Дипломатите биле фрапирани од упорноста на пратениците

Дипломатите биле фрапирани од упорноста на пратениците

ОЛИВЕРА ВОЈНОВСКА

Шефот на државава, Бранко Црвенковски, не го потпиша  указот за прогласување на измените во Кривичниот законик поради контроверзниот амандман со кој се избриша службената одговорност. Одлуката да не го парафира законот, претседателот ја донел откако претходно разговарал со домашни и странски експерти, но и со меѓународните претставници во нашава земја. Дипломатите биле фрапирани од упорноста по секоја цена да се амнестираат политичарите кои ја злоупотребиле службената должност.

Црвенковски во обрзложението  вели дека спорната измена на Кривичниот законик фрла сомневање во искрените намери на Владата за лимитирање на дискреционите права на функционерите и борбата против корупцијата. За претседателот, исто така, е нелогично и неразбирливо тоа што парламентот во ист ден прави две контрадикторни измени на Кривичниот законик. Односно, од една страна, ги заострува казните за изборните нерегуларности, а од друга,  прави чекор назад во борбата против корупцијата и се декриминализира службената злоупотреба.

Од Кабинетот на Црвенковски велат дека "претседателот пред донесувањето на одлуката направил консултации со домашни правни експерти и со  претставници на меѓународната заедница. Сите се шокирани од фактот што во моментот кога од Македонија најмногу се очекува да ја заостри и зголеми ефикасноста  на борбата против криминалот и корупцијата, овие напори се опструираат. Тие уште повеќе се изненадени од упорноста да се оствари истата цел по неуспешниот обид за измена на Кривичниот законик за замена на затворската казна до една година со пари".   

Во образложението  за мотивите за непотпишувањето на законот, кое претседателот му го испратил на спикерот Љупчо Јордановски, меѓу другото, стои: "Причина за ваквата одлука е моето несогласување со членот 15 од донесениот закон со кој се менува членот 353, став 1 од Кривичниот законик каде што е регулирано кривичното дело злоупотреба на службената должност и овластување. Имено, со овој член се менува суштината на кривичното дело злоупотреба на службената должност и се стеснува неговиот обем, со што се декриминализира еден од облиците на ова кривично дело, а тоа е искористувањето на службената должност или овластување. Овој облик на злоупотреба најчесто може да се изврши со користење на т.н. дискрециони овластувања". Црвенковски оценува дека укинувањето на злоупотребата на службената должност и овластување ги поткопува темелите на напорите на Владата  за ограничување на дискреционите овластувања и фрла сенка врз искреноста на тие заложби.

Црвенковски во образложението укажува дека дискреционите овластувања се најпогодна почва за криминал и корупција. "А доколку одредени облици на дискрециони права мора да постојат, тогаш тие треба да се користат совесно и во интерес на службата. Секое поинакво однесување треба да биде санкционирано. Во спротивно, се отвора вратата за корупција и неказнето искористување на својата службена должност или овластување за лични цели и интереси", напомнува претседателот и потсетува на преземената обврска за нулта толеранција спрема корупцијата.

Црвенковски е зачуден и изненаден од тоа што во ист ден Собранието усвои измени на Кривичниот законик кои се меѓусебно контрадикторни по својата цел. "Измените на Кривичниот законик прават чекор напред во остварување на едниот приоритет и ја заоструваат казнената политика кај кривичните дела против изборите, гласањето и финансирањето на изборните кампањи, но во исто време прават и чекор назад во борбата против корупцијата, декриминализирајќи една од формите на злоупотреба на службената должност и овластување", е наведено во образложението.