Региони
Промоција на компјутерска игра за одгледување јаболка
Во рамките на годинешниот Преспански јаболкобер, во сабота, во Ресен ќе биде промовирана работна верзија на компјутерска игра, базирана на платформата на Фејсбук, наменета за промовирање на современи методи на одгледување јаболка
Според идеја од Проектот за заштита на Преспанското Езеро на Програмата за развој на Обединетите Нации (УНДП), финансиран од амбасадата на Швајцарија, македонските агрономи и стручњаците од Факултетот за информатички науки и компјутерско инженерство од Скопје, заедно со група фармери ентузијасти од Преспа, развиваат компјутерска игра низ која ќе можат да се совладаат начините на правилно одгледување овошје, на примерот на одгледување јаболка во Преспа.
Географските и климатските карактеристики на Преспа се вградени во основата на играта, која наскоро ќе може да се игра во целиот свет.
Денеска десет млади преспанци на плоштадот во Ресен во живо ќе се натпреваруваат во играта, овозможувајќи им така можност на експертите да го проценат досегашниот стадиум на развој на играта и евентуалните можности за нејзино унапредување.
Играта пред ресенчани и нивните гости на Јаболкоберот ќе ја промовираат Високиот претставник на Обединетите Нации, Луиза Винтон, деканот на ФИНКИ д-р Иван Чорбев, и нивниот домаќин, градоначалникот на Ресен, Ѓоко Стрезовски./крај/со/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Региони
Поради магла и загаден воздух, откажани летовите на аеродромот во Сараево
Поради лошите временски услови предизвикани од магла синоќа и утринава откажани се некои летови на меѓународниот аеродром во Сараево.
Од меѓународниот аеродром во Сараево откажани се летовите кои пристигнуваат од Виена, Истанбул и Загреб, а со тоа и појдовните летови од Сараево.
„Останатите летови засега се на распоред и очекуваме наскоро да се подобрат временските услови на меѓународниот аеродром во Сараево“, велат од аеродромот за сараевската телевизија N1.
Македонија
(Видео) Торказ се сретна со Џафери и повика на почитување на меѓународните договори од сите страни
На маргините на лидерскиот состанок за планот за раст, кој се одржува во Котор, Црна Гора, претседателот на Владата на Република Северна Македонија, Талат Џафери, имаше билатерална средба со специјалниот пратеник за Западен Балкан на Франција, Рене Троказ.
„На средбата се разговараше за важноста од продолжување на европскиот пат на Република Северна Македонија во пресрет на формирањето на новата влада. Троказ ја истакна натамошната француска поддршка на европската интеграција на Северна Македонија во ЕУ и повика на почитување на меѓународно преземените договори од сите политички фактори. Премиерот Џафери изрази надеж дека земјата ќе ги заокружи неопходните чекори за продолжување на европската агенда. Во таа насока ја сподели загриженоста од непочитувањето на уставното име од страна на новоизбраната претседателка на државата и повика на почитување на меморандумот потпишан пред изборите од страна на политичките партии во поглед на предусловите за нашето интегрирање во Европската Унија“, соопштија од кабинетот на Џафери.
Џафери и во Котор нагласи дека за него не е приоритет кој ќе ја сочинува новата влада, туку исполнувањето на европската агенда како пат кон иднината, на кој ќе продолжи да работи во кое било својство и функција.
Македонија
Опасен отпад детектиран во близина на скопското село Орман
При редовна обиколка од страна на Државниот инспекторат за животна средина на територијата на Општина Ѓорче Петров, на 10 октомври лоцирано е одлагање на згура од преработка на акумулаторски батерии на во близина на селото Орман. Станува збор за опасен отпад во количина од околу 500 до 600 тони.
„Според затекнатата состојба на теренот, а според Листата на видови на отпад (Сл.Весник на РМ бр.100/2005) се работи за отпад со шифра 10 04 – Отпад од пирометалургија на олово,10 04 01*- троски од примарно и секундарно производство, која според класификацијата спаѓа во класата на опасен отпад“, информираат од Државниот инспекторат.
Сопствениците на катастарската парцела на која се наоѓа отпадот со решение од Државниот инспекторат се задолжени да извршат неговата дислокација во рок од 30 дена од издавање на решението.
Граѓаните на социјалните мрежи бараат одговорност и одговор од каде доаѓа отпадот и кој е виновникот за неговото одложување токму на оваа локација која е во непосредна близина на реката Лепенец и населените места Волково и Орман.