Министерството за образование и наука најверојатно во средината на декември ќе донесе одлука дали ќе има екстерно тестирање на факултетите. Министерот Абдилаќим Адеми вели дека тој сака се воведе оваа реформа, но дека одлуката зависи од повеќе фактори. 

„Лично, повеќе сум наклонет да има, но не зависи само од мене, туку од повеќе фактори. Пред сѐ од Одборот за акредитација кој треба понатаму да ги спроведува сите активности, потоа универзитетите, студентите, политиките на Владата од аспект на образованието. Ако се одлучиме да има, тоа мора да биде без нарушување на автономијата на универзитетите,без загрозување на Болоњскиот процес и без да има дополнителен товар како за универзитетите така и за студентите“, изјави Адеми во вторник на отворањето на Деновите на државно учење. 

Тој го оцени протестот на студентите, што се одржа во понеделник, 17-ти ноември, како легитимно и гарантирано право во демократско општество. Но, според него е несфатливо зашто имало протест кога сѐ уште не е одлучено дали ќе има екстерно тестирање или не. 

Според него, студентите не биле вистинските организатори на протестот. 

„Примив писмо во кое нема ништо конкретно за екстерното оценување. Има барање за оставка на министер, а се знае дека оставка секогаш бараат политички партии, а не студенти. Подготвив одговор на писмото но, за жал, не можам да го доставам зашто во писмото нема ни име ни адреса. Деновиве очекувам да добијам име на организаторот и адреса, за да им пратам одговор, а ако не добијам, тогаш јавно ќе одговорам преку средствата за јавно информирање“, рече Адеми. 

Во врска со моделот на проверка на знаењето доколку се воведе, Адеми рече дека сѐ уште не е одлучено дали тоа ќе биде државен испит, дали ќе биде друга форма и кога ќе се донесе одлука истата ќе биде споделена јавно. 

Тој вели доколку се воведе тестирање тоа ќе биде во функција на зголемување на квалитетот на високото образование. 

„Не велам дека виското образование не е квалитетно. Квалитетно е, но има дел од неквалитетното кое може да го загрози целиот образовен систем. Има универзитети во кои студентите што се запишани не го знаат ни македонскиот, ни албанскиот јазик, им предаваат со слушалки. Има студенти кои не следат настава, а добиваат оценки. Ги следиме тие состојби, но мора да ставиме и правни механизми тие студенти сами да се исклучат од образовниот систем, а не сите студенти да ги ставиме во ист кош“, рече Адеми.крај/мф