Домашен
Неделковска: Агенцијата за млади и спорт дава стипендии, спортистите треба да и враќаат со медали
Александра Неделковска, претседател на Македонската кик-бокс федерација е единствената жена која го доби државното признание 8-ми Септември. Таа вели дека горда што заедно со својот сопруг го донеле кик-боксот во Македонија бидејќи овој спорт сега е еден од најатрактивните во светот
Разговараше: Бојана Стојчевска
Зошто го одбравте токму кик-боксот?Неделковска : Мојата примарна љубов е образованието, а кога се работи за спортот најпрво почна за тренирам кошарка во кошаркарскиот клуб Студент. По некое време почнав паралелно да се занимавам со карате. Во каратето се пронајдов бидејќи е индивидуален спорт . Каратето ми помогна да го пронајдам мојот животен сопатник, мојот сопруг кој исто како и јас беше каратист. Тој почна да се интересира на кик-боксот и редовно да оди на тренинзи во Германија, одев и јас со него, се пробав и во овој спорт и кариерата ја завршив како балкански вице шампион.
Заедно со Вашиот сопруг направивте многу за кик-боксот да се развие во Македонија. Претпоставувам дека движејќи се по тој пат сте имале многу искачувања и падови. Дали на моменти чувствувате дека немате доволно сила да продолижите и посакавте да се откажете?Неделковска: Да точно е. Во сé што е ново и ти треба да го промовираш наидуваш на препреки и делумни олеснувања. Но, и покрај сé јас никогаш не добив желба да се откажам и цврсто бев решена да му помогнам на мојот сопруг и го донесеме кик-боксот во Македонија. Многу години подоцна се гледа дека успеавме. Тогашниот Сојуз сега е Федерација. Верував во кик-боксот како спорт и мојата интуција се покажа како исправна. Денеска кик-боксот е најатрактивниот спорт од боречките вештини, како во Македонија, така и во светот и меѓу мажите и меѓу жените.
Во Вашата долгогодишна кариера имате многу натпревари на кои сте учествувале и како натпреварувач и како тренер. Може ли да издвоите една случка, момент која никогаш нема да ја заборавите?Неделковска: Првиот меморијален куп 2010 година посветен на мојот сопруг. Претставници и натпреварувачи имаше скоро од сите држави, тој момент никогаш нема да го заборавам, почитта која му да оддадоа светските спортисти на мојот сопруг.
Како се чувствувавте кога Ве известија дека сте добитник на државното признание 8-ми Септември?Неделковска: Иницијативата за моето пријавување беше на Кик-бокс федерацијата. Чувството кое ме обзеде кога ми соопштија дека сум добитник на државно признание беше несекојдневно. Не е воопшто лесно да се биде прва меѓу првите. Ми беше драго што бев единствената дама која го доби признанието. Им благодарам и на Агенцијата за млади и спорт и на Владата на Република Македонија, што ни докажа дека мисли и на нас, спортските работници. Сметам дека моето промовирање на државата ме донесе до оваа награда.
Синоќа се вративте од Светското јуниорско-кадетско првенство во Братислава. Како поминавте на ова првенство?Неделковска: Најискрено очекував многу повеќе. Очекував повеќе бидејќи Агенцијата за млади и спорт на спортистите има дава стипендии, а тие на неа и државата треба да и вратат со резултати, медали. Се вративме со еден бронзен медал и едно петто место. Конкуренцијата беше огромна, околу 1.600 натпреварувачи од 59 земји. Ние отидовме со шест натпреварувачи. Изгубивме на поени што кажува дека се одлучувало за нијанси./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Домашен
Денеска во Прилеп 11. планинска трка „Крали Марко Треилс“
Во Прилеп денеска ќе се одржи 11. трка во планинско трчање „Крали Марко Треилс“. Од 250-те пријавени учесници, 78 отсто се од земјава, а останатите 50-тина се од други 12 држави, најмногу од регионот: Србија, Косово, Грција, Албанија,… На трката ќе учествуваат повеќето од најбрзите македонски планински тркачи, репрезентацијата во планинско трчање на Србија, како и поранешната шампионка на Шведска во 100 километарски ултра маратон Лиса Ринг.
„Крали Марко Треилс“ предвидува две трки со различни должини. Пократката, долга 18 километри, е најстарата и најпопуларна планинска трка во државава, наречена „Трескавец Треил“. Почнува од Варош во Прилеп и преку Марковите Кули и пејсажните ритчиња ги води 160-те натпреварувачи кон манастирот Трескавец, а потоа назад во Прилеп.
Подолгата трка, „Камена Баба Треил“, долга 35 километри, исто така почнува од Варош и ја следи патеката до манастирот Трескавец, но оттаму продолжува низ карпести предели преку Камена Баба. За неа се пријавени 80-тина планински тркачи.
Настанот е во организација на здружението ТРЕКС од Скопје и е наменет за рекреативни, аматерски и професионални спортисти со различно ниво на физичка подготвеност.
Домашен
(Видео) Бугарски навивачи се судрија со полицијата на стадион: фрлаа со предмети, па следуваше апсење
Бугарски навивачи се судрија со македонската полиција на арената „Тодор Проевски“ каде се игра натпреварот Шкупи (Македонија) и Левски Софија (Бугарија).
Турканицата продолжи со вадење на ремени од страна на навивачите и фрлање предмети како што се лименки пива, сокови и слично. По ова, имаше и неколкумина уапсени. Полицијата ги извади од стадионот и однесе со комбиња во станица.
„Макфакс“ контактираше со МВР од каде проверуваат зошто дошло до судирот, како и, како е постапено со уапсените лица.
Ова е втор инцидент. Претходно, во Чаир, беа каменувани два автомобили со бугарски натпреварувачи. На ова претходеа низа провокации на социјалните мрежи и телевизиски изјави со навредувачки пароли за Македонија. Навредувачки навивачки песни, се пееа и на трибините.
Домашен
(Видео) Оформен предмет за полицаецот кој со пендрек го нападна Талески: Имало турканица, службеник преземал и физички мерки
МВР отвори предмет против полицаецот кој со пендрек го удри ракометарот Филип Талески, за да се утврди зошто се решил на таков потег и дали ќе следи казна. Чинот наиде на лавина коментари во јавноста и осуда. Досега, во МВР не е поднесена пријава за ударот на Талески.
„По завршување на спортскиот натпревар, поради меѓусебна турканица на неколку ракометари од двете екипи на терен, најнапред реагираше обезбедувањето на натпреварот, а потоа од страна на еден полициски службеник од полициската станица од општа надлежност Охрид преземени се физички мерки. По службена должност Одделот за внатрешна контрола, криминалистички истраги и професионални стандарди при МВР оформи предмет и презема мерки за целосно расчистување на случајот, велат од МВР за „Макфакс“.
Тие додаваат дека пријава досега не добиле.
„По вчера одиграниот ракометен натпревар КУП на Македонија-финале помеѓу ракометните екипи „Еурофарм Пелистер“ од Битола и „Вардар“ од Скопје, во СВР Охрид не е поднесена преставка, поплака или друг вид на пријава од ракометари, делегати или други официјални спортски претставници против полициски службеници кои извршуваа обезбедување на натпреварот што го следеа околу 4000 лица“, додава МВР.