Култура
Биеналето во Скопје е доказ за нашата припадност во Европа
Македонскиот претседател Ѓорге Иванов вчера, во придружба на министерката за култура Елизабета Канческа – Милевска и претседателот на Биеналето Луиџи Ретклиф посети дел од изложбите на Биеналето во Музејот на современа уметност, КИЦ и Музејот на Град Скопје
„Македонија со Биеналето на млади уметници од Европа и Медитеранот покажа дека може да биде домаќин на она што се твори во цела Европа, да го покаже духот на творештвото и креативноста што владее кај нас. Конечно со укинување на визите, нашите уметници и сите млади творци, креативци ќе можат да и покажат на Европа колку може Македонија да придонесе и во создавањето на современата уметност, на современата култура“ – изјави претседателот на државата Ѓорге Иванов. По разгледувањето на презентираните дела во различни формати, изработени во различни техники во сите изложбени музејски сали, своето задоволство од текот на манифестацијата го изрази и министерката за култура Елизабета Канческа – Милевска, говорејќи за голема раздвиженост во Скопје поради присуството на над 700 уметници од 46 држави. Според неа, големото значење на Биеналето за државава лежи и во презентација на културно наследство преку организирани тури за уметниците и во другите градови.Во Музејот на современата уметност се изложени дела во различни формати, изработени во различни техники од шеесетина млади визуелни уметници, меѓу кои има и македонски автори. Досега Музејот добил и донација на едно дело од италијанска уметница, а две дела се донирани и во Мултимедијалниот центар Мала станица.Луиџи Ретклиф, претседателот на Биеналето, во оваа прилика укажа на неколку моменти кои досега не биле практика при неговото одржување во другите земји – да се одржува на повеќе локации, во институции од национално значење и во објекти со потврдена културно-историска вредност. Ја потенцираше како многу значајна и невообичаена за другите градови, таквата презентација токму на творештвото на младите уметници, а го издвои и фактот дека претседателот Иванов е и прв претседател на држава кој го посетил Биеналето, чие 14. издание во Скопје се одржува по прв пат.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Денес е Ден на македонскиот јазик
Петти мај е прогласен за „Ден на македонскиот јазик“. На овој ден во 1945 година, со решение на Народната влада на Федерална Македонија е усвоена азбуката на македонскиот јазик врз принципот еден глас – една буква, а набргу потоа, на 7 јуни 1945, е усвоен и Правописот на македонскиот јазик.
Кодификацијата на современиот македонски стандарден јазик се заокружува со делата на Блаже Конески – Граматиката на македонскиот литературен јазик, Речникот на македонскиот јазик и Историјата на македонскиот јазик.
Култура
Инспиративен настап на SIN PUSTINJE во Битола за Меѓународниот ден на џезот 2024
МКЦ-Битола по јубилеен 10-ти пат го одбележа Меѓународниот ден на џезот во Битола 2024. Во прекрасниот амбиент на кафе барот Порта Џез, Ахмед Буриќ, Дамир Имамовиќ, Тони Китановски и Иван Михајловиќ приредија несекојдневно музичко поетско доживување.
Во проектот станува збор за искуството и интерпретацијата на музиката и поезијата која ги сумира различните интереси и вештини на уметниците кои досега ги познававме од другите жанрови. На концертот Буриќ, Имамовиќ, Китановски и Михајловиќ изведоа дванаесеттина песни од нивниот прв албум, како и некои други делови кои на изведбата во живо му дадоа комплетна форма и магична атмосфера.
Овој концерт по десетти пат ја стави Битола на глобалната мапа на градови кои го одбележуваат Меѓународниот ден на џезот и ги слават вредностите кои тој ги промовира. Битола ја ставаме на иста линија со светските метрополи кои имаат почит кон уметноста како начин на живот и извор на енергија не само за уметниците туку и за обичните граѓани.
Концертот се организира со финансиска поддршка на Министерството за култура и Општина Битола.
Култура
Вердиевата спектакуларна опера „Трубадур“ на 11 мај на „Мајските оперски вечери“
На 11 мај со почеток во 20.00 часот ќе се изведе спектакуларната опера „Трубадур“ од Џузепе Верди, во рамките на 52. издание на меѓународниот фестивал „Мајски оперски вечери“. Билетите за премиерната изведба на „Трубадур“ на 9 мај се распродадени.
Диригент е Иван Еминовиќ, режијата е на реномираниот македонски режисер, Иван Поповски кој живее и работи во Москва повеќе од две децении и за своите врвни уметнички достигнувања е добитник на највисоки признанија во Русија и низ светот и за првпат поставува опера на македонската сцена. Сценографијата е на Миодраг Табачки од Србија, костимографијата е на Марија Пупучевска, а кореографијата на Саша Евтимова.
Во улогата на Манрико ќе настапи гостинот од Чиле, Филипе Рохас, тенор кој настапувал на повеќе светски сцени, во улогата на Гроф Луна ќе настапи нашиот баритон Ристе Велков, во улогата на Леонора ќе настапи гостинката од Канада Криста де Силва, драмски сопран препознатлива по нејзините темни мистични бои. Во улогата на Ацучена ќе настапи, Сања Анастасиа, мецосопран, првенка на операта во Народниот театар во Белград. Во улогата на Ферандо ќе настапи нашиот бас, Владимир Саздовски кој е чест гостин на светските оперски сцени. Во останатите улоги ќе настапат: Јане Дунимаглоски, Ана Ројдева, Тихомир Јакимовски и Дејан Стоев во придружба на хорот и оркестарот на Националната опера и балет.
Романтична љубов, смртна љубомора и oдмазда се движечките драмски елементи на операта „Трубадур“ од италијанскиот музички мајстор Џузепе Верди. Операта се одликува со прекрасна музика и спектакуларно предводени вокални делови кои пренесуваат силни емоции, додека исклучително сложената приказна изобилува со огнена страст.