Унгарија ќе подигне ограда по должина на границата со Хрватска, изјави унгарскиот премиер Виктор Орбан во разговорот за австрискиот дневен весник Die Presse.

„Ќе подигнеме ограда и на некои места на границата со Хрватска“, вели Орбан и додава дека е донесена одлука и за подигнување на ограда на границата со Романија.

Откако Унгарија во вторникот ја затвори својата граница кон Србија, на која изгради ограда висока до 4 метри и долга 175 километри за да ги спречи илегалните минувања на имигрантите и бегалците, тие се свртија кон Хрватска како рута на својот пат кон богатите западноевропски земји кои благонаклоно гледаат на нивното доаѓање, како Германија и Шведска.

„Тука станува многу гадно“, изјавил за агенцијата Hina Ахмад, 58-годишен трговец од Багдад кој дошол на официјалниот граничен премин кај Шид, но наскоро сфатил дека има повеќе шанси да влезе во ЕУ преку српската граница со Хрватска.

„Штом слушнавме за правецот преку Хрватска, не се двоумевме многу., Сакам да стигнам во Шведска за да се најдам таму со остатокот од семејството. Се надевам дека Хрватска со нас подобро ќе постапува“, додал Ахмад.

Откако Унгарија ја блокираше својата граница, мигрантите кои се раштркани по целиот Балкан сега бараат нови маршрути, можеби низ Хрватска и Романија, бидејќи и двете се членки на Европската унија, иако не се дел од Шенген зоната. Во Хрватска до средата навечер влегле речиси 900 мигранти.

Романскиот премиер Виктор Понта рече дека сето тоа го потсетува на „најмрачниот период од историјата на континентот“.

„Огради, кучиња, полиција и пушки, ова изгледа како Европа од 1930-те. И дали така го решивме проблемот на бегалците? Не, не го решивме. Подигнувањето на оградите значи префрлување на проблемот на Хрватска, Србија и Романија“, рече Понта./крај/мф/сн

Извор: Макфакс