Жителите на делчевското село Разловци не се откажуваат од намерата за радикализирање на проетстите доколку од понеделник не започне реализацијата на едно од нивните барања доставени до Општина Делчево, а тоа е поправка на стариот земјен пат Делчево – Разловци што ќе даде некаква можност, селото да не биде отсечено од светот.

Ова го изјави претседателот на Месната заедница за сеело Разловци, Ванчо Спасевски, кој напомена дека во недела на состанок жителите ќе ги дефинираат своите идни чекори и напомена дека незадоволството кај жителите е големо и дека нема да заврши само со еден мирен протест кој се одржа пред два дена пред Општината.

„Нашиот протест и нашето незадоволство не смеат да се ставаат и да добиваат политичка конотација. Едноставно, на луѓево им ‘пукна филмот’. Со месеци се живее како да сме на Господ зад грбот. Единственото инфраструктурно решение кое нѐ служеше од 1970-ите години, па наваму, беше мостот на Брегалница кај село Тработивиште. Но, овој мост беше оштетен од поплавите уште од лани во февруари, па надлежните државни институции започнаа со негова санација дури пред еден месец, за пред неколку дена да престанат да работат на санацијата. Така што сега и мостот е затворен, имрповизираниот премин го однесе реката, па сега останува единствено стариот пат кој е во должина од 5 километри и кој мора да се поправи“, рече Спасевски.

Тој додаде дека жителите бараат и асфалтирање на овој пат, а секако и побрза санација на мостот.

„Ние добивме ветување од претставници на општината дека ќе се поправи стариот пат. Но, мора да нагласам дека ние размислуваме да ги радикализираме протестите, како прво, или нема да ги пуштаме учениците на училиште, па и наставниците кои доаѓаат да држат настава во основното училиште во селото, или ќе блокираме пат, а има размислувања да се сопрат сите партиски активности во селото, па и да не дозволиме да има избори“, додаде Спасевски.

Најголемото село во Пијанечко, Разловци, каде има околу 800 жители, со месеци е отсечено од светот, истакнува Николчо Ситновски.

„Кај нас не доаѓаат ниту потребните намирници, замислете во 21-от век, да чекаш на основните продукти. Не доаѓаат такси возила, на брзата помош ѝ требаат часови за да стигнат до кај нас. Работниците кои работат во Делчево, како и учениците, прво се носат со едно возило до мостот кај Тработивиште, па пешки го поминуваат мостот, па од другата страна на реката со друго возило одат за Делчево. И тоа е вака секој ден“, објаснува Ситновски.

Револтот на жителите е голем кон локалната власт. Митко Жежовски потенцираше дека во селото се живее тешко, а сите досега што ветувале ништо не оствариле.

„Десет-петнаесет години во ова село ништо не е инвестирано. Ниту една улица не е направена. Мостот што е во селото, кој е дрвен и е единствен за да можат жителите да стигнат до нивите, остана ненаправен, сите власти ветуваа, но тој не е направен“, рече Жежовски.

Блаже Бојчевски, пак,зборувајќи за проблемите во селото , истакна дека не е задоволен што остана нереконструиран Спомен-домот на Разловечкото вистание.

„Најголем срам ни е сепак, Спомен-домот на Разловечкото востание, каде се чува споменот на херојскиот подвиг на нашите прадедовци. Тој стои како симбол на срамот и негрижата за историските споменици. Те, ќе го реновираат, па пред сите избори држат патриотски говори, па лани му ставија црна хартија, за да не прокиснува и еве веќе една година ги чекаме ќерамидите“, рече Бојчевски.

Жителите на востаничкото Разловци велат дека нема да попуштат во борбата за подобри услови за живот во селото. Нивните следни потези ќе зависат од она што ќе го преземе општината за селото.

Претседателот на Советот на Општина Делчево, Драган Христов, во отсуство на градоначалникот Дарко Шехтански кој е на службен пат за Швајцарија, за медиумите изјави дека засега единствено решение е поправка и одржување на стариот пат, но не кажа, кога тоа ќе се случи, исто така, тој не вети асфалтирање на стариот пат./крај/мф/дт