Два часа вработените во Југохром денес го блокираа магистралниот пат Тетово-Скопје како реакција на незаинтересираноста на Владата да се произнесе за одлуката за забрана на работењето на компанијата од страна на Министерството за животна средина. На протестот кај наплатната рампа Желино укажаа на три барања.

„Брзо рестартирање на Југохром, што значи повлекување на решението за гаснење на печките од страна на Државниот инспекторат за животна средина, второто барање ни е до повторното рестартирање работниците да примаат целосна плата или барем 70 отсто од неа додека се на принуден одмор и третото барање се однесува на сопствениците и менаџерите да се зафатат за што поскоро решавање на проблемот со филтер станицата”, истакна Пеце Ристески , претседател на синдикатот за индустрија, енергија и рударство.

Според Бајрам Амити, пак, претседател на синдикатот на Југохром, дваесет и еден месец раководството на Југохром чекало да добие дозвола да започне со градба на постројките, а истата била издадена летово. Истиот ден кога беше издадена дозволата, започнаа работите околу филтер станицата, која во април наредната година треба да е готова, тврди Амити.

Според него, неосновани се и досегашните обвинувања на невладините организации дека Југохром најмногу загадува.

„Илустративно, во јануари 2016 година кога печките во комбинатот беа исклучени поради загаденост, невладината организација Еко Герила објави дека фабриката учествувала во загадувањето на воздухот во Тетово само со 40 отсто. Но, нашите аргументи зборуваат за тоа дека во тој период почист воздух дишеле и граѓаните во Скопје и Кичево, што значи дека во прашање не е Југохром“, рече Амити.

Вработените пак револтирани зборуваат за постојаниот турбулентен период на нивната фабрика, во кој како што велат, многу нивни колеги се со нарушено здравје токму поради секојдневната неизвесност на комбинатот.

,,Од 2001 година па наваму ситуацијата е речиси трауматична, имаме многу колеги кои се здобија со болести поради постојаниот стрес, има и починати. Сите сме засегнати од работата на Југохром, замислете, деца на вработените ме среќаваат по улица и ме прашуваат дали ќе се ,, отвори”, вели еден од луѓето кои денес протестираа.

Синдикатото на Југохром појаснува дека со менаџментот успеале да постигнат договор нма вработените да се задржат на работа месецов. Но по завршувањето на месец ноември ако тие не се во можност да ги плаќаат работниците, тогаш бараат од државата да им обезбеди социјален пакет.

Следните чекори на ,,југохромци” зависат од институциите и од тоа дали ќе бидат прифатени нивните барања. Во спротивно најавуваат порадикални мерки.

Инаку, Југохром ги изгаси печките минатата недела по одлука на Министерството за животна средина кое посочИ дека компанијата ги пробила роковите за изградба на пречистителна станица за издувните гасови кои го загадуваат воздухот во регионот./крај/мф/са