Ќе останат тајна деталите за условите под кои американската компанија „Џонсон контролс“ реши да гради фабрика за електронски автоделови во слободната економска зона Бунарџик.

БУЧКОВСКИ ПРАВИ СЕ ДА ДОНЕСЕ ДОБРА ИНВЕСТИЦИЈА

Ќе останат тајна деталите за условите под кои американската компанија „Џонсон контролс“ реши да гради фабрика за електронски автоделови во слободната економска зона Бунарџик. Ова го изјави премиерот Владо Бучковски на вчерашното потпишување меморандум за соработка меѓу Владата и Американците, кој се повика, како што рече, на правилото дека големите бизниси имаат деловни тајни.

– И не барајте ништо повеќе – им кажа премиерот на новинарите. Проектот бил во сензитивна фаза, а на 22 мај документот што го парафираа двете страни треба да биде разгледан и одобрен од бордот директори на „Џонсон контролс“.

Според премиерот, изградбата на инфраструктурата во Бунарџик, која ја гледа како тест за владината администрација, треба да заврши најдоцна до 1 септември.

– Треба да почнеме ударничка работа за да ги создадеме сите предуслови за да може „Џонсон контролс“ да почне да инвестира од 5 септември годинава – рече Бучковски.

Како што дознаваме, во наредниве неколку дена ќе се утврдуваат условите за земјиштето. Во Владата неофицијално велат дека инвеститорот ќе го земе под долгорочен закуп од 99 години, но не се открива по која цена.

Покрај Бучковски, параф на меморандумот стави и Томас Патспелт, заменик-претседател на „Џонсон контролс“ за Европа.

– Нашата компанија се залага овој потфат, кон кој пристапивме заедно со Македонија и македонскиот народ, да биде крунисан со голем успех. Ќе ги исполниме нашите обврски и заложби за изградба на капацитет каде што ќе произведуваме електронски производи што првично ќе бидат пласирани во Европа, а подоцна и во целиот свет – изјави Патспелт, дополнувајќи дека планираат долгорочно вработување на 500 лица во капацитетот што ќе го градат.

Од Владата сметаат дека со овој проект земјава ја покажала својата конкурентност, што отвора можност да биде посакувана дестинација за инвестирање.

Според најавите од поранешниот заменик-потпретседател на „Џонсон контролс“ Богољуб Вељановиќ, фабриката што ќе ја гради оваа компанија по успешните подготовки, старт и завршувањето на првата фаза, ќе премине во втората фаза во која ќе произведува пластична опрема и елементи, додека во третата фаза активностите ќе бидат насочени кон производство и склопување најразлични финални производи.

– Сега ви преостанува вам со своето работење да покажете дека не сте го заработиле овој проект – порача Вељановиќ, кој заедно со македонскиот бизнисмен Ристо Гуштеров беа главните лобисти за Американците да инвестираат во Македонија.

Од Владата не откриваат која фирма ќе ја гради инфраструктурата во Бунарџик и дали изведувачот ќе се бара преку тендерска постапка поради краткиот рок. Шесте милиони евра, колку што државата ќе ја чини отворањето на Бунарџик, најверојатно ќе бидат обезбедени од парите од продажбата на Светскиот трговски центар во Скопје и од дивидендата од телекомот.

Запуштената економска зона промовирана од некогашниот вицепремиер Васил Тупурковски нема среќа да профункционира повеќе од седум години. Првата влада на Љубчо Георгиевски тогаш ја промовира ливадата како еден од најголемите инвестициски проекти преку кој во државата се очекуваше да влезат една милијарда долари тајвански инвестиции. Откако не успеа тоа, владата на Црвенковски во 2003 година реши преку тендер да бара компанија-закупец и основач на Бунарџик. Велшката фирма „Глендор Естејт лимитед“ како победник на тој тендер лани се откажа од зоната бидејќи владиниот состав на Бучковски не и дозволи траен закуп на земјиштето.