Приврзаниците на претседателот на „Обединети за Македонија“ и поранешен министер за внатрешни работи, Љубе Бошкоски во понеделник излегоа на протест пред затворот „Идризово“ во Скопје, каде тој ја издржува затворската казна за случајот „Кампања“ и бараат директорот на затворот, Живко Пејковски да го потпише решението и Бошкоски во вторник да излезе од затвор.

Демонстрантите обвинуваат дека власта врши притисок врз Бошкоски да биде ослободен после предвремените парламентарни избори, иако според нив, законски директорот може да го пушти затвореникот на слобода ако одлежал три четвртини од казната, односно 90 дена пред истекувањето на казната, во случајот на Бошкоски.Адвокатот на Бошкоски, Константин Кратовалиев, за време на протестот го посети Бошкоски во затворот.„Очекуваме дека директорот ќе го потпише решението за пуштање на Бошкоски од затвор. Исполнети се законските услови и 90-те дена, за кои директорот може да отпушти осудено лице, почнуваат да течат денеска на полноќ. Директорот во секој момент може да го потпише решението. Ако му биде одземено ова право на Бошкоски, врз основа на објективни пречки, а такви пречки не постојат бидејќи и Судот и воспитувачкиот кадар во затворот имаат изразено позитивно мислење, тоа ќе значи дека Јавно обвинителство ќе треба да утврди дали постои злоупотреба на службената положба и овластување од страна на директорот“, изјави Кратовалиев.Генералниот секретар на Обединети за Македонија, Раде Милососки рече дека заменикот Министер за правда, Билјана Бришкоска Бошковска и директорката на Управата за извршување на санкции, Лидија Гавриловска вршеле притисок врз Пејковски да не го потпише решението. Бошкоски беше уапсен еден ден по изборите во 2011 година, на 6 јуни заради незаконско финансирање на изборната кампања и злоупотреба на службената положба. Неговата казна истекува на 6 јуни оваа година, но според Законот за извршување на санкции, директорот на затворската установа може да го отпушти осуденото лице и пред истекот на казната ако издржало најмалку три четвртини од казната затвор и ако не добило условен отпуст, и тоа до 30 дена за казна затвор до една година, до 90 дена за казна затвор до пет години и до 120 дена за казна затвор над пет години.Директорот на затворот, Пејковски во разговор за Макфакс изјави дека ќе излезе со став и соопштение по протестот. Според него, на Бошкоски казната му истекува на 6 јуни, а за неговото право да излезе 90 дена пред истекот на казната, рече дека можеби постојат законски пречки. Не сакаше да коментира какви законски пречки постојат во овој случај и рече дека ќе ги објасни во соопштението.На Бошкоски му се суди и за случајот „Ровер“, односно за вмешаност во убиството на Марјан Тушевски и Киро Јанев како тогашен министер за внатрешни работи. За овој случај, Апелациониот суд ја враќа пресудата два пати и на обвинетите им се суди по трет пат. Сите обвинети се ослободени од притвор./крај/ффс