Повеќе стотици илјади луѓе протестираат во саботата во италијанската престолнина Рим против заедниците на лица од ист пол и сексуалното образование во училиштата, додека влада на премиерот Матео Ренци сака набрзина да го протурка предлогот за цивилно партнерство.

Иако италијанската полицијата никогаш не објавува процени за бројноста на организаторите, организаторите објавија дека се собрале околу милион луѓе. Мноштво млади луѓе, возрасни и родители со деца го преплавија плоштадот во Рим, кој според процените на италијанските медиуми може да собере околу 300 илјади луѓе.

Носејќи транспаренти на кои беа испишани паролите „Семејството го спасува светот“ и „Да ги заштитиме нашите деца“, демонстрантите и покрај дождот го исполнија големиот плоштад пред базиликата на Свет Иван Лутерански.

„Во училиштето во коешто одат моите деца, се зборува за семејство кое го прават двајца татковци и две мајки, непрашувајќи за дозвола од родителите. Тоа е опасно и лошо“, изјавил за AFP Џузепе Рипа, 41-годишен лекар.

Италија е последната голема земја од Западна Европа којашто не признава никаков законски статус на истополовите двојки, но владата на левиот центар на премиерот Мате Ренци поднесе нацрт закон за цивилно партнерство со цел конечно да го протурка до крајот на годинава.

Текстот сега е на проучување на комисијата во Сенатот, каде што е забавен со илјадниците амандмани од коишто најголемиот дел ги поднесе партијата на десниот центар на Анџелино Алфано, министерот за внатрешни работи во коалициската влада, која повика на протестите во саботата.

Партнерите на Ренци од десниот центар се наклонети на воведувањето цивилно партнерство, но отфрлаат две многу важни негови предлози: можноста за примање на пензијата од партнерот и посвојување на децата на партнерот.

Околу 75 отсто од Италијанците го поддржуваат законскиот статус за истополовите двојки. Според анкетата што ја објави дневниот весник La Stampa во мај, 51 отсто од испитаниците го поддржуваат бракот на лица од ист пол./крај/мф/сн

Извор: Макфакс