Точно напладне во Бања Лука започнаа митинзите на приврзаниците на власта и на опозицијата во ентитетот Република Српска, а според полициската процена на оддалеченост од помалку од километар се наоѓаат најмалку триесет илјади луѓе, пренесуваат агенциите, додека од Белград најавуваат дека внимателно го следат развојот на настаните.

Приврзаниците на опозицијата предводена од Српската демократска партија (СДС) се собраа во градскиот парк во Бања Лука, додека оние кои ја поддржуваат власта предводена од Милорад Додик на централниот градски плоштад. Тој таму пристигнал пешки околу 11.30 часот каде приврзаниците го поздравиле со громогласни аплаузи.

Министерот за внатрешни работи на РС, Драган Лукач, изјави дека само до 11 часот во Бања Лука пристигнале повеќе од 300 автобуси кои ги превезувале учесниците на двата собира. Потврдил дека на границата е спречено влегувањето на околу 150 лица од Србија кои сакале да одат во Бања Лука и таму да му се придружат на еден од двата собира.

„Нашата процена е дека тука има повеќе од триесет илјади луѓе“, изјавил Лукач потврдувајќи дека полицијата одлучила да ги забрани планираните поворки на учесниците на двата собира низ центарот на градот, бидејќи постои опасноста од судири и насилства меѓу политичките неистомисленици. „Тоа полицијата не може да го држи под контрола со силите коишто ги има“, рекол министерот која на улиците на Бања Лука распоредил околу две илјади полицајци.

Од организацијата на опозицискиот протест, сепак, инсистираат на протесна поворка низ Бања Лука по завршувањето на собирот во паркот.

Членот на Претседателството на БиХ, Младен Иваниќ, изјави дека опозицијата се бори за правото на демократско изјаснување и од тоа нема да се откаже. „Ние победивме одразувајќи го денешниот собир“, изјавил Иваниќ за новинарите пред почетокот на собирот на опозицијата.жж

Истакнал дека на опозицијата „на крајот од умот не ѝ е“ да прави некакви инциденти и да предизвикува насилство. „Инаетот на власта доведе до многу лош амбиент кој сигурно нема д абиде подобар по денеска“, предупредува Иваниќ.

Истовремено српскиот премиер Александар Вучиќ изјави дека „не верува во заговори, но ниту во случајности, особено кога станува збор настаните во регионот во кои се вмешани странски центри на моќ“, во врска со протестите во Бања Лука, алудирајќи на севкупната состојба на политички тензии на Балканот.

Вучиќ за Радио-телевизија Србија (РТС) изјави дека „ситуацијата во Бања Лука ја следевме цела ноќ“ и оти веќе разговарал со политичарите и од двете страни. Изрази подготвеност да замине во Бања Лука, доколку е потребно, но оти се надева дека вечерва „сите ќе се гордееме со српската демократска култура“./крај/мф/сн

Извор: Макфакс