Од 7 до 10 мај, во Метрополис Арената на Скопски саем, ќе се одвива 27. Меѓународен саем на медицинска, дентална и фармацевтска опрема и лекови и 4. Саем на козметика и убавина

На годинешнава саемска манифестација ќе бидат опфатени сите аспекти од областа на здравството и индустријата посветени на убавината, од здравствена заштита, медицински апарати, опрема и нови лекови, како и сето тоа што е актуелно во козметичката индустрија. Во деновите на саемот ќе се случуваат многу активности, презентации, предавања и трибини. Првиот ден на Саемот е посветен на презентации од областа на медицината, а следниот ден е Отворен ден на Министерството за здравство на Република Македонија. Целиот тајминг ќе биде искористен за презентација на најновите методи на лекување на различни болести, како и презентација на новите достигнувања од областа на медицината. На 8 мај во петок, како и наредните два дена, ќе се одвива презентацијата на козметика – изложување на нови производи од областа на козметиката и третманите за достигнување здраво тело и убавина, како и достигнувања во областа на стајлингот на косата – нови трендови во фризурите, а ќе гостува и познатиот Александар Каприш и Рајка Радовиќ со презентација на свечени фризури. На деновите на саемот ќе се одвива и презентација на фарби за коса, лифтинзи на лице, третмани за слабеење и сето тоа што спаѓа во оваа област.