Македонија
Мицкоски татковината ќе продолжи да ја нарекува Македонија: Не очекувам талибански однос и цензурирање
![](https://makfax.com.mk/wp-content/uploads/2024/06/mi.jpg)
Лидерот на ВМРО-ДПМНЕ, Христијан Мицкоски, кој утре очекува од претседателката Гордана Силјановска-Давкова да го добие мандатот за состав на влада, го следи нејзиниот пример кога се работи за употреба на името на земјата. Најави дека татковината во изјавите ќе продолжи да ја нарекува Македонија, без придавката, која ќе ја има во институционалната комуникација. Претседателката Силјановска-Давкова на заклетвата во Собранието, по изборот, земјата ја нарече Македонија, без придавката, но го потпиша документот во кој е целото име на државата во согласност со преспанскиот договор.
Мицкоски смета дека хистеријата кај нашиот јужен сосед за употребата на името е резултат на нивната изборна кампања.
„Не очекувам талибански однос, цензурирање елементарно човеково право, а сè што е содржано во преспанскиот договор и е дел од нашиот правен систем и уставен поредок идната влада на ВМРО-ДПМНЕ ќе го почитува, вклучително и решенијата за пратеници што ги добивме. Ги добивме со придавката содржана во нив. И предлог-законот, кој денеска го поднесувам, е со придавката вклучена во него. Но, мое човеково право загарантирано со многу конвенции е правото на слобода на изразување и говор. Јас не им се лутам на политичарите кога не го кажуваат целото и потполно име на својата држава, туку, едноставно, крајот или дел од тоа име. За мене, мојата татковина во секоја моја изјава е Македонија и ќе остане Македонија. Целокупната институционална комуникација, која е дел од законите и Уставот, ќе биде почитувана сè додека тие закони и Уставот се во сила, онакви какви што се“, рече Мицкоски.
Доколку на самитот во НАТО се отвори употребата на името како прашање, Мицкоски е подготвен да одговори. Вели дека е подготвен и за дебата за тоа кој колку реализирал од преспанскиот договор.
„Мојата порака ќе биде дека јас би сакал да градам мостови на соработка, на пријателство со нашите соседи, вклучително и со нашиот јужен сосед, источен, северен, западен. Македонскиот народ и граѓаните се мирољубиви луѓе, мирољубив народ, гостопримлив. Така се однесувале, очекувам така да се однесуваат и нашите соседи. Да соработуваме и да негуваме добрососедски односи. Ниту имам намера талибански да се однесувам ниту очекувам во 21 век талибанско однесување од кој било политичар. Можеме не само таму, туку на кој било форум да отвориме дебата, па да видиме кој колку реализирал од преспанскиот договор, иако не би сакал да го губам времето убедувајќи се со моите колеги кој колку реализирал. Би сакал да зборуваме за инвестиции, за подобар стандард, за развој, за рефроми…“, вели Мицкоски.
За однесување во пријателски дух со соседите вчера повика и претседателката Силјановска-Давкова и порача дека би можеле да бидеме малку Скандинавци.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Македонија
Муслиу: Претседателката попушти пред партиските притисоци, партиската логика го надвладеа мерит системот
![](https://makfax.com.mk/wp-content/uploads/2024/06/photo.jpg)
Претседателката на Република Северна Македонија, Гордана Силјановска-Давкова денеска ме разреши од функцијата директор на Агенцијата за разузнавање.
Без да навлегувам во политичката логика и автономија при одлучувањето за моето разрешување, очигледно е дека претседателката попушти пред партиските притисоци, вели разрешениот директор на Агенцијата за разузнавање Еролд Муслиу, откако од кабинетот на Сиљановска Давкова попладнево беше соопштено дека таа донела одлука за негово разрешување и за именување на Габриела Јаковлева на таа функција.
„Законската оправданост и мерит системот за кој цело време зборува претседателката, за жал во случајот со моето разрешување , отсуствуваат.
Посебно сум разочаран од постапката и начинот кој го избра при моето разрешување, не покажувајќи доблест да се сретнеме на прва информативна средба на која би добила брифинг за природата на работата на Агенцијата и за безбедносното опкружување и актуелната состојба во регионот.
Со гордост и посебна чест ја раководев Агенцијата во изминатиот период во кој вложив надчовечки напори да го подигнам нивото на квалитетна работа и да го пренесам професионалното искуство и знаење стекнато во мојата 31 годишна кариера.
Честа е уште поголема и заради фактот што јас сум првиот Албанец во историјата на безбедносно-разузнавачката заедница во нашата држава на кого во 2019 година му беше доверена задача да ја предводи АР.
Иако цело време бев изложен на гнасна дезинформациска кампања која доби размери на политички линч кој остави и последици врз моето семејство, сепак, разбивајќи ги табуата во нашето општество, докажав дека Албанец, притоа и без партиска припадност, може да постигне високо ниво, да биде прифатен и почитуван во колективот, во национални и меѓународни рамки.
Пионер сум во идејата и достигнувањето највисоко ниво на родова застапеност и еднаквост како и на раководно ниво во АР, како и во делот на етничка рамноправност давајќи простор на сите од етничките заедници застапени во нашето општество да бидат дел од АР.
Под мое лидерство го подигнавме нивото и ги надградуваме нашите технички капацитети во процесот на дигитализација, информатичка и кибер безбедност.
Постигнавме фантастични достигнувања во стратешките зафаќања и оперативно-разузнавачките активности кои АР ги реализираше самостојно, како и на билатерално и на сојузничко ниво.
