Конзорциум на фирми-членки на Стопанската комора бара да стопанисува со половина од зоната Бунарџик како основач кој би донел странски фирми да работат во зоната, а како доказ за сериозноста нудат банкарска га

Конзорциум на фирми-членки на Стопанската комора бара да стопанисува со половина од зоната Бунарџик како основач кој би донел странски фирми да работат во зоната, а како доказ за сериозноста нудат банкарска га

Десет фирми-членки на Стопанската комора бараат да стопанисуваат со половина од слободната економска зона Бунарџик како основачи кои би донеле странски инвеститори. Комората наредната недела ќе и ја достави иницијативата на Владата, зад која стојат "Мермерен комбинат" АД – Прилеп, "АМАК – СП" – Охрид, "Леов компани" АД Велес, "Гранит" – Скопје, "Ренова" АД – Џепчиште, Тетово, "Фершпед" АД – Скопје, "Витаминка" АД – Прилеп, "Топлификација" АД – Скопје, "ИГМ Треид" Кавадарци, како членки на Советот на странски инвеститори во Стопанската комора.

Бранко Азески, претседателот на Комората, вели дека Конзорциумот од овие фирми е подготвен да и гарантира на Владата дека во Бунарџик ќе дојдат странски инвеститори.

"Бараме да стопанисуваме со зоната 50 години, со можност за дополнителни 25 години. За тоа, овие македонски фирми, од кои добар дел имаат странски капитал, се подготвени да дадат банкарски гаранции како сигурност дека ќе го реализираме планот. Кои странски инвеститори би дошле сега е деловна тајна. Гаранцијата не е играчка – никој нема да даде гаранција на 10 милиони евра, или на износ што ќе го одреди Владата, ако не е сигурен. Од Владата бараме само да го оствари ветеното – на 5 септември да биде готова инфраструктурата во Бунарџик," вели Азески.

Комората тврди дека нема политичка заднина во иницијативата. "Секако ќе ги договараме условите со новата Влада. Не заборавајте дека претседател на Советот на странски инвеститори е Атила Сендреј, главниот извршен директор на Телеком. Сакаме да кажеме дека ни е преку глава од фантомски фирми кои сакале да работат во Бунарџик. Комората нуди конкретен договор – на начин што ќе го одлучи Владата, дали преку тендер или преку непосредна спогодба, сакаме, врз основа на закон, да добиеме можност да донесеме вистински странски инвестиции", вели Азески. (А.С.)

Стопанската комора на Македонија во името на Советот на странски инвеститори, најави дека наредната недела ќе поднесе писмена иницијатива до Владата со која ќе изрази интерес за стопанисување со една идеална половина од Слободната економска зона Бунарџик.

Во соопштението од Комората се наведува дека членките на Советот со ова јавно ќе ја соопштат својата намера врз основа на постојната законска регулатива да станат основачи кои договорно ќе ги уредат меѓусебните односи.

Подносителите на иницијативата, како што се наведува во соопштението, ја поздравуваат намерата на Владата да постигне договор со "Џонсон контрол" за негов влез во еден дел од Слободната економска зона Бунарџик, бидејќи се работи за сериозен светски бренд, меѓутоа го истакнуваат својот принципиелен став дека истите услови треба да важат и за други корисници во Зоната, без разлика дали се работи за странски или домашни компании.

Рокот за завршување на инфраструктурните работи за кои е задолжена Владата на Република Македонија, се додава во соопштението, мора да биде испочитуван целосно, бидејќи тоа е основниот услов за активирање на Слободната економска зона Бунарџик. Подносителите на иницијативата, како што наведуваат соопштението, се обврзуваат на почитување на законските решенија кои се однесуваат на условите и начинот на основање, работа и престанок на слободните економски зони, како и на издавање првокласна банкарска гаранција како доказ за нивната цврста намера да го реализираат овој проект во рокот кој ќе го договорат со Владата.

Подносителите на иницијативата се обврзуваат, исто така, дека внатрешната организација и работењето во Зоната ќе бидат во насока на обезбедување континуиран развој на Зоната, ќе изнаоѓаат домашни и странски компании во својство на корисници на Зоната , ќе донесат правила за условите под кои ќе се користи просторот, кои ќе бидат во согласност со законите и со другите прописи и на секој корисник ќе му се овозможи подеднакви услови за вршење на дејноста во Слободната зона.

-Со убедување дека со реализацијата на поднесената иницијатива ќе се даде значаен импулс во економскиот развој на Република Македонија и остварување на економските приоритетни цели и задачи, подносителите на иницијативата ја очекуваат поддршката од сите релевантни фактори во државата-", се наведува во соопштението од Стопанската комора на Македонија.