На денешната трибина учествуваа Дино Блажевски од Унија на млади сили на ВМРО-НП, Марко Михаилоски од СДММ, Висар Пилоши од ДПА, Богоја Петровски од Младите на Демократски сојуз, Александар Пандиловски од Младинска организација на ДОМ, Мила Петрушевска од ЗНАМ, Мелани Атанасовска од НСДМ, Горјан Чурлинов од Форумот на млади на партијата на Власите од Македонија, Александар Николовски од Соjуз на студенти – УКИМ, Берин Мухамед од Сојуз на средношколци, Мартина Јачевска од Сојуз за младинска работа и Филип Ивковски од Националниот младински совет на Македонија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Андреј Темов од Кисела Вода стана државен шампион во тенис до 12 години
Кисела Вода доби државен шампион во тенис! На Државно првенство на Македонија за јуниори до 12 години, кое се одигра денес, титулата најдобар ја понесе Андреј Темов, ученик од ООУ Круме Кепески.
Градоначалникот Ѓорѓиевски кој го бодреше, му ја честиташе победата и му посака понатамошни успеси. Му укажа дека и понатаму може да смета на поддршката која ја добива од Општина Кисела Вода и дека покрај финансиска поддршка, тој и сите други талентирани спортисти, можат да сметаат и на одлични услови за развивање на своите спортски потенцијали.
– Голема е мојата радост што денес нашата општина, Кисела Вода доби државен шампион во тенис до 12 години. Андреј Темов, кој честопати бил гостин во мојот кабинет, покажа како се креираат резултати кога некој е силно посветен на она што го сака. Овој извонреден успех е доказ за неговата посветеност, труд и талент, и ни покажува дека иднината на спортот во нашата општина е светла. Имав чест и привилегија лично да го бодрам Андреј на овој важен настан и од срце му ја честитам победата. Неговата истрајност и желба за успех се инспирација за сите нас. Како градоначалник на Општина Кисела Вода, сакам да му посакам понатамошни успеси и да го охрабрам да продолжи да го следи својот сон.
Општина Кисела Вода ќе продолжи да го поддржува Андреј и сите други талентирани спортисти. Како и досега, ќе обезбедуваме финансиска поддршка, но и одлични услови за развивање на спортските потенцијали. Силно верувам дека со правилна поддршка и инвестиции во изградба на спортската инфраструктура, нашите млади спортисти ќе можат да постигнуваат уште поголеми успеси и да ја претставуваат нашата општина и држава на највисоко ниво. Честитки уште еднаш на Андреј Темов! Нека оваа победа биде само една од големата низа на успеси, изјави градоначалникот Орце Ѓорѓиевски.
Македонија
Дарко Костадиновски нов претседател на Уставниот суд
Судот информира дека денеска судијата Дарко Костадиновски е избран за нов претседател на Уставниот суд на Република Северна Македонија.
Од таму додаваат дека повеќе информации ќе бидат соопштени во текот на денот.
Костадиновски ќе ја наследи својата колешка Добрила Кацарска, чиј мандат како претседателка на Уставниот истече на 2 јуни.
Македонија
„ЈК Травел“ и СОС Детско село потпишаа договор за продолжување на кампањата „Ти летуваш – ‘ЈК Травел’ донира на СОС Детско село“
ЈК Травел и СОС Детско село, потпишаа договор за продолжување на кампањата „Ти летуваш, ЈК Травел донира на СОС Детско Село“.
И оваа година, ЈК Травел, како општествено одговорна компанија, и лидер на пазарот во туризмот, се обврза да донира средства за СОС Детско Село, со секој уплатен аранжман, а воедно со тоа да даде и директна поддршка на сите деца и згрижувачки семејства од оваа институција.
„Благодарност до нашиот партнер ЈК Травел што втора година ја реализира оваа кампања. За нас од СОС Детско село ваков тип на кампањи помагаат во зголемување на свесноста за нашата кауза кај пошироката публика но и претставува важна потпора за обезбедување на квалитетна поддршка на над 75 згрижувачки семејства и над 120 деца и млади..”- велат од СОС Детско село.
ЈК Травел, оваа година го слави својот осумнаесети роденден, а кампањата одлучи да ја започне со потпишување на договор за донација на СОС Детско Село со секој уплатен туристички аранжман.
„На овој начин сите лојални клиенти кои низ изминативе осумнаесет годините летуваат со ЈК Травел се директни поддржувачи на оваа донација, за што сме искрено благодарни“ – изјавија од ЈК Травел.
Кампањата е предвидено да трае три месеци, со што се опфаќа и летната туристичка сезона кога има најголем број на туристички аранжмани, а донацијата ќе биде од помош за СОС Детско Село, институција која на многу пати покажала дека хуманоста и грижата за децата значи основа за унапредување на општеството и воспоставува стандарди кои се за восхит.
Воедно, ова е повик и до останатите компании од Македонија да се вклучат активно во поддршката на здруженијата кои имаат потреба од помош, бидејќи заедно можеме да изградиме подобар свет за нашите деца, да промовираме хумани вредности и грижа како темел на успехот на сите нас.
ПР