Европа
ЕУ и УНИЦЕФ заедно против насилството врз децата во ЈИЕ
Европската унија (ЕУ) и УНИЦЕФ го проширија важното регионално партнерство чија цел е децата да се заштитат од насилство, а децата со попреченост подобро да се вклучат во општеството.
Од 2011 година, УНИЦЕФ и ЕУ соработуваат со земјите во процес на пристапување кон ЕУ, како што се Албанија, Босна и Херцеговина, Србија и Турција. Ова партнерство сега се проширува за да ги вклучи Косово*, Црна Гора и поранешната југословенска Република Македонија. Почнувајќи од оваа година, Европскиот форум за попреченост (EDF) се приклучи кон партнерството. Насилството е секојдневна реалност за илјадници деца низ цела Југоисточна Европа. Податоците покажуваат дека над 50 проценти од машките и девојчињата на возраст од 2 до 14 години (а во некои земји, над 70 проценти) биле изложени на барем една форма на физичко или тешко психичко казнување од страна на членовите на семејството. Кога насилството се случува во семејството, на многу деца сè уште им е крајно тешко да зборуваат со надворешни лица за тоа, а камоли да бараат заштита и обесштување. Состојбата на децата со попреченост е дури уште посложена: често, тие се одделени од семејствата, премногу се застапени во институции со престој, се чуваат вон училиштата и исклучени се од секојдневниот јавен живот. Се соочуваат со предрасуди, стигматизација и тешка дискриминација. Многу од нив се „невидливи“ – не се претставени во официјалните податоци. Исто така, тие имаат речиси четирипати поголеми изгледи да доживеат насилство. ЕУ и УНИЦЕФ ќе вложат 5,89 милиони евра – од кои 5 милиони евра доаѓаат од ЕУ – за ова регионално партнерство во текот на следните три години, и натаму цврсто ќе се залагаат секое дете да биде заштитено од сите форми на насилство и да биде рамноправен член на општеството. „Веруваме дека ова партнерство може да внесе вистинска промена во животот на децата во регионот. Се потпираме врз стручноста и знаењето на УНИЦЕФ и EDF да влијаат врз политиките што ги засегаат децата кои се жртви на насилство и децата со попреченост. Во исто време, од клучно значење е да се допре до граѓанско-активистичките организации кои работат на заштита на децата и да се промовира инклузија на децата во општеството. Затоа, голем дел од средствата ќе бидат наменети за поддршка на мали граѓански организации, со цел да се постигне вистинска промена и одржливо подобрување на секојдневниот живот и идната перспектива на децата“, рече Јоханес Хан, комесарот на ЕУ за европска соседска политика и преговори за проширување. Партнерството ќе придонесе кон подобрување на координацијата за мултисекторски одговор на насилството врз децата. Клучните професионалци ќе добијат подобри податоци, иновативни алатки, знаења и механизми за спречување или одговор на насилството, злоупотребата и запоставувањето, како и за намалување на социјалната дистанца меѓу децата со и без попреченост. „Секој случај на насилство врз децата е премногу. Нивниот живот, здравје, безбедност, образование и иднина се ставени на ризик, а тие може да бидат обележани за цел живот. Мора да го кренеме гласот против насилството и дискриминацијата. Неприфатливо е да се користи насилство врз децата, особено врз децата кои се најранливи. Мора да најдеме ефективни решенија во земјата и заедницата за да ги заштитиме правата на сите деца и да им помогнеме да побараат обесштување“, вели Мари-Пјер Поаре, регионален директор и специјален координатор за бегалско-мигрантската криза во Европа. Организациите на лицата со попреченост, вклучувајќи ги и самите деца со попреченост, ќе играат погласна и поактивна улога во мониторирањето и влијанието врз политиките за еднакви права и социјална инклузија на децата со попреченост. „Од суштинска важност е децата со попреченост да бидат вклучени во сите активности за спречување на насилството врз децата. Исто така, оваа иницијатива е многу важна затоа што нејзината цел е да се изгради капацитет и да се вклучат организациите на лицата со попреченост и другите членови на граѓанскиот сектор. EDF со задоволство е партнер со УНИЦЕФ и ЕУ, за да помогне правата на децата со попреченост да станат реалност во регионот, каква што е нашата цел во Европа и во светот“, вели Јанис Вардакастанис, претседател на Европскиот форум за попреченост./крај/со/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Грузија сака да донесе закон за „странски агенти“, oфицијален претставник на ЕУ: Неприфатливо
Висок функционер на Европската унија денеска ја предупреди грузиската влада дека предложениот закон за „странски агенти“ е неприфатлив и ќе претставува пречка во напорите на земјата да се приклучи кон ЕУ, доколку биде усвоен во сегашната форма.
