Министерот за надворешни работи и надворешна трговија, Тимчо Муцунски, обвини дека поранешниот амбасадор во Њујорк, Љубомир Фрчкоски, направил значителни финансиски злоупотреби во текот на својата дипломатска должност. Според Муцунски, истрагата на министерството покажала штета во износ од шест цифри во евра, а извештајот ќе биде доставен до надлежните институции до крајот на месецот.

„Треба да му биде на секого јасно дека тоа што го видов, сум загрижен. Вакви состојби не смеат да се повторуваат како што се случувале во изминатите години. Индициите укажуваат на штета во шестоцифрен износ. Беше споменат и терминот тужба, но и другата страна ќе има право да приложи свои аргументи и докази,“ изјави Муцунски.

Министерот истакна дека постапката сè уште е во тек, поради што деталите не можат целосно да се откријат, но увери дека ќе се постапува според законските процедури.

На обвинувањата на Муцунски, Љубомир Фрчкоски возврати со отфрлање на наводите, нарекувајќи ги манипулативни и наивни. Тој јавно го повика министерот да презентира конкретни докази за злоупотреба на јавни средства.

„Го повикувам министерот јавно, со минимум аргументи и докази, да покаже случај на финансиска злоупотреба, дури и ако е во двоцифрен износ. Покажете го тоа што наводно сум го направил надвор од овластувањата и со кое сум го оштетил буџетот или приватно сум злоупотребил средства,“ рече Фрчкоски.

Тој го обвини министерот за спроведување „вмровски истраги“ и користење нелиценцирани ревизори, што, според него, е правно проблематично и не може да се користи како основа за правна постапка.

„Министерот прави елементарни правни пропусти за да добие посакуван резултат со конструирање на наводни злоупотреби. Ако навистина има намера да дојде до вистината, нека води нормални истраги, а не политички инспирирани обвинувања,“ додаде Фрчкоски.

Најмалку три лица го загубија животот, а десетина се повредени откако експлозивна направа била фрлена меѓу посетителите на фестивал организиран од Црвениот крст во северната провинција Так, Тајланд. Инцидентот се случил доцна ноќеска, пред полноќ по локално време, на саемот во областа Умфанг.

Според локалните медиуми, експлозијата се случила на отворена сцена каде посетителите танцувале, предизвикувајќи хаос и паника. Тајландската полиција потврди дека двајца осомничени се приведени, но засега не е покренато обвинение против нив.

Премиерката Паетонгтарн Шинаватра, преку објава на социјалната платформа Х, изрази длабоко сочувство до семејствата на жртвите и повредените. Таа најави дека полицијата и безбедносните агенции ќе работат на утврдување на причините за нападот.

„Ова е трагичен настан кој не смее да се повтори. Наредив зголемено присуство на полицијата на сите фестивалски настани за да се гарантира безбедноста на граѓаните,“ изјави Шинаватра.

Истовремено, премиерката повика на итна помош за сите настрадани, додека истрагата продолжува. Настанот остави горчлива дамка врз традиционалниот фестивал, кој е познат како место на радост и културни изведби.

Во текот на вчерашниот ден пристигнале пријави за злоупотреба на исплатата на К-15 или регресот за годишен одмор во реалниот сектор, а само од пет големи компании во земјава, кои вработуваат над 2.000 работници. Кристина Ампева од „Гласен Текстилец“ изјави дека се јавуваат првите пријави за принудно потпишување на бланко листови од страна на работодавачите, кои пријавуваат дека работат со загуба.

„Овие работодавачи се обидуваат да го заобиколат законот и да исплатат К-15 во многу понизок износ – 2.000, 1.000, 500, па дури и 100 денари“, изјави Ампева. Според неа, овие дејства се злоупотреби кои го поткопуваат законскиот пропис, кој предвидува дека К-15 треба да биде 40% од просечната плата, но не наведува конкретен износ кој не смее да биде под тоа ниво.

Ампева истакна дека ова е единствениот начин да се запрат злоупотребите на сметка на работниците, кои се жртви на ваквите практики.

„Не можам да ги обвинам организациите на работодавачи бидејќи тие го бранат својот капитал“, додаде таа.

Таа смета дека казните за работодавачите се премногу ниски и дека единственото што државата може да направи е да поттикне Управата за јавни приходи (УЈП) да изврши контрола во компаниите кои пријавиле загуба, за да се утврди дали има злоупотреби со исплатата на регресот.

„Казните во време на претходната власт на работодавачите им дадоа ветер во грб за да ги кршат законите. Треба да се стави акцент на проверката на тие кои пријавуваат загуба, но истовремено некои од нив се купуваат нови автомобили, вили или станови, додека исплаќаат помала сума на регрес за годишен одмор“, истакна Ампева.

Во реалниот сектор, работниците треба да добијат К-15 во износ од 16.800 денари, додека вработените во администрација треба да добијат 11.000 денари. Исплатата на К-15 е предвидена да биде завршена до крајот на годината.