Култура
Милчо Манчевски – во жири во Сараево
Режисерот Милчо Манчевски ќе го предводи жирито во натпреварувачката програма за краток филм на годинашниот 17. Сараевски филмски фестивал, кој ќе се одржи од 22 до 30 јули во Сараево.
Режисерот Милчо Манчевски ќе го предводи жирито во натпреварувачката програма за краток филм на годинашниот 17. Сараевски филмски фестивал, кој ќе се одржи од 22 до 30 јули во Сараево.Милчо Манчевски е особено почитуван во Сараево поради неговата поддршка на фестивалот во неговите почетоци. Неговиот прв филм „Пред дождот“ беше прикажан додека Сараево се уште беше под опсада, а Манчевски допатува на премиерата во опседнатиот град со оклопно возило на УНПРОФОР, по патување кое траело цели 14 часа.Во следните години, Манчевски го помогнал фестивалот составувајќи го почесниот борд на директори на фестивалот и лично обезбедувајќи ја поддршката од реномираните членови, како Мартин Скорсезе, Нагиса Ошима, Милош Форман, Ричард Гир и Џило Понтекорво.На годинашното издание на СФФ, на 26 јули ќе биде прикажан и филмот „Мајки“, во рамките на програмата „Во фокус“. Филмот се прикажува надвор од конкуренција заради учеството на Манчевски во стручното жири.Филмот „Мајки“ победи на белградски ФЕСТ, а ја освои и наградата „Федеора“ на Федерацијата на европски и медитерански филмски критичари на Синема Сити фестивалот.Светската премиера на „Мајки“ беше на фестивалот во Торонто, а европската во престижната програма „Панорама“ на Берлинале 2011. Филмот беше и македонски кандидат за Оскар.Во последниве неколку месеци „Мајки“ беше прикажан на филмските фестивали во Аруба, Пула, Москва, Истанбул, Кливленд, на Канарските Острови, во Литванија, Нови Сад, Сао Паоло, а следуваат уште бројни покани во текот на 2011 и 2012 година.Филмот „Мајки“ на Милчо Манчевски е македонско-француско-бугарска копродукција./крај/макфакс/т.д.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Денес е Ден на македонскиот јазик
Петти мај е прогласен за „Ден на македонскиот јазик“. На овој ден во 1945 година, со решение на Народната влада на Федерална Македонија е усвоена азбуката на македонскиот јазик врз принципот еден глас – една буква, а набргу потоа, на 7 јуни 1945, е усвоен и Правописот на македонскиот јазик.
Кодификацијата на современиот македонски стандарден јазик се заокружува со делата на Блаже Конески – Граматиката на македонскиот литературен јазик, Речникот на македонскиот јазик и Историјата на македонскиот јазик.
Култура
Инспиративен настап на SIN PUSTINJE во Битола за Меѓународниот ден на џезот 2024
МКЦ-Битола по јубилеен 10-ти пат го одбележа Меѓународниот ден на џезот во Битола 2024. Во прекрасниот амбиент на кафе барот Порта Џез, Ахмед Буриќ, Дамир Имамовиќ, Тони Китановски и Иван Михајловиќ приредија несекојдневно музичко поетско доживување.
Во проектот станува збор за искуството и интерпретацијата на музиката и поезијата која ги сумира различните интереси и вештини на уметниците кои досега ги познававме од другите жанрови. На концертот Буриќ, Имамовиќ, Китановски и Михајловиќ изведоа дванаесеттина песни од нивниот прв албум, како и некои други делови кои на изведбата во живо му дадоа комплетна форма и магична атмосфера.
Овој концерт по десетти пат ја стави Битола на глобалната мапа на градови кои го одбележуваат Меѓународниот ден на џезот и ги слават вредностите кои тој ги промовира. Битола ја ставаме на иста линија со светските метрополи кои имаат почит кон уметноста како начин на живот и извор на енергија не само за уметниците туку и за обичните граѓани.
Концертот се организира со финансиска поддршка на Министерството за култура и Општина Битола.
Култура
Вердиевата спектакуларна опера „Трубадур“ на 11 мај на „Мајските оперски вечери“
На 11 мај со почеток во 20.00 часот ќе се изведе спектакуларната опера „Трубадур“ од Џузепе Верди, во рамките на 52. издание на меѓународниот фестивал „Мајски оперски вечери“. Билетите за премиерната изведба на „Трубадур“ на 9 мај се распродадени.
Диригент е Иван Еминовиќ, режијата е на реномираниот македонски режисер, Иван Поповски кој живее и работи во Москва повеќе од две децении и за своите врвни уметнички достигнувања е добитник на највисоки признанија во Русија и низ светот и за првпат поставува опера на македонската сцена. Сценографијата е на Миодраг Табачки од Србија, костимографијата е на Марија Пупучевска, а кореографијата на Саша Евтимова.
Во улогата на Манрико ќе настапи гостинот од Чиле, Филипе Рохас, тенор кој настапувал на повеќе светски сцени, во улогата на Гроф Луна ќе настапи нашиот баритон Ристе Велков, во улогата на Леонора ќе настапи гостинката од Канада Криста де Силва, драмски сопран препознатлива по нејзините темни мистични бои. Во улогата на Ацучена ќе настапи, Сања Анастасиа, мецосопран, првенка на операта во Народниот театар во Белград. Во улогата на Ферандо ќе настапи нашиот бас, Владимир Саздовски кој е чест гостин на светските оперски сцени. Во останатите улоги ќе настапат: Јане Дунимаглоски, Ана Ројдева, Тихомир Јакимовски и Дејан Стоев во придружба на хорот и оркестарот на Националната опера и балет.
Романтична љубов, смртна љубомора и oдмазда се движечките драмски елементи на операта „Трубадур“ од италијанскиот музички мајстор Џузепе Верди. Операта се одликува со прекрасна музика и спектакуларно предводени вокални делови кои пренесуваат силни емоции, додека исклучително сложената приказна изобилува со огнена страст.