Грузискиот парламент вчера го усвои законот во второто читање, за кој опозицијата вели дека е инспириран од Кремљ, додека полицијата употреби солзавец и шок-бомби за да ги растера толпата демонстранти.
Владата смета дека законот е неопходен за да се гарантира транспарентно странско финансирање на невладините организации.
Секоја вечер, речиси еден месец, се поголем број демонстранти излегуваат на улиците. Вчера десет илјади демонстранти го блокираа центарот на Тбилиси на најголемиот антивладин митинг организиран досега.
Герт Јан Купман, директор на Управата за проширување на Европската комисија, за новинарите во главниот град на Грузија изјави дека Брисел ја следи ситуацијата и е загрижен за тоа што се случува.
„Гледаме загрижувачки случувања кога станува збор за законодавството. Законот за транспарентност, кој беше усвоен во второ читање, е неприфатлив во сегашната форма и ќе создаде сериозни пречки на патот кон пристапување во ЕУ“, рече Купман.
„Но, има уште време. Во септември ќе излеземе со препораки дали да ги започнеме пристапните преговори со Грузија и да објавиме извештај во октомври и ноември, така што има уште време. Но, сега топката кај владата“, додаде тој.
Грузискиот парламент се очекува да го разгледа законот во третото читање за околу две недели.
Европа
Русија: Не ја гледаме поентата на мировната конференција во Швајцарија
Русија објави дека не ја гледа поентата на конференцијата за прекин на огнот во Украина што Швајцарија ја планира за средината на јуни и на која Москва не беше поканета. Швајцарската влада соопшти дека Русија „во овој момент“ не е меѓу десетиците поканети земји, додавајќи дека е отворена за нејзино учество, но дека Москва не е заинтересирана. Берн го најави собирот во јануари, велејќи дека го организирал на барање на украинскиот претседател Володимир Зеленски.
Портпаролот на Кремљ, Дмитриј Песков, нагласи дека Москва не ја смета за веродостојна иницијатива.
„Не разбираме каква пресвртница би била таа мировна конференција“, им рече тој на новинарите. „За каква конференција зборуваме, за каква сериозна конференција со сериозни очекувања дека ќе има некакви резултати, без учество на Русија?
„Тоа е целосно невозможно и јасно е дека тоа е некаква иницијатива која не е фокусирана на резултати“, заклучи тој.
Швајцарската влада соопшти дека „мировниот процес не е можен без Русија. Украина, од друга страна, ги доведува во прашање придобивките од руското учество на состанокот што ќе се одржи во близина на градот Луцерн.
„Знаеме дека нема смисла да ја имаме Русија на маса ако не можете да се осигурате дека таа ќе дејствува со добра волја“, рече шефот на украинската дипломатија Дмитро Кулеба минатата недела во интервју за магазинот „Форин полиси“.
Кулеба смета дека создавањето дополнителен притисок врз Русија на бојното поле и обединувањето на земјите „кои ги делат принципите“ ќе помогнат Русија да биде подготвена да учествува во дијалогот.
Европа
Макрон не ја исклучува можноста за испраќање војници во Украина доколку Русија „ја пробие линијата на фронтот“
Францускиот претседател Емануел Макрон во интервју за Економист изјави дека не ја исклучува можноста за испраќање војници во Украина доколку Русија „ја пробие линијата на фронтот“ и ако Киев тоа го побара од Париз, пренесува BFMTV.
„Доколку Русите ги пробија првите линии на фронтот и ако има украинско барање – што не е случај денес – би било легитимно да се постави тоа прашање“, рече Макрон.
Веќе во февруари, Макрон ја покрена можноста за испраќање западни трупи на украинска територија, потсетува БФМ.
„Како што кажав, не исклучувам ништо бидејќи има некој од другата страна кој не исклучува ништо. Без сомнение, бевме премногу сомнителни кога ги дефиниравме границите на нашата акција”, рече францускиот претседател.
Макрон рече дека „априори отфрлањето“ на можноста за испраќање војници би значело дека „не се научени лекциите од последните две години“, бидејќи во летото 2022 година биле против испраќање тенкови, ракети со долг дострел и авиони. и сега сето ова го испорачуваат во Украина.
„Имам јасна стратешка задача: Русија не смее да победи во Украина. Ако Русија победи во Украина, нема да има безбедност во Европа“, додаде тој.
„Кој може да тврди дека Русија ќе застане таму? Каква безбедност има за другите соседни земји, Молдавија, Романија, Полска, Литванија и толку многу други? И тогаш, каков кредибилитет има за Европејците кои би потрошиле милијарди, велејќи дека тоа е опстанокот на континентот и не би обезбедиле средства за запирање на Русија. Така да, не треба ништо да исклучуваме“, истакна Макрон.