Црна хроника
Уапсен осомничениот за убиството во Љуботен што се случи по кавга за сообраќаен прекршок
Припадници на единицата „Алфи“ во понеделникот вечерта околу 23 часот го уапси момчето коешто е осомничено за убиството во скопското село Љуботен, кога маж беше убиен со автоматска пушка поради кавга за сообраќаен прекршок. Судија во претходна постапка на осомничениот му одреди мерка притвор во траење од 30 дена.
Дваесет иедногодишното момче било уапсено во неговото село Љуботен, а кај него била пронајдена и автоматската пушка со којашто се претпоставува дека пукал и го убил Џеваир М. од селото Раштански пат.Убиството се случи на 16-ти април околу 19 часот. Братот на убиениот Џеваир дента се скарал со братот на осомничениот за убиството додека се движел со возило во правец на населбата Радишани во близина на кружниот тек во населбата Бутел, поради недавање првенство во сообраќај.Двајцата почнале да се расправаат, а си размениле и неколку удари со боксови и си заминале. Кога братот на Џеваир стигнал дома, Џеваир му кажал дека добил телефонски повик од негов пријател кој ги повикал двајцата да појдат во село Љуботен, селото од каде што било лицето со кое се расправел, за да се смират.Двајцата браќа од Раштански пат отишле во Љуботен, каде биле пречекани од таткото на момчето кој ги упатил кон џамијата со две минариња во селото. Кога стигнале кај џамијата, Џеваир и брат му излегле од возилото, а Џеваир се упатил кон таткото и синот со кој неговиот брат се скарал. Но во еден момент од споредна уличка се појавил осомничениот вооружен со автоматска пушка и веднаш без никакво предупредување испукал еден куршум во правец кон Џеваир М. кого го погодил во пределот на градниот кош и избегал.Куршумот бил смртоносен за Џеваир. Тој бил пренесен во болницата „Свети Наум Охридски“, но лекарот констатирал смрт./крај/мф/ффс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Црна хроника
Скопјанец измамен во менувачница од двајца странски државјани
Скопјанец пријавил дека во менувачница во Старата скопска чаршија бил измамен од страна на двајца странски државјани за сума од 25.000 евра, информираат попладнево од Министерството за внатрешни работи.
Синоќа во 19.15 часот во СВР – Скопје, Х.М., на возраст од 34 години од главниот град на државава, пријавил дека околу 15 часот во менувачница во Старата скопска чаршија бил измамен од двајца странски државјани.
Според пријавеното, откако се договориле во менувачницата да сменат пари за 25.000 евра, лицата дошле со чанта со договорената сума на пари во денари, при што еден од нив ја заменил чантата со денари со друга иста чанта, која во долниот дел била полна со хартиени ливчиња.
Како што пријавил Х.М., тој им ги дал еврата без да ја провери чантата, а откако заминале, сфатил дека е измамен, појаснуваат од МВР.
Се преземаат мерки за расчистување на случајот.
Црна хроника
Пожар во Дом за стари лица во струмичко Банско, нема повредени
Пожар синоќа избил во Дом за стари лица во село Банско, Струмичко. Нема повредени лица, предизвикана е само материјална штета, соопшти Центарот за управување со кризи (ЦУК).
Според Регионалниот центар за управување со кризи – Струмица, пожарот бил пријавен околу 23.30 часот. Во гаснењето на пожарот интервенирале седум пожарникари со две противпожарни возила. Пожарот целосно е изгаснат во 50 минути по полноќ.
– Прво биле евакуирани лица од катот каде што бил пожарот, потоа од долните катови. По целосното гаснење на пожарот, евакуираните лица полека се вратени на местата, собите од каде што биле евакуирани. Причината за пожарот и материјалната штета дополнително ќе бидат утврдени, појаснуваат од ЦУК.
Во денешното соопштение се наведува и дека изминатото деноноќие имало вкупно 1.759 повици на единствениот повикувачки број за итни случаи – 112 во ЦУК.
Црна хроника
Притвор за осомничен за спречување на полициски службеници да фатат побегнат затвореник
Основното јавно обвинителство Кавадарци поведе постапка против 18-годишник за кого постои основано сомнение дека сторил кривично дело – Спречување службено лице во вршење службено дејствие од член 382 став 3 во врска со став 2 и став 1 од Кривичниот законик.
На 2 мај, во куќа на улицата “Димката А. Габерот” во Кавадарци, двајца инспектори од МВР преземале службено дејствие – фаќање побегнат затвореник од КПУ Гевгелија, кој бил роднина на сега осомничениот.
Затвореникот давал отпор при обидот да биде лишен од слобода за доизвршување на затворската казна, во што сега осомничениот го поддржал, се нафрлил врз еден од полициските службеници, го влечел и го гребел, нанесувајќи му телесни повреди.
Затвореникот успеал да се ослободи и да побегне, но подоцна бил фатен и вратен во затворот. Осомничениот исто така избегал во прв момент, но бил лишен од слобода, а по предлог на јавниот обвинител, Основниот суд во Кавадарци му определи притвор во траење од осум дена.