ВМРО-ДПМНЕ ги обвинува опозициските партии, СДСМ и ДУИ, за палењето на депониите во главниот град за да го спречат доаѓањето на правдата.

Во партиското соопштение се наведува: Злосторничкото здружение ДУИ–СДС, неможејќи да го прифати фактот дека е поразено и дека граѓаните ја враќаат државата на прав пат, прибегнува кон најопасни и криминални методи“. Според партијата, наместо политики, подметнуваат чад и отров палејќи ги скопските депонии.

„Откако не им успеа подметнувањето на пожарите ова лето низ селата и градовите во Македонија, сега се одлучија за нов, последен очајнички потег: палење на депониите во Скопје со цел да предизвикаат страв, незадоволство и хаос меѓу граѓаните. Со тоа не само што прават тешко кривично дело, туку свесно го уништуваат и здравјето на скопјани, што е политичко безобразие од најекстремен вид,“ стои во соопштението.

ВМРО-ДПМНЕ потсетува дека „со години СДСМ и ДУИ управуваа со ‘Дрисла’ и ‘Вардариште’, ги поставуваа директорите, водеа политики и ветуваа фабрика за селекција на отпад, зелена зона и чист воздух, но сè останало само на хартија“.

„Единствено што оставија зад себе е смет, диви депонии и труење на луѓето,“ се додава.

Од партијата наведуваат дека „спротивно на тоа, скопските градоначалници од ВМРО-ДПМНЕ веќе четири години реализираат конкретни проекти за чистење и уредување на јавните површини, воспоставување систем за селекција на отпад и зајакнување на јавната хигиена“.

„Владата во изминатата година започна процес на темелна ревизија на целата еколошка политика и подготви нови проекти за модернизација на ‘Дрисла’, за затворање на дивите депонии и за воспоставување европски стандарди за управување со отпад,“ пишува во соопштението.

Во него се поставуваат и прашањата:

„Како тоа баш пред локални избори почнаа да ‘горат’ депониите?“

„Како тоа токму сега ‘Дрисла’ почна да загадува и да гори отпад?“

„Дали постои организирана структура зад ова?“

„Затоа ВМРО-ДПМНЕ повикува Министерството за внатрешни работи и Јавното обвинителство итно да спроведат темелна истрага за инволвираноста на овие структури во намерното палење на депониите,“ се додава во реакцијата.

„Денес, наместо да одговараат за националните порази и еколошките катастрофи што ги предизвикаа, тие повторно се обидуваат да ја запалат вистината и да го задушат Скопје. Граѓаните добро знаат: вистинската еколошка катастрофа се вика СДС–ДУИ,“ завршува соопштението на ВМРО-ДПМНЕ.

Скопјани повеќе немаат време за чекање и лажни ветувања од ВМРО-ДПМНЕ, порача претседателот на СДСМ Венко Филипче, кој денеска заедно со кандидатите за градоначалници на Аеродром и Гази Баба, Александар Трајановски и Влатко Митовски, изврши теренска посета на депонијата Вардариште.

„Четири години неспособната локална власт на ВМРО-ДПМНЕ не успева да реши една дива депонија што шири зараза и смрт. Ова е врв на неработење, негрижа и криминална рамнодушност“, рече Филипче.

Филипче при теренската посета испорача сет конкретни решенија за кои рече дека ќе се спроведат веднаш по преземањето на одговорноста во локалната власт:

Воведување механизација за покривање на отпадот со земја и глина, компактирање и затворање на жариштата за елиминирање на кислород и влага, систем за извлекување и согорување на метанот и формирање стручен штаб со експерти за управување со отпад.

„Мора службите на Град Скопје веднаш да добијат задачи за надминување на проблемот со горење на отпадот. Не може Советот на Градот да биде на страна, а скопјани да се гушат“, порача Филипче.

Тој потсети дека токму советничката група на СДСМ побарала итно свикување на седница за Вардариште, но ВМРО-ДПМНЕ молчи.

Универзитетското студентско собрание на УКИМ со загриженост реагира на неповолните услови и недоволната организација при процесот на вселување во државните студентски домови, кој започна на 9 септември 2025 година.

Најголеми гужви и проблеми се забележани во студентските домови „Гоце Делчев“ и „Пелагонија“, каде што, како што велат од студентското собрание, дел од студентите беа принудени да чекаат повеќе од 12 часа – од преземање на документи до добивање на соба – на температури над 25 степени.

УСС-УКИМ бара:

– Отворање на повеќе пултови за преземање на документи, за да се намали времето на чекање и да се обезбеди побрз прием.

– Поголем временски интервал меѓу објавувањето на конечните резултати и самиот почеток на вселувањето, за домовите да можат навремено да се подготват.

– Присуство и активен мониторинг од страна на Министерството за образование и наука на самото место, за да се гарантира правилна и фер распределба на собите.

– Дигитализација на процесот на вселување, со што би се намалило времето на чекање и би се вовеле современи стандарди во управувањето со домовите.

Како заклучок, Универзитетското студентско собрание на УКИМ е подготвено да предложи студенти кои би помогнале во целиот процес на вселување, а апелираме институциите да развијат соработка со факултетите, кои можат да понудат стручна поддршка за дигитализација на системот.