Проширувањето на Европската Унија е високо во приоритетите на Шведска при нејзиното претседателствување со Унијата, што започна овој месец

„Најуспешен начин да се придонесе за мирот, демократијата и просперитетот на Европа е преку проширување“, рече амбасадорот на Шведска во Македонија, Ларс Фреден, на денешното претставување на приоритетите на Шведска за време на претседателствувањето. Фреден смета дека единствен начин Македонија да се приближи кон Европската Унија, како и да добие датум за преговори, е со исполнувањето на одредниците што се поставени пред нашата држава, поддржувајќи го евроамбасадорот Ерван Фуере, кој повтори дека треба да се работи на судскиот ситем и на јавната администрација. „Тоа се стандарди кои мора да ги достигнете. Проценката на Европската комисија не е политичко прашање, туку објективна оценка, по која Советот на Европа донесува одлука“, рече Фреден.Тоа што Советот го бара од Македонија, нагласи Фреден, се добри односи со соседите за напредок на земјата, но смета дека треба да се сфати оти Грција е членка на ЕУ, а Македонија се уште не е, а светот не е фер, особено надворешната политика.„Надворешната политика не се однесува на тоа да бидете разбрани надвор, туку да ги остварите своите цели“, вели Фреден. Тој не сакаше да дава никакви совети во врска со разликите што Македонија ги има со Грција околу името, затоа што не го разбира проблемот, според него, затоа што е аутсајдер, а не Македонец, а и нема да биде тука за да понесе политичка одговорност доколку се одлучи да се послушаат тие совети.„Секој поминат ден во Македонија без напредок е изгубен ден, па апелираме до Владата да направи напори за достигнување на барањата пред да стигне извештајот од Европската комисија“, рече евроамбасадорот Фуере, и додаде „го очекуваме новиот вицепремиер во Македонија за да продолжи процесот на приближување кон ЕУ“.Тој смета дека визната либерализација не може да се мери со датум за преговори за влез во Европската Унија, но е знак за Владата дека кога ќе се исполнат условите, а резултатите се неминовни.Амбасадорот Фреден вели дека кога една земја претседава со Европската Унија, ги одредуа и приоритетите, но нема да ги следи само своите, туку сите оние кои се претходно зацртани од европската заедница.Како едни од главните приоритети Фреден ги спомна економската криза, која од Волстит се пресели на реалниот сектор и многу граѓани се погодени од се’ поголемата невработеност, потоа климатските промени, кои имаат ефект врз сечиј живот. Исто така, Шведска ќе се занимава со спроведување на Програмата од Стокхолм за правда и внатрешни работи, која треба да ги зголеми мирот и безбедноста како за граѓаните на Европа, така и за останатите. Шведска ќе се залага и за имплементирање на Стратегијата за Балтичкото Море, со што ќе се проидонесе за почисто море и ќе ја зголеми економската динамичност на регионот. Институционалното прашање, функционирањето на Европскиот парламент, кој е неодамна избран, како и новите комесари што ќе бидат избрани во октомври, но и ратификувањето на Лисабонскиот договор се врв на приоритетите на Шведска за време на претседателствувањето. ЕУ како глобален светски играч во однос на мирот и стабилноста може многу да придонесе преку справување со кризите на Блискиот Исток, Ирак, Иран и земјите од Африка, соопшти Фреден.