Искажувам огромна благодарност до целиот колектив во АР што во изминатиот, навистина динамичен и полн со предизвици период, ми дадоа безрезервна подршка во тешките зафаќања кои мораше да ги превземеме особено во периодот на ковид пандемијата, реформата на АР, активностите со отпочнувањето на Руската агресија на Украина, конфликтот во Газа и регионалната нестабилност во соседството.
На крај, на новата директорка на АР и посакувам успех во раководењето со Агенцијата, на останатите колеги им посакувам да бидат фокусирани на исполнување на визијата и мисијата на АР , да ја чуваат и бранат РСМ, не затоа што е голема или мала, туку затоа што таа е наша“, вели во изјавата Муслиу.
Македонија
Тошковски и Јанев: Борбата со криминалот и корупцијата ќе биде бескомпромисна
![](https://makfax.com.mk/wp-content/uploads/2024/06/5-1-1.jpg)
Министерот за внатрешни работи Панче Тошковски и новоименуваниот директор на Бирото за јавна безбедност Александар Јанев во текот на денешниот ден остварија работен состанок со раководството на Одделот за сузбивање на организиран и сериозен криминал.
На состанокот беше потврдено дека уште од првиот работен ден, ова раководство на МВР ќе биде посветено кон бескомпромисна борба со криминалот и корупцијата, што е впрочем и еден од главните столбови на владината програма. Токму поради тоа, оваа посета денес се реализираше токму во Одделот за сузбивање на организиран и сериозен криминал.
Тошковски потенцираше дека целта на ова раководство на МВР е создавање на полиција која ќе работи исклучиво во служба на граѓаните и вистински ќе се бори со криминалот.
Директорот на Бирото за јавна безбедност Александар Јанев денеска при преземање на функцијата потенцираше дека ќе работи под мотото ред, закон и интегритет за создавање на безбедност без компромис за сите граѓани со висок стандард на професионализам и посветеност на полициските службеници.
Македонија
Мицкоски: Ветувањето за повисоки пензии го реализиравме во првите пет дена од формирањето на владата
![](https://makfax.com.mk/wp-content/uploads/2024/06/28062024_SREDBA_MICKOSKI_ZDRUZENIE-NA-PENZIONERI-VELES-7.jpg)
„На почетокот на октомври се сеќавам како многумина од вас кажуваа со какви се предизвици се соочувате. И тогаш главната идеа потекна од оваа средба да имаме комплетна промена на концептот во пензискиот систем, а тоа е да имаме линеарно покачување на пензиите на пензионерите. На тој начин практично сите пензионери ќе добијат подеднакво и нема да се создава преголема разлика помеѓу малкумина и повеќе од 80% од пензионерите.“, истакна премиерот Христијан Мицкоски на денешната средба со здружението на велешките пензионери, после одлуката на Владата за зголемување на пензиите.
„И тогаш рековме и денес сакам тоа да го потврдам, дека наша главна цел ќе ни биде нашите повозрасни сограѓани да имаат подостоинствени пензионерски денови, односно во најубавите години од својот живот да може да се чувствуваат пристојно и достоинствено, а не како што беше минатата есен и зимата, кога за жал нашите родители, дедовци, баби, наместо да ги поминуваат пензионерските денови онака како што заслужуваат, тие чекореа по улиците и плоштадите ширум Македонија, барајќи поголеми права и повисоки пензии.“, истакна Мицкоски.
Тој посочи дека е направена детална анализа и врз основа на тоа беше дадено ветувањето дека во првата година од мандатот ќе се направи линеарно зголемување на пензиите за пет илјади денари.
„Денес на седницата на Владата како точка за информирање донесовме заклучок дека пензиите кои што треба да бидат нивелирани, сега во месец септември, а потоа и во месец март следната година, ќе го вклучат тоа линеарно покачување, најпрвин од 2.500 денари сега во септември, и уште 2,500 денари и во месец март. Тоа значи дека најпрвин за три месеци, па за 9 месеци, порано од таа една година што ја ветувавме, тие 5.000 денари линеарно зголемување на пензиите за пензионерите ќе бидат веднаш исплатени“, рече претседателот на владата.
Тој потенцираше дека се правеле напори и сега во септември да се исплатат во целост 5.000 денари покачување на пензиите, но во овој буџет ваков каков што е, недостасуваат 2,5 милијарди денари за редовното исплаќање на пензиите. Со оглед на тоа дека со ново покачување ќе бидат зафатени исто толку пари, со ребалансот на буџетот ќе бидат реструктуирани 5 милијарди денари или повеќе од 80 милиони евра.
„Она кое што го ветивме при нашата средба во октомври месец 2023 година, тоа и го реализираме во првите пет дена од формирањето на новата влада.“, посочи Мицкоски и дополни дека главен приоритет во периодот кој што следи ќе биде и здравствениот систем.
„Заедно работевме со министерот Арбен Таравари. Во подготовка е новиот закон во кој ќе направиме рационализација на функционерите во здравството, односно ќе дојде до бришење на делот во кој беа т.н. организациски или кај народот познати, економски директори. И тоа веќе министерот Таравари го направи, голем дел од нив кои што беа вршители на должност кои беа без мандат, заминуваат во историја, а со овој нов закон кој влезе во владина процедура, ќе бидат сите организациски директори укинати. На тој начин практично ќе имаме поефикасна и поевтина работа и повеќе пари кои ќе останат за здравствените осигуреници.“, рече Мицкоски во Велес.