Решително да се бориме против омразата и предрасудите врз Ромите кои го хранат тивкиот апартхејд, како што тоа отворено го нарекуваат некои истакнати активисти и борци за човекови права во Европа, порача министерот без ресор, Неждет Мустафа

Апелот беше упатен на денешната конференција за состојбата на Ромите во Европа, која се одржува во Стразбур по иницијатива на министерот за надворешни работи, Антонио Милошоски, како претседавач со Комитетот на министри на СЕ и Генералниот Секретар на Советот на Европа, Торбјорн Јагланд.Министерот Мустафа во својот говор нагласи дека обединета и демократска Европа којашто ги почитува правата на малцинствата неминовно треба да подразбира почит кон Ромите и нивните легитимни и демократски барања за еднакви права и рамноправен граѓански статус во рамките на европските општества.„Со задоволство можам да го истакнам фактот дека РМ е меѓу највисоко рангираните држави во поглед на степенот на спроведување на активностите за поголемо вклучување на Ромите во општеството. Ромската заедница во РМ има своја локална самоуправа, свој министер во Владата, пратеник во македонското Собрание, свои училишта и медиуми,“ рече Мустафа.Тој изрази надеж дека со Стразбуршката декларација која ќе биде усвоена на крајот од конференцијата залагањето нема да биде само декларативно. „Република Македонија, како земја-претседавач со Комитетот на министри на Советот на Европа, силно ги поддржува и е директно вклучена во активностите на Советот на Европа за градење на проактивен, кохерентен и усогласен пристап меѓу земјите-членки во решавањето на конкретните проблеми со кои се соочува ромската популација во европските држави,“ додаде тој. Конференцијата, на која обраќање ќе има и министерот за надворешни работи, Антонио Милошоски доаѓа во време кога Генералниот секретар на ОН Бан Ки Мун пред  Советот на Европа во Стразбур изрази жалење поради тоа што развиените земји ја користат загриженоста за имиграцијата и рецесијата како изговор за примена на политика на дискриминацијата и исклучувањето. „Во многу од развиените земји, имиграцијата и економската рецесија предизвикуваат растечка загриженост која се повеќе им служи како изговор за политичката дискриминација и исклучувањето,“ рече во вторникот Бан на церемонијата на одбележувањето на 60-годишнината од усвојувањето на Европската конвенција за човекови права.