Турскиот претседател Реџеп Тајип Ердоган ги обвини во неделата членките на меѓународната коалиција за борба против екстремната сунитска организација Исламска држава (IS) предводена од САД, дека ја оставиле Турција сама во борбата против џихадистите, а за европските земји изјави дека се свирепи кон имигрантите.

„Нé оставија сами во борбата против таа организација којашто нé напаѓа од една страна со самоубиствени напади и, од друга страна, со напади врз Килис“, пограничниот турски град кој е редовно на цел од ракетни напади од позициите кои Исламската држава ги држи на територијата на Сирија во кои досега загинаа дваесетина лица, изјави турскиот претседател Реџеп Тајип Ердоган.

„Во Сирија ниедна земја којашто тврди дека се бори против Исламската држава не ѝ зададе толку загуби на таа организација како ние, ниту плати толку висока цена како ние“, додаде турскиот претседател во говорот по повод отворањето на филмскиот фестивал во Истанбул.

Турција, во којашто е на сила состојбата на максимална приправност на безбедносните сили, последните повеќе од шест месеци е потресувана од серија атентати кои им се припишуваат на Исламската држава насочени главно кон курдски и прокурдски активисти и странски туристи.

Градот Килис, кој се наоѓа до самата сириска граница, каде сириските бегалци се побројни од локалните жители, е честа цел на гранатирања од позициите на Исламската држава. Турција редовно возвраќа на таквите напади, а во неделата воени извори соопштија дека во бомбардирање во сириската покраина Алепо биле убиени 55 џихадисти.

За Европа, пак, Ердгоан изјави дека е „свирепа“, бидејќи ги држи своите граници затворени за имигрантите кои бегаат од судирот во Сирија. Рече дека европските земји „немаат милост, ниту правда“, откако во саботата нагласи дека тие од Турција бараат да ги измени антитерористичките закони додека самите тие во борбата против тероризмот ја ограничуваат демократијата./крај/мф/сн

Извор: Макфакс