Како што јавуваат граѓани од скопската населба, околу 15 часот била ограбена новата експозитура на УНИ Банка во Кисела вода, недалеку од Стара Чешма, од еден вооружен разбојник, што по грабежот избегал. За половина час раководството на УНИ Банка и полицијата најавуваат официјално соопштение

Министерството за внатрешни работи се’ уште нема информации, затоа што пријавата и целиот извештај ќе го подготви полициската станица „Пролет“ на чиј реон е извршено разбојништвото. Во тек е информативен разговор со вработените во банката. Едно лице вооружено со пиштол влегло во банката пред 15 часот и заканувајќи им се на вработените одзел пари. Работниците во дуќанот од спротивната страна на улицата Првомајска, забележале дека имало инцидент дури кога дошла полицијата. Никој од вработените во околните дуќани не виделе ништо, а забележале дека нешто се случува откако забележале дека полиција стигнала во банката. Службеници од крим-техника земаа отпечатоци од објектот, кога екипата на forum.com.mk стигна на местото на настанот. Не се забележува штета во банката, ниту од надвор. Прозорците и вратите се здрави, па се претпоставува дека разбојникот влегол во банката како клиент. Вработените во банката не сакаа да соопштат детали, до официјалното соопштение, но се обидуваа да ја минимизираат состојбата, изјавувајќи дека ништо страшно не се случило. Се` уште не се знае за колкава сума пари се работи, но вработените во експозитурата на банката беа видно вознемирени од вооружениот грабеж.Извори од банката велат дека грабежот не бил успешен, односно дека напаѓачот (според нивната верзија) не успеал во заканите врз вработените. Ова е втор грабеж на експозитура на УНИ Банка за кус период, имено пре десетина дена беше ограбена експозитурата на оваа банка во трговскиот центар во „Мавровка“.