По одлуката на Владата да ги продаде акциите во телекомуникациската компанија

По одлуката на Владата да ги продаде акциите во телекомуникациската компанија

Унгарците ќе го поскапуваат телефонот, а власта ќе биде со врзани раце

"Маѓар телеком", односно унгарски "Матав", како што до неодамна беше називот на компанијата, може да биде еден од потенцијалните купувачи на пакетот акции кои државата планира да ги продаде од "Македонски телекомуникации". Унгарците, кои се доминантни сопственици на "Телеком" имаат апсолутно право, како и секој друг заинтересиран, да се појават на Берза и да одлучат да купат пакет во износ од 9,9 отсто државни акции. Но, дали тоа навистина ќе се случи, треба да одлучи врвот на "Маѓар телеком". Засега, ваквата можност не ја коментираат унгарските раководители на "Македонски телекомуникации". Во случај раководството да донесе позитивна одлука, на тој начин тие ќе ја зацврстат и онака сигурната позиција во компанијата, бидејќи тие и сега го имаат контролниот пакет. Зголемениот број акции автоматски претпоставува и повеќе унгарски претставници во Бордот на директори, органот кој практично управува со "Телеком". Со своите два отсто акции што ќе ги задржи, Владата нема да има свој човек во Бордот, така што ќе нема никаква контрола и влијание во управувањето, како и врз одлуките што ќе ги носат идните акционери. Унгарците како доминантен сопственик ќе можат без консултација со власта да ги зголемуваат цените на услугите. Во тој случај, Владата ќе биде немоќна да реагира, бидејќи нема систем на контрола. Регулацијата на цените единствено останува во рацете на Агенцијата за електронски комуникации, како регулаторно тело. Златната акција што останува во рацете на државата ќе Ј даде единствено можност за присуство на Годишното акционерско собрание.

Ако Владата инкасира минимум 274 милиони евра во својата каса од продажбата на 45 отсто акции во "Телеком", тогаш што добиваат граѓаните? Високи владини извори, кои инсистираат на анонимност, велат дека освен државата која ќе кешира огромна сума пари, граѓаните нема да видат некое големо фајде. Поевтинување на импулсот тешко дека ќе има, а повеќе од сигурно е дека цената на телефонските услуги ќе одат нагоре.

Министерот за економија пред два дена најави интересирање за купување на државните акции во "Македонски телекомуникации" пројавиле неколку стратегиски инвеститори. Но, се поставува прашањето кој е нивниот интерес да инвестираат по околу 50 милиони евра за пакет од 9,9 отсто акции во "Телеком", кога се знае дека конците во компанијата и натаму ќе ги влече "Маѓар телеком", како доминантен сопственик. Оној што ќе купи пакет-акции ќе добие едно место во Бордот на директори со право на одлучување. А, тоа едно место е важно, но не и клучно, бидејќи одлуките во основа ќе ги носат Унгарците. Тие ќе одлучуваат за инвестициската програма, деловната политика и, на крајот на краиштата, ќе решаваат дали годишната добивка ќе ја поделат на акционерите или не. Сепак, токму добивката е она што го интересира секој акционер, особено оние кои допрва ќе инвестираат во купувањето на акциите. Нивниот интерес ќе биде насочен кон што побрзо враќање на инвестицијата, која и не може да се врати набрзина. Според наши извори од телекомуникациската компанија, се претпоставува дека сумата од 50 милиони евра што би ја платил новиот акционер за пакет-акции би се исплатила за околу десетина години. Период што е прилично долг, така што воопшто не е исклучена варијантата за ова време некои од новите акционери и да се одлучат за препродавање на својот удел.