Македонија
Грковска: Жените се соочуваат со специфични бариери, кои ги прават поотпорни и помотивирани во борбата за подобро општество
„Правичната застапеност на жените на масите каде што се носат одлуки е предност сама по себе. Бидејќи вклучувањето на различни перспективи, искуства, пристапи и енергии, води до подобри и посеопфатни решенија на кое било поле“, истакна заменичката на претседателот на Владата задолжена за политики за добро владеење, Славица Грковска, на панел дискусија посветена на клучната улога на женското лидерство во справувањето со предизвиците, која се одржа во рамки на конференцијата „Успешни жени, за успешен регион“.
Грковска посочи дека за да се изгради подобро општество и систем кој е функционален, ефикасен, праведен и ги исполнува барањата и потребите на сите групи во нашата заедница, жените мора да бидат составен дел од тие процеси, а нивниот глас, идеи и потенцијал мора бидат вклучени во дизајнирањето и на сегашноста, и на иднината. На основно ниво, додаде вицепремиерката Грковска, ова е прашање на човекови права, на справување со дискриминацијата и нејзините извори. Бидејќи без стремеж за еднаквост на сите нивоа, нема успешно вградување на принципите на добро владеење во системот и општеството.
„Сметам дека токму предизвиците кои се специфични за жените, нееднаквиот третман во општеството и бариерите со кои се соочуваат, ги прават жените поотпорни и помотивирани во борбата за подобро општество. И затоа длабоко верувам дека жените и младите се движечката сила на позитивните општествени промени“, изјави Грковска.
Вицепремиерката ја нагласи важноста на соработката, вклучително и на регионално ниво, како и дијалогот и взаемната одговорност меѓу владите, компаниите и граѓанските организации, додавајќи дека од клучно значење е да се поттикне средина каде што сите засегнати страни се активно ангажирани за ефективно справување со предизвиците во општеството.
На панел дискусијата Грковска се осврна и на прашањето за родовиот јаз на пазарот на труд, истакнувајќи дека жените се сè уште доминантна работна сила во индустриите со пониски плати, но се недоволно претставени во дигиталниот свет, којшто обезбедува повеќе можности за економско зајакнување и професионален развој. Со оглед на тоа што жените сочинуваат половина од корисниците на технологијата, појасни Грковска, нивните сознанија и искуства се непроценливи во обликувањето на современите општества, во креирањето и спроведувањето на стратегии за дигитализација, во сајбер безбедноста и во сите поврзани сегменти од дигиталната трансформација на нашите општества.
Денешната конференцијата се одржа во Скопје, со учество на претставници од Владата, приватниот и граѓанскиот сектор, во организација на регионалната непрофитна иницијатива „Women on Boards Adria – WOBA“ (Жени во органи на управување Јадран), основана со цел да се зголеми родовата разновидност во извршните и неизвршните органи на управување во регионот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Уапсен врховен судија поради сомненија за примање поткуп
Врховниот судија Наке Георгиев е уапсен поради сомнеж за примање поткуп.
„Денеска 20 мај, лишен од слобода е судија од Врховниот суд поради сомневања за сторено кривично дело Примање награда за противзаконито влијание. Судијата е лишен од слобода на лице место при извршување на кривичното дело. Се чекаат натамошни насоки од надлежен јавен обвинител“, велат од МВР.
Засега не е позната локацијата каде што е приведен судијата, ниту пак, за колкава сума станува збор.
Македонија
Сиљановска доби честитка од кралот Чарлс
Претседателката Гордана Сиљановска Давкова денеска го прими амбасадорот на Обединетото Кралство на Велика Британија и Северна Ирска, Метју Лосон.
На средбата беа разменети мислења за севкупните билатерални односи меѓу двете држави, при што претседателката Сиљановска Давкова истакна дека нашата држава придава особено значење на развојот на пријателските односи и соработката со Обединетото Кралство, вклучувајќи го сојузништвото во НАТО алијансата. Претседателката Сиљановска Давкова посочи на нејзината подготвеност за натамошно унапредување на билатералната соработка со Обединетото Кралство во сите сфери од заемен интерес.
Претседателката Сиљановска Давкова истакна дека како држава особено ја цениме британската поддршка во исполнувањето на стратешката цел – членство во Европската Унија, која продолжи и по Брегзит.
Амбасадорот Лосон на претседателката Сиљановска Давкова и предаде честитка од Кралот Чарлс Трети по повод нејзиното стапување на функцијата, во која упатува најискрени честитки за нејзиниот избор.
„Уверен сум дека ќе го вложите целиот Ваш капацитет за време на Вашиот мандат како Претседател за справување со големите предизвици на нашето време, почнувајќи од справувањето со климатските промени до продлабочувањето на евроатлантската интеграција на Северна Македонија. Многу сум задоволен што нашите две земји имаат воспоставено цврсти трговски и безбедносни односи. Оттука, се надевам дека за време на Вашиот мандат како Претседател односите, кои се веќе толку блиски, уште повеќе ќе се продлабочат“, се вели во честитката од Кралот Чарлс Трети.
Македонија
Сиљановска Давкова се сретна со украинската амбасадорка Дир
Претседателката Гордана Сиљановска Давкова денеска ја прими амбасадорката на Украина, Лариса Дир.
На средбата, беше изразено задоволство од традиционалните пријателски односи, засновани на заемна почит и меѓусебно разбирање. Претседателката Сиљановска Давкова ја нагласи нејзината заложба за продлабочување на соработката во сите области од заеднички интерес, реафирмирајќи ја поддршката за Украина против руската агресија, со која се поткопува европската глобална безбедност и стабилност.
Двете соговорнички разменија мислења и за стратешките определби и перспективите на двете земји, истакнувајќи ја потребата од натамошна заемна помош, споделување искуства и експертиза. Претседателката Сиљановска Давкова ја нагласи македонската поддршка за Украина на нејзиниот пат кон Европската Унија и НАТО.
Амбасадорката Дир, упатувајќи честитки за изборот на претседателката Сиљановска Давкова ѝ посака успешно извршување на функцијата.