Дури 21 отсто од македонските граѓани платиле мито за да добијат внимание при завршувањето на некоја работа во државните институции, покажува истражувањето на Глобален корупциски барометар, информираат од „Транспарентност – Нулта корупција“.Овој резултат Македонија ја става на второ место на западниот Балкан, веднаш зад Босна и Херцеговина, каде 23 отсто од граѓаните платиле мито, се вели во извештајот, презентиран по повод 9-ти декември, Светскиот ден за борба против корупцијата. „Не би сакала да изразам честитка по повод овој ден, затоа што состојбите во Република Македонија не се за честитка. Состојбите се загрижувачки“, вели Слаѓана Тасева, претседател на „Транспарентност – Нулта корупција“.Според резултатите на Глобалниот корупциски барометар, Македонија се наоѓа во групата земји во светот каде судството е најкорумпирано. Дури 39,6 отсто од граѓани сметаат дека судството е екстремно корумпирано, додека 21,7 отсто го сметаат за многу корумпирано. Степенувајќи ја корупцијата кај политичките партии, 32,4 отсто од граѓаните рекле дека тие се екстремно корумпирани, 18,1 отсто ги оцениле како многу корумпирани, а 28,5 отсто дале средна оценка. Во однос на јавната администрација, 29,3 отсто од граѓаните оцениле дека таа е екстремно корумпирана, 20,6 отсто многу корумпирана, а 25 отсто дале средна оценка. Како најмалку корумпирана институција граѓаните ја сметаат војската. Дури 34,5 отсто од нив сметаат дека таа не е корумпирана, 24,1 отсто како малку корумпирана, додека 17,2 отсто дале средна оценка. Запрашани за тоа на кој начин се променила корупцијата во државата во последните три години, 27,4 отсто одговориле дека многу се зголемила, 18,7 отсто дека малку се зголемила, за 27,4 отсто таа останала иста, додека за 20,4 отсто таа малку се намалила. Околу три отсто од граѓаните сметаат дека таа се намалила.„Проблемот со корупцијата во Република Македонија беше и останува алармантен, значи многу сериозен. Она што загрижува во последно време е што проблемот со антикорупцијата е алармантен. Ние имаме проблем со антикорупцијата, со антикорупциските институции, со корупцијата во судството, начинот на работа на Државната комисија за спречување на корупцијата, со начинот на кој што постапува полицијата и сите други институции. Затоа, наш фокус на работа во иднина ќе биде и антикорупцијата во Република Македонија“, изјави Тасева.Истражувањето на Глобалниот корупциски барометар за 2010-та година опфаќа 91.500 испитаници во 86 земји од светот. /крај/ач