Рокот за поднесување барања за изградба на производни капацитети за производство на млеко во прав е продолжен до крајкот на јуни, а државата може да обезбеди до 50 милиони денари за сите заинтересирани

Поради проблемот кој се појавува во Макеоднија летно време со вишокот млеко, Владата и Министерството за земјоделство, шумарство и водостопанство одлучија да воведат мерка со која секое правно и физичко лице може да достави барање со кое ќе му бидат одобрени пари за изградба на фабрика или погон за производство на млеко во прав, соопшти министерот за земјоделство Аце Спасеновски, на денешната прес-конференција. Оваа мерка е дел од Програмата за рурален развој, а е вметната со последните измени. “Програмата за рурален развој заврши до 30 мај, каде што можеше да се конкурира за 422 милиони денари, кои беа предвидени за оваа програма за кофинансирање. Досегашните предвидени средства за кофинансирање од 13 милиони денари за производен капацитет за млеко во прав, се зголемуваат на 50 милиони денари“, рече министерот Спасеновски. Тој информира дека секој што ќе се пријави, до крајот на јуни, за градење производен капацитет за млеко во прав, може да конкурира преку оваа Програма за 50 отсто повраток на средствата или кофинансирање од страна на државата, максимум до 50 милиони денари. “Оваа измена е затоа што во Македонија имаме одредени шпицови за производство на млеко и тоа во летниот период , а како што знаете дека Македонија нема фабрика за производство на млеко во прав, така што на овој начин би можеле да ги решиме шпицовите со производство на млеко во прав што ќе може да се користи во кондиторската индустрија, затоа што Македонија е голем увозник на млеко во прав“, рече Спасеновски.Министерот информира и дека за 422 милиони денари од Програмата за рурален развој, годинава се поднесени 2.400 барања, кои ќе бидат разгледувани од Агенцијата за поддршка на руралниот развој, па ќе се продолжи со процедурата која, како што рече Спасеновски, е иста како за средставата од ИПА фондовите. “Ако минатата година беа поднесени 680 барања, а годинава, доставени се вкупно 2.400 барања, што претставува неколкукратно зголемен интерес и доставени барања. Тоа е резултат на посветеноста на Владата и на интензитетот на зголемена активност на Министерството за земјоделство, шумарство и водостопанство во обезбедување на поддршка за аграрот“, рече Спасеновски.