Турција во четвртокот се спротистави на притисокот од Европската унија да ги промени своите антитерористички закони, истакнувајќи дека самоубиствените бомбашки напади во истанбулскиот аеродром, во кои во вторникот вечерта беа убиени 43 луѓе, дале дополнително оправдување на нивниот цврст став.

Турските функционери кои во Брисел се поради продолжување на преговорите за цела деценија долгиот процес на кандидатура за членство во ЕУ, сметаат дека Европската унија по излегувањето на Велика Британија повеќе од кога и да е има потреба од Турција поради нејзината економска и геополитичка моќ.

Од ЕУ повеќепати повторуваа дека Турција треба да ги измени своите антитерористички закони, сметајќи дека тие ја ограничуваат слободата на говорот и овозможуваат приведувања активисти за човековите права, но Анкара не покажува знаци дека ќе попушти по ова прашање.

„Турција денес се бори против тероризмот. Новите барање за Турија може да ги охрабрат терористите. Не можеме веќе да внесуваме промени во нашите терористички закони“, изјави турскиот министер за надворешни работи Мевлут Чавушоглу на заедничката прес-конференција со европските челници, зборувајќи за нападот кој во вторникот вечерта во Истанбул го извршија тројца милитанти за кои се смета дека се припадници на џихадистичката Исламска држава.

ЕУ турското заострување на антитерористичките закони го врзува со желбата на Анкара да нејзините граѓани да им се овозможи патувања во земјите на Унијата без визи. Тој договор е дел од поширокиот договор со кој Турција се обврза да ги прими назад сириските бегалци и другите мигранти кои нелегално од нејзините брегови завршуваат во Грција и другите европски земји.

Првиот потпретседател на Европската комисија, Франс Тимерманс, кој во четвртокот се состана со Чавушоглу, изјави дека разговорите за визниот режим напредуваат и оти наскоро ќе продолжат.

„Во конструктивните разговори со Турција нашите погледи за тоа како да се спроведат преостанатите визни услови се приближија“, напиша Тимерманс на Twitter.

ЕК сака и да ја зголеми својата финансиска помош за мигрантите во Турција на две милијарди евра до крајот на јули, за медицински, образовни и сместувачки услуги.

Турција, членка на НАТО, стратешки сместена меѓу Европа и Блискиот исток, со силна економија и млада популација, ќе претставува голема предност за ЕУ, смета турскиот министер за европски интеграции, Омер Челик.

„Турција е голема европска сила. Европа има потреба од свеж почеток и визија, па ќе мора да ја вклучи Турција. Што и да се случи по Брекзит, турската позиција ќе биде посилна. Секоја иднина која не ја вклучува Турција ќе биде слаба“, порача Челик во Брисел, алудирајќи на британското излегување од ЕУ.

Иронично, главниот застапник на Турција во ЕУ беше токму Велика Британија, често спротивена на длабокиот скептицизам на Германија и на Франција. Меѓутоа, британските поборници за излегувањето од ЕУ знаеја да го искористат стравот од големите имиграции, вклучувајќи ја и онаа од муслиманска Турција. Премиерот Дејвид Камерон во обидот да ги увери граѓаните да гласаат за останувањето дури изјави дека Турција нема да влезе во ЕУ ниту до 3000 година што ја разгневи Анкара.

Во уште една замена на улогите, германската канцеларка Ангела Меркел неволно се согласи на забрзување на турската кандидатура за ЕУ,бидејќи помошта на Анкара во запирањето на бранот на мигрантите откако само минатата година во Германија влегоа повеќе од милион.

Функционерите на ЕУ овој месец Турција, освен за антитерористичкиот закон, ја критикуваа и за приведувањето на тројца активисти за слобода на медиумите, Ситуацијата во областа на човековите права под претседателот Реџеп Тајип Ердоган според нив станува понапната.

„Треба да дејствуваме во границите на владеењето на правото, и да и браниме нашите слободи на изразување. Тоа не е нешто што можеме да го решиме или да го отфрлиме“, изјави во четвртокот еврокомесарот за проширување Јоханес Хан на прес-конференцијата.

Европската унија во четвртокот ги отвори преговорите за финансирање на буџетот на ЕУ, едно од 35-те поглавја во преговорите за пристапувањето на Турција, што за неа претставува мала победа.

Меѓутоа, Словачка, која во петок од Холандија го презема шестмесечното ротирачко претседавање со ЕУ, ги намалува турските надежи за забрзување на напредокот во преговорите започнати уште во 2005 година, но многу бавно напредуваат.

„Би сакал да видам отворање повеќе поглавја во текот на нашето претседавање, но искрено не гледам дека постои консензус“, изјави словачкиот министер за надворешни работи Мирослав Лајчак за новинарите во Братислава./крај/мф/сн

Извор: Reuters